¹ Mwami Daudi abwir'abantu boshi mpu: Mugala wani Sulemani, ye Nyamuzinda achishogere, achiri mwana wa myaka migeke arhanazikomeraka, n'omulimo gu shinganene, bulala eyila nju erhali ya muntu, aliko eri ya Nahano Nyamuzinda. ² Naheber'emisi yani yoshi omu kurhegeny'obumbake bwa ka Nyamuzinda k'ehoro mpu njikabe k'ehoro, n'efuranga oku binji byaba bya furanga, n'ebye miringa okuba bya miringa, n'ebyuma oku binji byaba bya byuma, n'ebyuma oku binji byaba bya byuma, n'emirhi na ngasi bintu nji bya jirwa n'emirhi, n'amabale n'ebintu nji byajirwa n'amabale, n'amabale g'engulo nene n'amabale gabejerwe bwinja, amabale gabaraganyire na ngasi mabara ga ngasi lubero, na ngasi lubero lw'amabale g'engulo nene, n'abumbire n'amadafali ng'okulimbisa. ³ Kandi, omu kuyerekana oku nsimire aka Nyamuzinda, mpanir'ehoro zani zoshi ngwerh'omu mwani, ziyushule ezola na baga narheganyize, ziyumbake a ka Nyamuzinda: ⁴ bihumbi bisharhu by'e tala y'ehoro, n'ehoro ze Ofiri, na zindi bihumbi mushanvu by'efuranga zikwirire, omu kukwiz'enyunda z'ezo nju, ⁵ ahahemer'ehoro haj'ehoro, ah'ebyuma haj'ebyuma by'efuranga, n'emirimo yoshi nji yajirwa n'abakozi. Nde oherh'obulonza n'omurhima g'oguhan'eby'okuyumbakira Nahano zene? ⁶ Abashamuka n'abagula, n'abakulu b'engabo ze Israeli, n'abarhegesi ba bihumbi n'amagana, n'abarhegesi ba mwami boshi baba n'omurhima g'obulonza bw'okuhana entulo . ⁷ Bahanaga enyanya w'omulimo gw'enju ya Nyamuzinda toni bihumbi birhano by'ehoro, bihumbi ekumi by'ebicheri, bihumbi ekumi by'e toni y'efuranga, bihumbi ekumi na munane by'etoni y'emiringa, na bihumbi egana by'etoni y'ebyuma. ⁸ Abaliherh'amabale g'engulo ndarhi emwababo bagasholola enyanya w'enju ya Nahano bamahereza Yehieli, w'eshanja lya Gerisoni. ⁹ Abantu boshi basima oku barhulire n'omurhima g'obushagaluke, bulala kwaliri oku murhima g'obwemere barhulira Nahano; na Mwami Daudi konako ashagaluka bwenene. ¹⁰ Daudi akuza Nahano embere z'abantu boshi. Aderha mpu: Ogishwe, esiku n'amango, Nahano, Nyamuzinda wa shokulu werhu Israeli. ¹¹ Emwawe, Nahano, obunene, emisi, n'obwinja, n'erenge, n'obukuze, bulala byoshi bibw'omu mpingu n'oku gulu byawe; nawe, Nahano,oburhegesi, bulala weba enyanya za byoshi! ¹² Obugale n'obukuze burheng'emwawe, werhambula ebintu byoshi, byoshi biba omu fune yawe emisi n'obuhashe,n'omu fune yawe mw'omuba obuhashe b'okuyushula n'okukuza ebintu byoshi. ¹³ Na ntyo, mani Nyamuzinda werhu, rhwama kuharamya, n'okukuz'ezino lyawe likulu. ¹⁴ Bulala nyono ndi nde omu bantu bani, mpu rhukurhulir'entulo oku bulonza bwerhu? Ebintu byoshi rhujira emwawe birhenga, n'ebirhurhula werhuhereza byo n'efune yawe. ¹⁵ Rhwabo rhuba bahisi n'abalambagizi, nk'oku badarha baliri; Akalamo kerhu omugulu kahunjuka nka kulala ejichu chigera,na ntamunihiro rhuchijira chiro. ¹⁶ Nahano, Nyamuzinda werhu, omu fune yawe mw'omurhenga obugale boshi rhwamarhegany'oku kuyumbakiramo aka NYamuzinda, enwawe, oku zino lyawe lichesibwa, na byoshi emwawe birhenga. ¹⁷ Nyinji, mani Nyamuzinda wani, omaeyere byoshi biri omu murhima gwani, osima n'okuli; na kandi na kuhereze entulo zoshi z'obulonza bw'okuli bw'omurhima gwagi, na nabona ntyo haguma n'obushagaluke bw'olubaga lwawe balamire hanola okukurhulir'entulo y'obulonza bw'emigisho yabo. ¹⁸ Nahano, Nyamuzinda w'Abrahamu, Isaka na Israeli, badarha, oyimanzize esiku zoshi omu murhima gw'olubaga lwawe entimanyo n'enkegero, mpu bakazi kuyibuka loshi. ¹⁹ Ohereze mugala wani Sulemani omurhima guserere, g'oku kenga amahano n'amarhegeko gawe, akuyumbakire bwinja n'ebi bidurhiro narheganyize . ²⁰ Daudi abwira boshi mpu : Bakuze Nahano, Nyamuzinda wabo! N'abantu boshi bakuza Nahano, Nyamuzinda wab'eshe. Bafuka n'okuharamya embere za Nnahano na mwami. ²¹ Bwabere bwacha esezi, abantu barhul'enterekero z'okugashaniza n'ezo kusireza mpanzi chihumbi emwa Nahano, n'engandabuzi chihumbi n'ebindi byana by'embuzi chihumbi, haguma n'edivayi, n'ezindi ntulo za nkalisiz'aba Isreali boshi. ²² Olo lusiku banywa balya n'echimogomogo chinene embere za Nahano, bashubi yimika Sulemani obwa kabiri, mwene Daudi, bamushiga amavurha embere za Nahano okuba mukulu, banashiga na Sadoki okuba mudahwa. ²³ Sulemani ayikal'oku ntebe ya Nahano, nka mwami ahali h'eshe Daudi. Agandaza, aba Israeli boshi bamukenga. ²⁴ Abakulu boshi n'entwali zoshi, na chiro bene mwami Daudi boshi bakeng'obukulu bwa Sulemani. ²⁵ Nahano akengesa Sulemani embere z'aba Israeli boshi bwenene, amukengesa kulush'abami boshi bayimire omu Israeli embere zage. ²⁶ Daudi, mugala wa Yese, arhambula aba Israeli boshi. ²⁷ Akashanji koshi arhambulaga omu Israeli yaliri myaka makumi mane: E'Heburoni arhambula myaka mushanvu, n'e Yerusalemu arhambula myaka makumi masharhu n'esharhu. ²⁸ Afa eri ali mushaja bwnene, abaga ayugurhir'esiku, obugale n'obukuze. Na Sulemani, omugala, ayima ahali hage. ²⁹ Ebijiro bya Mwami Daudi, kurheng'oku murhondero kuger'oku buzinda, biyandikirwe omu chitabu ch'omulebi Samweli, n'omu chitabu ch'omulebi Natani, n'omu chitabu ch'omulebi Gadi, ³⁰ haguma n'oburhegesi bwage boshi n'ebijiro byage byoshi, na byoshi byageraga omu kashanji kage, bibe omu Israeli, bibe n'omu mami goshi g'ebihugo byoshi.