¹ Eri mwami Ahazi we Yuda ajira myaka ekumi n'ebiri Hoseya mwene Ela ayima omu Israeli e Samariya, Arhambula myaka mwenda. ² Ajir'ebigayisize Nyamuzinda, Aliko arhajiraga kuguma n'abandi bami b'e Israeli baliri embere zage. ³ Mwami Shalimaneseri we Asuriya amurhebeka. Hoseya amushiga, amuherez'esoko. ⁴ Buzinda mwami Hoseya anywanula emunda mwami we Asuriya ali : Arhum'entumwa emwa mwami we Misiri, alahira n'okuha mwami we Asuriya esoko ngasi mwaka, Mwami Shalmanaseri we Asuriya abere amenya ntyo, ashweka Hoseya. ⁵ Ago mango mwami Shalmanaseri agera gera omu chihugo ehoshi, agorh'echishagala ch'e Samariya achigwarhir'oku myaka esharhu. ⁶ Hoseya aber'ajira myaka mwenda ali mwami, go mango mwami we Asuriya agwarhag'echishagala ch'e Samariya Ahek'aba Israeli e Asuriya ajibashweker'eyo. Abarhabik'omuchishagala che Hala oku burhambi b'olwinji lwe Habori olunda lw'eGozani omu bishagala by'e Mediya. ⁷ Obo buhanya bwabere ntyo, Aba Israeli bamajirira Nyamuzinda wabo ebyaha nabo ajiwanabakulag'omuchihugo che Misri, omu maboko ga mwami wago. Aba bantu bakazi haramy'enana. ⁸ Bashimb'engeso z'abantu Nyamuzinda ahigag'omu chihugo mpu ahebe mwaba israeli bahiragaho bonine. ⁹ Aba Israeli bajira bwibisho ebigayisize Nyamuzinda wabo. Bayumbak'empero omu mirhundu yabo yoshi, kurhengera aheshegukire kuhika ahalambukire. ¹⁰ Bayumanz'amabale, n'emitungo ya Ashera oku ngasi rango liri mw'emirhi yebishakashaka. ¹¹ Bakazi yosezam'obuku ahali ngasi luhero nk'oku abantu Nyamuzinda ahigaga bakazagi jira, abahiga aheba mwaba Israeli, bajira ebijiro bibi, byagayisa Nyamuzinda. ¹² Bakazigashaniza eshushano n'oku Nyamuzinda alibahanzize. ¹³ Nyamuzinda arhumira aba Israeli n'aba Yuda entumwa n'abalebi mpu baba bwire mpu: Mulek'engeso zenyu zibi, mujire nk'oku oburhegesi n'amahano mayandikirwe omu marhegeko nahaga bashokulu benyu gaderhere,nenyu nababwirire go omu gurhuma bambali bani b'abalebi. ¹⁴ Aliko barhayunvaga nabo kuguma n'abashokuliza babo, barhahungamiraga Nyamuzinda wabo. ¹⁵ Balek'amarhegeko gage n'echilagane alaganaga n'abashokuliza babo, n'amahano abahanulaga. Bakazi hera enama, bashubuka bakomerana n'abalungwe babo, n'abo Nyamuzinda abahanzaga mpu barhakuliragag'engeso zabo. ¹⁶ Balek'amarhegeko ga Nyamuzinda wabo bajir'eshushano ebiri z'echuma zichulirwe. Bakazi haramya omwezi, n'ezuba, n'enyenyezi bakazi hera eshushano y'enama Baali n'omutungo gw'Ashera. ¹⁷ Bakazi hana bagala babo, n'abali babo nterekero z'oku bulaguzi, bakazi jira ebigayisize Nyamuzinda. ¹⁸ Nyamuzinda agaya aba Israeli bwenene ery'ebyo byarhuma, arhachilonzag'abaloleko, hayorh'omulala gwa Yuda gonine. ¹⁹ Yuda naye arhangag'amarhegeko ga Nahano, Nyamuzinda wage, bashimber'engeso n'oborhere bwali bwamaj'omu chihugo ch'aba Israeli. ²⁰ Nahano acha aba Israeli boshi abalikir'embaga z'abanyezi abakweba erhali hofi. ²¹ Bulala Israeli bachikulaga oku bene Daudi, bayimika Yereboamu mwene Nebati aba mwami, n'oyo yi warhumaga aba Israeli bajirira Nahano ebyaha omu kurhamurhumikira, bajir'echaha chinene. ²² Kurhenga aho, aba Israeli bachishweker'oku byaha, bakulikir'engeso zibi z'okujira ebyaha nk'oku Yeroboamu ajiraga. ²³ Kugera aha Nahano arhachilonzaga abaloleko emalanga mage, na ntyo abalundagiza e Suriya, k'okuhikiriza oku yenine aderhaga omu balebi bage; aba Israeli baberayo, kuhika zene yi banaba. ²⁴ Mwami we Asuriya alerh'abantu b'omu chishagala ch'e Babeli, n'abe Kuta, n'abe Ava, n'abe Hamuti, n'abe Sefarwaimu abahira omu mirhundu ye chishagala che Samariya, ahali haba Israeli buno bali bamalibuzibwa. Bachigwarha chaba chabo, bajiber'omu mirhundu. ²⁵ Babere bajamo, balek'oku haramya Nyamuzinda, lero abagerek'entale, zabayirhamo. ²⁶ Babwira mwami we Asuriya okw'abantu ahekag'omu mirhundu y'echishagala ch'e Samariya, bahabire oku bagashaniza enama zamo, lero zabagerek'entale, zabayirhamo. ²⁷ Mwami w'e Asuriya ahana erhegeko: Mubaheker'omujinji muguma, wajibayigiriza gurhe bakazi hera eyo nama. ²⁸ Muguma w'omu badahwa bahekagwa e Samariya agalukagamo, aber'e Beteli. Ayinja ayigiriz'abantu oku bashinganene bayubahe Nahano. ²⁹ Aliko ezo mbaga z'emahanga zakazi bej'eshushano z'enama zabo, haliyumbakire n'abantu baliri e Samariya embere, ngasi baguma bayinja bajirantyo omu chabo chishagala. ³⁰ Abantu b'e Babeli bachul'eshushano y'enama Sukoti Benati, n'abe Kuta bachula eya Neragali, ³¹ n'abe Ava bachula eya Nibazi n'eya Taritaki, n'abe Safarvaimu bahana abana babo nterekero y'oku serezwa mpu k'oku kenga Adrameleki n'Anammeleki z'enama z'eyo mwabo e Sefarvaimu. ³² Bakazagiba bali baharamya Nyamuzinda boshi, bayimika ababo bajinji bonine oku kazikolera omu hantu habo himana n'oku yimangira amarhegeko. ³³ Mango maguma banaharamya Nyamuzinda, agandi mango banaji her'enama zabo, yena ngeso yaliri omu chihugo chabo barhengagamo. ³⁴ Kuhika buno eburha lyabo lichiba likulir'eyo ngeso ya mira. Ntyo barhashimbaga oli amarhegeko gage oli amahano gabo g'eka, oli amarhegeko n'oburhegesi bwa Nahano arhumiraga bene Yakobo, Nyamuzinda amuhag'ezino lya Israeli. ³⁵ Nabo Nyamuzinda abag'ajirire echilagane na bene Yakobo, abaha n'aga marhegeko gaderhere mpu: Murhakazagi hera enama, murhakazagi zigashaniza n'oku zikolera, murhakazagi zirhulira enterekero. ³⁶ Aliko mukazi mparamya nyenine nye Nyamuzinda nabakulag'omu chihugo che Misiri n'obuhashe burhakalindirwa, nyi mugwasize muharamye n'okump'enterekero. ³⁷ Mukwanene okurhumikir'oburhegesi ngasi lusiku omu kucha bofu amarhegeko goshi na yandikaga mbahago, murhachikwanene hajire owaharamya enama. ³⁸ Murhayihanirag'echilagane nalaganaga nenyu, na shubirira oku derha mpu murhakazagi hera enama. ³⁹ Aliko nyono nye Nyamuzind wenyu, nyi mugwasize muharamye, buno nyono nye bahumbul'oku bashombanyi benyu boshi. ⁴⁰ Ago mango barhakengaga, bakazi jira nk'oku engeso zabo zaliri. ⁴¹ Haly'amango abo bantu bayinjaga baharamya Nyamuzinda, n'agandi mango banahera enama zabo, abana balekaga kuhik'oku banjukuliza babo nabo bakazi jira kuguma na bashokuliza babo kuhika zene.