¹ Eri mwami Yeroboamu we Israeli ajira myaka makumyabiri na mushanvu, Uziya mwene Amaziya ayima e Yuda. ² Aliherhe myaka ekumi na ndarhu; arhambula myaka makumi marhano n'ebiri e Yerusalema. Nina yi waliri Yekoniya we Yerusalema. ³ Ajir;ebisimisize Nyamuzinda kuguma n'eshe Amaziya. ⁴ Aliko arhashandag'orhuhero, abantu bagendeker'okuhanira enterekero z'ebintu omurho, n'oku yoseza m'obuku. ⁵ Nyamuzinda ahira Uziya kw'endwala ndarhu: Ebibenzi byamujako kuger'okufa kwage, bamuberula omu bantu bamuhira hage. Omugala Yotamu wayinjag'alanga oburhwali aba ye rhambul'echihugo. ⁶ Ebindi bijiro Uziya ajirire, biyandikirwe omu chitabu ch'ebyakazagijirika ch'abami be Yuda. ⁷ Uziya afa, bamuhamba omushinda z'abami omu chishagala cha Daudi, omugala Yotamu ayima ahali hage. ⁸ Eri mwami Uziya ajira myaka makumi masharhu na munane, Zakariya mwene Yeroboamu ayima omu Israeli e Samariya, arhambula myaka ndarhu. ⁹ Ajir'ebigayisize Nyamuzinda kuguma na bashokuluza bage, ajira nk'oku mwami Yeroboamu mwene Nebati we Israeli ajiraga, arhuma aba Israeli bajir'ebyaha. ¹⁰ Shalumu mwene Yabeshi amugomera embere z'abantu boshi, amuyirha afa, ayim'obwami ahali hage. ¹¹ Ebindi bijiro Zakariya ajirere biyandikirwe omu chitabu ch'ebyakazagi jirika ch'abami be Israeli. ¹² Kula Nyamuzinda abwiraga mwami Yehu kwajirik'amango amubwiraga mpu: Abana bawe barhambul'omu Israeli kuhik'oku burha lya kane. ¹³ Eri mwami Uziya we Yuda ajira myaka makumi masharhu na mwenda, Shalumu mwene Yabeshi ayima e Israeli, arhambula mwezi muguma e Samariya. ¹⁴ Menahemu mwene Gadi arhenga e Tirsa, aj'e Samariya, ayirha Shalumu aba yerhol'obwami. ¹⁵ Ebindi bijiro Shalumu ajirire n'enkingi ajiriraga Zakariya, biyandikirwe omu chitabu ch'ebyakazagi jirika ch'abami be Israeli. ¹⁶ Ago mango Menahemu arhenga e Tirsa arhera echishagala che Tapuwa. Abakazi boshi bali makule abayirha. ¹⁷ Eri mwami Uziya we Yuda ajira myaka makumi masharhu na mwenda, Menahemu mwene Gadi ayima omu Israeli, arhambula myak'ekumi e Samariya. ¹⁸ Ajir'ebigayisize Nyamuzinda amango gage goshi. Ajira kuguma na Yeroboamu mwene Nebati ola warhumag'aba Israeli bajir'ebyaha. ¹⁹ Mwami Puli we Asuriya, achikabula omu Israeli. Menahemu amuha toni makumi masharhu z'efuranga mpu amurhabale, akomeze m'oburhegesi b'obwami bwage. ²⁰ Menahemu akulag'ezo furanga oku ba Israeli boshi. Arhegeka mpu ngasi muguma afurhe bicheri makumi marhano by'efuranga omu balume bachirire. Bamuhazo achigalukira ashubira omu chihugo chage. ²¹ Ebindi bijiro Benahemu ajirire byoshi biyandikirwe omu chitabu ch'ebyakazagi jirika ch'abami be Israeli. ²² Menahemu afa, omugala Pekahiya ayima ahali hage. ²³ Eri mwami Uziya we Yuda ajira myaka makumi marhano ali mwami, Pekahiya mwene Menahemu ayima omu Israeli e Samariya, arhambula myak'ebiri. ²⁴ Ajir'ebigayisize Nyamuzinda. Ajir'ebyaha kuguma na mwami Yeroboamu mwene Nebati warhumag'aba Israeli bajir'ebyaha. ²⁵ Chilongozi chage, Peka mwene Remaliya, amulaganira haguma n'enfola miherho makumi marhano bamuyirhir'e Samariya omu mwage. Arhol'obwami. ²⁶ Ebindi bijiro Pekahi ajirire byoshi biyandikirwe omu chitabu ch'ebyakazagi jirika ch'abami be Israeli. ²⁷ Eri mwami Uziya we Yuda ajira myaka makumi marhano n'ebiri, Peka mwene Remaliya ayima obwami myaka makumyabiri. ²⁸ Ajir'ebigayisize Nyamuzinda nk'oku mwami Yeroboamu mwene Nebati ajiraga, arhuma aba Israeli bajir'ebyaha. ²⁹ Amango Peka aliyimir'omu bwami e Israeli, mwami Tigalati-Pilezeri we Asuriya, agwarh'echishagala che Lyoni mpira, n'eche Abeli-Beti-Maaka, n'eche Yanowa, n'eche Kedesi, n'eche Hasoro, n'echihugo choshi ch'e Nafutali. Agwarha abantu mpiru, abahek'e Suriya. ³⁰ Eri mwami Yotamu mwene Uziya we Yuda ahisa myaka makumyabiri ayimire, Hoseya mwene Ela amwanirira mwami Peka, amuyirha arhol'obwami. ³¹ Ebindi bijiro Peka ajirire byoshi biyandikirwe omu chitabu ch'ebyakazagi jirika ch'abami be Israeli. ³² Eri Peka mwene Remaliya ahisa myaka ebiri, Yotamu mwene Uziya ayima e Yuda. ³³ Ayimaga eri agwerhe myaka makumyabiri n'erhano, arhambula e Yerusalemu myak'ekumi na ndarhu. Nina ali ye Yerusha mwa Sadoki. ³⁴ Ajir'ebisimisize Nyamuzinda kuguma n'eshe Uziya. ³⁵ Aliko arhashandag'orhuhero, abantu bagenda bajihanira mw'enterekero z'ebintu n'oku yoseza mw'obuku. Yotamu yiwayumbakaga olunvi lw'olunda lw'enyanya lw'aka Nyamuzinda. ³⁶ Ebindi bijiro Yotamu ajirire byoshi biyandikirwe omu chitabu ch'ebyakazagi jirika ch'abami be Yuda. ³⁷ Ago mango Nyamuzinda arhuma Resimu mwami we Suriya e Yuda na Peka mwami we Remaliya. ³⁸ Yotamu afa, bamuhamba omushinda z'abami omu chishagala cha Daudi. Omugala Ahazi ayima ahali hage.