¹ Mwami Yoasi aber'ajira myaka makumyabiri n'esharhu, Yoahazi mwene Yehu ayima obwami omu Israeli e Samaria. Arhambula myaka ekumi na mushanvu. ² Ajir'ebigayisize Nahano, akulikir'engeso za mwami Yeroboamu warhumaga Aba Israeli bajir'ebyaha. ³ Nahano agay'Aba Israeli. Abalikira omu burhegezi bwa mwami Hazaeli we Suriya kuhika n'oku b'omugala Benehadadi. Abalikira mw'obo burhegesi mango manene. ⁴ Enyuma lyaho Yoahazi ahema Nahano, amuyunva; buno Nahano alibwen'oku mwami we Suriya alirhindibwiz'Aba Israeli. ⁵ Nahano arhumira aba Israeli omulikuza, abalikuza oku ba Suriya, kurheng'aho aba Israeli badekerera nk'oku banayorhag'embere. ⁶ Aliko aba Israeli barheng'okujira ebyaha mwami Yeroboamu n'omulala gwage bajiraga, chiro n'omutungo gw'enamakazi Ashera yaliri e Samariya. ⁷ Nyamuzinda alekera mwami Yoahazi enfola makumi marhano bagend'oku farasi, n'emituga ekumi, n'abantu bihumbi ekumi b'okulwir'oku daho buno mwami we Suriya alibalagashire. ⁸ Ebindi bijiro byoshi n'oburhwali Yoasi ajirire biyandikirwe omu chitabu ch'ebyakazagiba ch'abami b'e Israeli. ⁹ Yoahazi afa, bamuhamba e'Samariya omugala Yoasi ayima obwami ahali hage. ¹⁰ Mwami Yoasi mwene Ahaziya abere ajira myaka makumi masharhu na mushanvu, majina gage Yoasi mwene Yoahazi naye ayima obwami e Israeli omu Samariya. Arhambula myaka ekumi na ndarhu. ¹¹ Ajir'ebyokugayisa Nyamuzinda nka bilala Yeroboamu mwene Nebati ajiraga arhuma aba Iaraeli bajira ebyaha. ¹² Ebindi bijiro byoshi Yoasi ajirire biyandikirwe omu chitabu ch'ebyakazagiba ch'abami be Israeli, m'omuli n'oburhwali alwisagamo mwami Amaziya we Yuda. ¹³ Yoasi afa, bamuhamba e Samariya omu shinda z'abami be Israeli, omugala Yeroboamu ayima ahali hage. ¹⁴ Elisha alwala endwala, ye Yankanamuyirhire, mwami Yoasi we Israeli aj'emundali, amuyigamira alaka mpu: Darha, darha! S'olushire emituga y'entambala zoshi ze Israeli n'enfola miherho bayigendamo. ¹⁵ Elisha amubwira mpu: Ofumbarh'omuherho n'omwambi; mwami Yoasi abifumbarha; ¹⁶ Ashubi mubwira mp'ogufole. Abere agufola, Elisha ahir'efune yage oku za Yoasi. ¹⁷ Abwira Yoasi mp'ochingul'edirisha oku lunda lw'ebushoshokero bw'ezuba. Achingula. Elisha aderha mpu: Ogo mwambi gwamalagula obuhimane Nyamuzinda aherez'abantu bage oku Basuriya. Walwis'aba Suriya e Afeki, wabahungumula boshi. ¹⁸ Elisha ashubi bwira Yoasi mp'orhole eyindi myambi. Ayirhola. Elisha amubwira mpu: Lasha omw'idaho. Alasha kasharhu aleka. ¹⁹ Elisha agaya, amubwira mpu: Wali walasha garhano kandi eri kali ndarhu, go n'amango wankahimire aba Suriya boshi, obahungumule boshi, aliko okala wabalwisa kasharhu. ²⁰ Elisha afa bamuhamba. Ngasi mwaka engabo y'e Moabu yakazij'omu chihugo che Israeli. ²¹ Lusiku luguma eri bajihamb'omuntu, babandana echikunjo ch'enfola miherho. Bakweb'ogo murhumba omushinda ya Elisha, bamajira ekumi na mabiri. Ogo murhumba gwabere gwahik'oku mavuha ga Elisha, gwafuka gwayumanga. ²² Mwami Hazaeli we Suriya, abonerera aba Israeli amango ga Yoahazi. ²³ Aliko Nyamuzinda ababer'obonjo. Abababalira enyanya z'echilagane ajiraga n'Aburahamu, na Israeli, na Yakobo. Abaleka, arhachibayirhaga, aliko akazi barhabala na kuhika buno. ²⁴ Mwami Hazaeli we Suriya afa, omugala Benehadadi ayima ahali hage. ²⁵ Mwami Yoasi mwene Yoahazi we Israeli alwisa Benehadadi mwene Hazaeli ana muhima, agwarha ebishagala byoshi. Banyegag'amango eshe Yoahazi aliyimire. Yoasi mwene Yoahazi abalwisa kasharhu, abahima boshi. Ashubi galul'ebishagala by'e Israeli byoshi bagwarhaga.