¹ Na Daudi aderha: Eyila ye nju ya Nahano Nyamuzinda, na hanoo hahaba olurhamba lw''entulo z'okusirezwa z'aba Israeli. ² Daudi ashubuza abahisi boshi baliri omu chihugo che Israeli, n'oku baherez'emirimo y'okushomek'amabale g'oku yumbaka aka Nyamuzinda. ³ Arheganya ebyuma by'emisumari by'okusheshez'omw'enkingi z'enyunvi n'emilambaliko, n'ebyuma alundaga oku bunene birhankaga lengwa, ⁴ n'emirhi y'emyerezi erhagwerhe luganjo, bulala abantu b' e Sidoni n'abe Tiro balerhera Daudi emirhi minene y'emyerezi. ⁵ Daudi aderha: Mugala wani Sulemani achiri mudorho, arhazikomera, n'aka Nyamuzinda nji kayumbakwa ka kwanene ka kwire kabe kazibuzibu kamenyikane omu gulu lyoshi; che chirhumire na kabikir'obuhirhi. Na Daudi alund'obuhirhi bunene embere z'okufa. ⁶ Daudi ahamagal'omugala Sulemani, amubwira mpw'arhonder'oku yumbaka aka Nyamuzinda w'e Israeli. ⁷ Daudi abwira Sulemani: Mwana wani, naliherhe enyorha y'okuyumbaka aka Nyamuzinda oku zino lya Nahano, Nyamuzinda wani. ⁸ Aliko omwazi gwa Nahano gwa ngerera mpu: Washeshere shagama zinene, walwir'entambala zinene, oku ntyo orhanka yumbak'enju oku zino lyani, bulala washeshere shagama zinene embere zani omu chihugo. ⁹ Lolaga, nj'akuburhir'omwana, nj'aba mwan'orhuzize, nani nji namulang'oku bashombanyi bage bamuzungulukire; bulala ezino lyage y'e Sulemani, njinahir'omurhula omu Israeli esiku zoshi z'akalamo kage. ¹⁰ Yewe ye nji wayumbaka aka Nyamuzinda oku zino lyani. Nj'aba mwana wani, nani nab'eshe; n'obwami bwage burhakadundwa omu Israeli. ¹¹ Na ntyo, mwana wani, Nahano abe haguma nawe, oshimike n'oku yumbak'enju ya Nahano, Nyamuzinda, kulala yenine aderhaga! ¹² Chaziga Nahano akuherez'obwenge n'oku menya, n'okukuyimika omu Israeli omu kulanga amarhegeko ga Nahano, Nyamuzinda wawe! ¹³ Ntyo wanagandaza, nk'okengere amarhegeko Nyamuzinda aherezaga Musa mpu aheker'aba Israeli. Ozibuhe, obe n'obwenge, orhayubahaga chiro n'oku rhayubaha chiro. ¹⁴ Lolaga, omu kuchihangana, nadurhirira aka Nyamuzinda milengo bihumbi egana by'ehoro, mulioni muguma gw'etalanta by'efuranga, n'ebyuma by'omulinga birhaherhe luganjo, bulala byaliri binene; narheganya n'emirhi n'amabale, nawe nj'oyushule kw'ebindi. ¹⁵ Ogwerh'abantu banene b'okukola, baleng'omu kushongol'amabale, n'okubej'emirhi, n'abandi bantu bamenyere ngasi bulenga. ¹⁶ Ehoro, efuranga, emilinga n'ebyuma, birhangwerhe luganjo. Yumuka n'oku rhonder'oku yumbaka, na Nahano abe haguma nawe! ¹⁷ Daudi arhegek'abakulu boshi be Israeli mpu barhabale omugala Sulemani. ¹⁸ Nahano, Nyamuzinda wenyu, arhali haguma nenyu, K'arhabaherezag'omurhula omu njira zoshi? Bulala ampimirag'abashombanyi bani boshi bali omu chihugo, n'echihugo chikala chishigire Nahano n'embere z'olubaga lwage. ¹⁹ Mukolere Nahano n'omurhima goshi n'obugumaguma boshi, Nyamuzinda wenyu; muyumange, n'okuyumbaka olurhamba lwa Nahano Nyamuzinda, na ntyo murhabike mwela sanduku y'echiragane cha Nahano n'ebintu bichesibwa bya Nyamuzinda omu nju ya yumbakwa oku zino lya Nahano.