¹ Lyangombe azuka enyanya z'aba Israeli, arhebeka Daudi mpu ajire oluganjo lw'aba Israeli. ² Na Daudi abwira Yoabu n'abandi bakulu b'engabo y'e Israeli: Bagende, bajir'elisasima ly'aba Israeli, kurhenger'e Beri -Seba kuhik'e Dani, Munderhere meny'oluganjo, lw'abantu gurhe bakala banganachi. ³ Yoabu ashuza: Na Nahano ayushul'abantu bage b'e Israeli kali gana kulush'oluganjo lwabo! Mani mwami waliha wani, ka barhaliri bakozi bawe boshi waliha? Aliko gurhe waliha wani wakadosa ebiri ntya? Bichi birhumire wajira ntyo mpu y'ogomes'aba Israeli ? ⁴ Mwami achiyimangirako omu rhegeko abwiraga Yoabu. Na Yoabu agenda, n'okugera omu Israeli yoshi; na ntyo enyuma lyaho agaluka e Yerusalemu. ⁵ Yoabu alerhera mwami Daudi oluganjo lw'abantu boshi aganjaga: Boshi aba Israeli baliri milioni ekumi na muguma na bihumbi egana by'abalume bakarhol'engorho, n'e Yuda baliri bihumbi magana mane na makumi gali mushanvu bakalwa. ⁶ Yoabu arhaganjag'Abalawi na bene Benjamini, bulala erhegeko lya mwami lyali mugayisize. ⁷ Elyo rhegeko ya gayisa Nyamuzinda, ashurh'aba Israeli. ⁸ Na Daudi abwira Nyamuzinda, mpu najirir'echaha chinene okujira ntyo! Na ntyo, waka babalira obubi bw'omukozi, bulal'ajirire nka chinganyi! ⁹ Nahano abwira Gadi, mulebi wa Daudi: ¹⁰ Gend'obwire Daudi: Ntya ku Nahano aderhere: Namaguha mahanya masharhu, ochishoge buhanya buguma, nana kuherezabo. ¹¹ Gadi agend'emwa Daudi, amubwira: Na ntya ku Nahano aderhere: mp'ochishoge, ¹² changwa myaka esharhu y'eshali, changwa myezi esharhu oli wahimwa n'abashombanyi bakuvulumbule n'echumu, changwa siku esharhu Nahano y'agez'echumu omu chihugo arhume n'ebibenzi bij'omu chihugo na Malayika wa Nahano arhabik'echinjira omu chihugo choshi che Israeli. Lolaga gurhe waja wambwira gurhe najibwira owantumaga. ¹³ Daudi abwira Gadi, ebihamba byangwarhire! Mani! ndonzeze nfir'omu fune za Nahano, bulala obonjo bwage buli bunene; hali nfire omu fune z'abantu! ¹⁴ Nahano arhum'echinjira omu Israeli, chayirha bihumbi makumi gali mushanvu by'abantu. ¹⁵ Nyamuzinda Malayika e Yerusalemu mpu ajibihya; nka kulala abihyaga, Nahano alolereza n'oku rhuma obw'obuhanya, n'oku bwira Malayika walemaga wabihya: Kurhali kugeke oko! Jaga wa galul'efune yawe. Malayika wa Nahano ayumanga ahabahulir'engano, aha mw'omu Yebusi. ¹⁶ Daudi ayinamul'amesho, abona Malayika wa Nahano ayimangire omu kagarhi k'egulu n'empingu eyaherh'omupanga guryazizwe omu fune zage guyerekezw'e Yerusalema. Na ntyo Daudi n'abashamuka, bayambiswe ebigunira, bafukamire n'okuheba amalanga oku daho. ¹⁷ Na Daudi abwira Nyamuzinda: Karhali nyono nyinajirisaga oluganjo lw'abantu? Nyono nyenajirag'echaha n'oku jira amabi; aliko ab'abantu, nabo bichi bajirire? Nahano, Nyamuzinda wani, efune yawe ebe enyanya zani n'omulala gwani, oleke okulerh'echihulu okw'aba bantu bawe! ¹⁸ Malayika wa Nahano abwira Gadi ajibwira Daudi, mpw'ayumbakire Nahano olurhamba ahabahulir'engano, aha mwa Onani w'omu Yebusi. ¹⁹ Daudi azamuka, ajira oku Nahano arhumaga Gadi. ²⁰ Ornani ahindamuka n'okubona malayika, n'abagala bane bachibisha haguma naye: balemaga bahul'engano. ²¹ Amango Daudi ageraga hofi na Ornani, Onani amulola, n'okulangira Daudi; n ntyo arheng'omu chibuga, afukam'emalanga ga Daudi, ayinama oku daho. ²² Daudi abwira Ornani: omperez 'eyimbuga ohulirako nyiyumbakire mu Nahano olurhamba; oyimpe nyigule efuranga yankagulwa, na ntyo yeyi ndwala y'echinjira erheng'omu bantu. ²³ Ornani abwira Daudi: Waliha Nakuno, ojire nkok'olonzeze; lolaga, na hanire empanzi z'enterekero, emitugari y'eshaali, n'engano z'entulo, nahanire ebyo byoshi. ²⁴ Aliko mwami Daudi abwira Ornani: Nanga! Nabigalu okungulo y'efyuranga, bulala ntagahereza Nahano ebiri byawe, ntankana murhulir'entulo ntagulaga. ²⁵ Na Daudi ahereza Ornani bihumbi magana ndarhu by'ehoro kw'eyo mbuga y'oku hulir'engano. ²⁶ Daudi ayumbakira Nahano olurhamba, n'oku hira kw'enterekero y'okusirezwa n'ey'olukogo. Ahuna Nahano, na Nahano amuyemera omu gurhuma echirimbi ch'omuliro, charheng'empingu chagulumiz'enterekero oku lurhamba. ²⁷ Na ntyo Nahano abwira Malayika: Ashubize engorho yage omu luba. ²⁸ Agola mango, Daudi, abona oku Nahano ayunvirhe n'amahuno gage mw'echo chibuga cha Ornani, w'omu Yebusi, akazi hanira h'enterekero. ²⁹ Aliko ehema ly'okubuganana lya Nahano, lilala Musa ali yumbakir'omu mpinga, n'olurhamba lw'enterekero, byaliri omu hantu h'enyanya omu Gabaoni. ³⁰ Daudi arhankajire hofi n'olo lurhamba mpu ajihuna Nyamuzinda, bulala engorho ya Malayika wa Nahano yali muyubahisize.