¹ Solomono ayunvikana na mwami Farao w'e Misiri. Arhola mwali wa Farao, amuheka omu chishagala cha Daudi, kuhika abumba enju yage, enju ya Nyamuzinda n'olugurhu luzungulukire e Yerusalemu. ² Ago mango abantu bagendaga bahanira enterekero omu maherero ga ngasi lubero, bulala arhalizi yumbaka enju oku zino lya Nyamuzinda. ³ Solomono asima Nyamuzinda, akulikira oborhere bw'eshe daudi, s'aliko haliri h'oku maherero gw'okuhanira olufu n'akabayo. ⁴ Mwami aja e Gabaoni achihana enterekero. Bulala haliri hamaherero makulu. Solomono arhula ebihumbi n'ebihumbi oku nterekero lyahola hantu. ⁵ Eri bula budufu e Gabaoni, Nahano ayinjira Solomono omu bilorho, Namahanga amu bwira: Ohune echolonzeze choshi naguhacho. ⁶ Solomono ashuza: Waliyerekere darha Daudi mwambali wawe, mukubagirwa, bulala alemaga alambagira ahanalihoshi omu bushinganyana, omu burhegesi n'omu marhegeko g'omurhima embere zawe; wamubikira obukubagirwa bunene, wamuhereza omugala oyikere oku ntebe yage y'obwami nka ku mwa bibwene zene. ⁷ Lero, Nahano Namahanga wani, wayimika mwambali wawe ahali ha darha Daudi; nyono nchiri mudorho, na ntabwenge b'okukola mperhe. ⁸ Mwambali wawe ali omu kagarhi k'olubaga walondolaga, lubaga lunene, lurhankaganjwa lurhakana menyika, bulala balugire. ⁹ Ohereze mwambali wawe omurhima g'obumanyi mpu ly'arhambula olubaga lwawe, mpu lyamenya ebinja n'ebibi! Bulala akazi ch'olubanja l'olubaga lwawe nk'oku olubaga lulugire? ¹⁰ Obola buhemi bwa Solomono bwa simisa Nyamuzinda. ¹¹ Namahanga aderha: Bulala ch'ohunir'echola, bulala orhahunire akalamo kanene, obugale, olufu oku bashombanyi bawe, ohunire obumenyi bw'okurhegeka. ¹² Naguha ebi wahunaga, nakuha obumanyi bunene, n'obwenge bunene,harhakaziba omuntu oherhe obwenge buli nk'obunaguha, arhakabonekana. ¹³ Nji nakuhereza ehyorhasagi huna, obugale n'erenge, omu kalamo kawe koshi harhaba omwami oherhe ebiri nka byawe. ¹⁴ Nka wakalambagira omunjira zani, n'okukulikira amarhegeko gani nk'oku isho Daudi ajiraga, njina kuyushulira esiku. ¹⁵ Eri Solomono azuka; ago mango amenya bwinja oku Nyamuzinda ya muderhesa omu bilorho. Oku handi ashubira e Yerusalemu, aja embere za Nyamuzinda lye Sanduku ly'endagano ahana enterekero z'okulikomeza, ahana n'ezo kuhera. Enyuma zaho aha abagula bage boshi echimogomogo. ¹⁶ Nantyo lusiku luguma bakazi babiri b'obuhushi baja emwa mwami Solomono. ¹⁷ Muguma wabo bakazi aderha: Mbabalira! Nahano wani, nyono n'oyu mukazi rhulamire nju nguma naye, na lyama hofi naye omu nju. ¹⁸ Enyuma ya siku esharhu, oyu mukazi naye alyama. Rhwalilamire haguma, ntaye wahale waliri nerhu omunju, rhwanaliri babiri. ¹⁹ Mugala w'oyu mukazi afa amango g'obudufu, bulala alimulyamireko. ²⁰ Azuka omu charagati ch'obudufu arhola mugala wani aha burhambi bwani eri mwambalikazi wage alyamire, amulyamize omumabere gage; n'omugala afire amulyamize omumabere gani. ²¹ Esezi sezi nzuka n'oku nkola nayonsa omwana, na bona afire, eri mulolereza bwinja nabona oku arhali wani na burhaga. ²² Oyula mukazi aderha: Yiwabesha! Owani ye zene, n'owage ye wafire! Aliko olala mwamwambere ashubi derha: mani nanga! Owawe yi wafire, n'owani ye zene! Ntyo kubajire bacha obuhaka embere za mwami. ²³ Hon'aho mwami Solomono aderha ntya: Muguma ali aderha mpu omwana wage ye zene, n'ow'owabo yefire, hano mango muguma alahira okw'arhali ntyo, ahyahiriza eri: Owani ye zene n'owawe yi wafire. ²⁴ Lero mwami aderha mpu bamulerhe omu panga. Bamulerhago, ²⁵ aderha eri: Muche oyo mwana ozene mubichira bibiri muhe muguma chichira n'owundi echindi chichira. ²⁶ Oyola mukazi wali nina w'omwana ozene, adwira omunda, abwira mwami ntya: Leka waliha ohe oyola mukazi oyo mwana ozene orhamuyirhaga! Aliko owabo atyomereza aderha ntya: Mumuchemo, rhumurhale rhwembi naye. ²⁷ Ago mango mwami aderha ntya: Murhachiyirhaga oyo mwana, mumuhe omukazi warhangagi derha mpu murhamuyirhaga, oyo ye nina. ²⁸ Aba Israeli boshi bayunva oku mwami achire olo lubanja, bamukenga bulala bamabona oku Namahanga yemuhere obo mubanye bw'okuch'olo lubanja n'obushinganyanya.