¹ Daudi ahamagalira abarhegesi boshi b'aba Israeli e Yerusalemu, abakulu bw'obuko, abakulu ba b'ebigabi byoshi b'emirimo ya mwami, abakulu be bihumbi n'abakulu b'amagana, baliri omu kulanga ebintu byoshi n'ebirhungano bya mwami n'abaliri hofi na n'abana, n'abarhonyi, n'abarhambo, n'entwali zoshi n'abandi balimenyikene. ² Mwami Daudi ayumuka, aderha: Muyunve, bene berhu n'abantu bani! Omu nyono mwaliri enganiza y'okuyumbakira e Sanduku y'echiragane ya Nahano akaziyerekan'obuhashe bwa Nyamuzinda wage, na nkola mperh'eby'okuyumbaka. ³ Aliko Nyamuzinda ambwira: Orhaka nyumbakira enju oku zino lyani, bulala oli muntu wa ntambala n'oku washesher'eshagama. ⁴ Nahano, Nyamuzinda w'aba Israeli, andondol'omu mwerhu, mpu mbe mwami w'aba Israeli esiku n'amango; bulala alondolaga Yuda mpw'abe mukulu, achinshog'omu mwerhu omu buko bwa Yuda, n'omu mwerhu nya lilonzeze mpu mbe mwami w'aba Israeli boshi. ⁵ Omu bana bani boshi - bulala Nahano ampere bana banene achishogere mugala wani Sulemani mpu ayikal'oku ntembe y'obwami bwa Nahano, omu Israeli. ⁶ Ambwira: Sulemani, mugala wawe, nja nyumbakir'enju n'embunga; bulala na chishogere ye mpu abe mugala wani, nani mb'eshe. ⁷ Nji nayumanz'obwami bwage esiku n'amango, n'akab'agendeker'okujira obulonza bwani nk'okwayorhere zene. ⁸ Na ntyo, omu mesho g'aba Israeli boshi, n'embere z'eyi ndeko ya Nahano, n'embere za Nyamuzinda werhu oli warhuyunva, mbabwirire bwinja oku muchihebe haguma oku kenga amarhegeko ga Nahano, Nyamuzinda wenyu, mpu nji muyorhan'echihugo chikwirire nji munachilekere n'abana benyu kabe kashambala k'esiku n'amango. ⁹ Nawe, mwana wani, Sulemani, omenye Nyamuzinda wa Isho, omukolere n'omurhima gwawe goshi n'obulonza bwage, bulala Nahano analola ebiri omu mirhima yoshi n'okuja omu ndalala n'omu nkengero zoshi. Akaba wakamulonza, njana chiyerekana emund'oli; aliko oka muleka, naye njana kukabul'esiku zoshi. ¹⁰ Kurhenga zene omeny'oku Nahano akulondwere, mp'omu yumbakire aka Nyamuzinda ha haba hantu hage hachere. Ochikaze bwenene n'opkukola. ¹¹ Daudi aherez'omugala Sulemani, olugero lw'ahantu hachere, amuyereka gurh'ayumbaka enju, obusika bw'okubikira efuranga, eby'enyanya eby'omu garhi, n'echibuga ch'okubikira e Sanduku y'echiragane. ¹² Amuherez'olugero l'oku yumbaka ngasi byoshi arheganyaga, amuherez'olugero lw'embuga y'enju ya Nahano, n'obumbako buyizungulukire n'embiko y'ebintu bichere barhulire Nyamuzinda. ¹³ Amuyereka gurh'agaba emirimo oku badahwa n'Abalawi, n'eyindi yoshi omu ka Nyamuzinda, n'ebintu byoshi byaliri enyanya z'omulimo gw'enju ya Nyamuzinda. ¹⁴ Amuyereka gurh'achula ebintu by'e horo, haguma n'olugero lwaliri lw'ehoro, n'ebyankahwera ku ngasi chintu; n'ebyankahwera oku byuma by'efuranga, haguma n'olugero, lw'ebyankahwera ku ngasi chintu. kukulikira nk'okubakazi kola ngasi chiguma. ¹⁵ Amuyereka gurh'achula ebimaniko by'ehoro n'amatara g'ehoro; n'olugero lw'amatara g'efuranga, ebye horo n'eby'echuma ch'efuranga,na ngasi chiguma chizidohe nk'oku chikolerwe. ¹⁶ Amubwira obuzidohe bw'ehoro lya chula echibo ch'ogurhulira kw'emigati y'okuchishukula, n'olundi na ngasi lwibo; n'efuranga oku chibo ch'efuranga. ¹⁷ Amuherez'olwiganyo lw'amakanya, n'ebeseni n'engumbu z'ehoro ekwirire; olwiganyo lw'engumbu z'ehoro, haguma n'obuzidohe bwa ngasi ngumbu, n'engumbu z'efuranga, haguma n'obuzidohe bwa ngasi ngumbu; ¹⁸ n'olwiganyo lw'olurhamba lw'amafurha g'akahumbu kenja k'ehoro eyosezwe, haguma n'obuzidohe. Ashubiriza kumuhereza olwiganyo lw'omutuga gw'entambala, amakerubi g'ehoro bali lambwir'ebyubi byabo n'okushukira e'Sanduku y'echiragane cha Nahano. ¹⁹ Kwa liri oku lwandiko lw'efune, Daudi aderha, mpu Nahano ye wamperezag'obwenge bw'ebila byoshi, n'ebintu byoshi bya ngasi lwiganyo. ²⁰ Daudi abwira Sulemani: Ochihangane, okomere, onakole; omenye wanka yubaha chiro, na ntakudirhimana chiro. Bulala Nahano Nyamuzinda, Nyamuzinda wani, nj'aba haguma nawe; arhakanakuleka chiro, arhakanakuyaka chiro, Kuger'amango wamal'obumbake bwa ka Nyamuzinda. ²¹ Lolaga olubero lw'abadahwa n'Abalawi bakazi ku gwasa kw'eyola mirimo y'aka Nyamuzinda; lolaga hofi nawe, oku ngasi mulimo, abantu boshi bali balenga n'obushiru omu mirimo yoshi, n'abakulu n'abantu boshi baherh'omurhima gw'oku keng'amarhegeko gawe goshi.