¹ Oku mwaka gwa kabiri g'obwimo bwa Yoasi omu Israeli; Amaziya mwene majina g'owabo Yoasi ayima e Yuda. ² Aliherhe myaka makumyabiri n'erhano eri ayima. Nina ye wali Yehoyadini we Yerusalema. Arhambula myaka makumyabiri na mwenda omu Yerusalema. ³ Ajira ebisimisize Nyamuzinda. Aliko arhajiraga kuguma na shokulu wage Daudi, s'aliko ajira kuguma n'eshe. ⁴ Buno arhashandag'orhuhero abantu bakazagi yoseza mw'enterekero z'ebintu n'ezobuku. ⁵ Amaziya aber'amayumanz'oburhegesi b'obwami bwinja, ayirh'abarhambo bayirhag'eshe mwami Yoasi. ⁶ Aliko arhayirhaga abana babo. Akenga ebiyandikirwe omu chitabu ch'amarhegeko ga Musa, halala Nyamuzinda arhegekere mpu: Barhagendaga bayirhir'omu busi echaha ch'omwana wage n'omwana barhamuyirhirag'echaha ch'omubusi wage, aliko ngasi muntu akwanene achumule echaha chage yenine. ⁷ Amaziya yiwayirhaga abarhambo be Edomu bihumbi ekumi omulubanda lw'omunyu eri bali balwa. Agwarh'echishagala che Sela, Achih'ezino lya Yokiteli, lyena zino lyacho guhika zene. ⁸ Ago mango mwami Amaziya we Yuda arhumira mwami Yehoziya we Yuda, arhumira mwami Yoasi mwene Yoahazi munjukulu wa Yehu w'e Israeli entumwa mpu: Oyinje rhulwe. ⁹ Aliko mwami Yoasi we Israeli ashuza Amaziya mpu: Eshaka ly'emishaki ly'oku ntondo ye Lebanoni, lyarhuma mpu bajibwira omurhi gw'ehetere gwako mpu: Ogabire mugala wani mwali wawe abe mugake. Lero entale zamo zagera kw'elyo shaka zaligorha. ¹⁰ Kabuno wahimire aba Edomu, okola wayinja wachivuga; gurheng'ene ober'emwawe okazi chitakirirayo. Bichi byarhuma wakoz'entambala ona menyer'oku yakushurhama mpu y'oyirhis'engabo yoshi ye Yuda mufire haguma. ¹¹ Aliko Amaziya arhayunvag'oku mwami Yoasi we Israeli we Israeli amushondaga. Oku handi mwami Yoasi we Israeli. Aheb'omuherho embuga, engabo yage n'eya amaziya bashumbizana e Beti-Shemeshi w'e Yuda. ¹² Engabo ye Yuda bahimwa, bayakira ngasi muntu omu mwage. ¹³ Mwami Yoasi agwarha Amaziya mwene majina gage Yoasi munjukulu wa Ahaziya amuhek'e Yerusalema, ashand'olukuta lw'echo chishagala metre magana mane kurheng'oku lunvi lw'Efurahimu kuhik'oku lunvi lw'eburhambi. ¹⁴ Ahagula ehoro n'efuranga zali omu ka Namuzinda, n'ebindi bintu byaliri omu mbikiro z'oburhwali, n'abantu mpira ashubir'e Samariya. ¹⁵ Ebindi bijiro byoshi Yoasi ajirir'ebiyandiirwe omu chitabu ch'ebyakazagi jirika ch'abami be Israeli, mo muli n'oburhwali alwisagamo mwami Amaziya we Yuda. ¹⁶ Yoasi afa, bamuhamba e Samariya omushinda z'abami be Israeli, omugala Yeroboamu ayima ahali hage. ¹⁷ Mwami Yoasi we Israeli abere afa mwami Amaziya we Yuda achilamira myaka ekumi n'erhano. ¹⁸ Ebindi bijiro Amaziya ajirire biyandikirwe omu chitabu ch'ebyakazagi jirika ch'abami be Yuda. ¹⁹ Bamujirir'akaniho k'okuyirha Amaziya. Lero ayakir'omuchishagala che Lakisi, aliko bamushimba bamuyirhira yo. ²⁰ Bahek'omurhumba gwage oku farasi e Yerusalema, Bamuhamb'omushinda za bashokulu bage omu chishagala cha Daudi. ²¹ Abantu be Yuda barhol'omugala Uziya, eri achigwerhe myaka ekumi na ndarhu, bamuyimika ahali heshe. ²² Amaziya aber'amafa, Uziya ashubi gwarha echishagala ch'Elati. Achiyumbaka chashubiba che Yuda. ²³ Eri mwami Amaziya mwene Yoasi we Yuda ajira myaka ekumi n'erhano, Yeroboamu mwene owundi Yoasi ayim'omu Israeli e Samariya, arhambula myaka makumi mane na muguma. ²⁴ Ajir'ebigayisisize Nyamuzinda, ajira kuguma na majina gage Yeroboamu mwene Nebati we Israeli akazagi jira arhuma aba Israeli bajir'ebyaha. ²⁵ Ashubi gwarha ebihugo byali byaba Israeli, arhonderera e'Lebo-Hamati, ahika oku nyanja y'omunyu ekulyo, nka kulala Nyamuzinda waba Isaeli anaderhag'omu bunu b'omulebi Yona mwene Amitayi we Gati-Heferi. ²⁶ Nyamuzinda abon'oku aba israeli bali balibuka bwenene, na ntaye wabarhabala chiro n'omuguma. ²⁷ Aliko Nyamuzinda arholonzaga okukul'ezino lye Israeli loshi loshi, charhuma abarhumira Yeroboamu mpu abalikuze. ²⁸ Ebindi bijiro bya Yeroboamu bya yandikirwe omu chitabu ch'ebyakazagijirika ch'abami be Israeli, m'omuli ebyajirire byoshi, n'entambala ahimirag'aba Israeli eri abagwarhir'echishagala ch'e Damasiki n'e Hamati. ²⁹ Yeroboamu afa, bamuhamb'omushinda z'abami be Israeli, omugala Zakariya ayima ahali hage.