¹ Babere bamalerha eyo Sanduku ya Nyamuzinda, bayirhabik'omu charagati k'ehema lya Daudi ayi yumbakiraga, bahereza Nyamuzinda Enterekero y'okusireza n'eyo kugashaniza. ² Amango Daudi amalaga hana ennterekero y'okusirezwa n'okugashaniza, Agisha abantu boshi oku zino lya Nahano. ³ Na ntyo agabira boshi baliri omu Israeli, abalume n'abakazi, ngasi muguma omugati, n'echichira ch'enyama n'amalehe g'omurhi g'omuzetuni. ⁴ Aherez'Abalawi omulimo gw'e Sanduku ya Nahano, bakazi shenga, n'oku kukuza n'okuharamya Nahano, Nyamuzinda w'e Israeli. ⁵ Baliri: Asafu, ye mukulu, Zakariya, amukulikira na Yazieli, Shemiramoti, na Yeiyeli, Matitiya, Eliabu, Benaya, Obedi-Edomu, na Yeiyeli. Baligwerhe ebintu by'okuziha ebinanda; Asafu wakazagi Shurha emijegerezo. ⁶ Abadahwa Benaya na Ahaziyeli babakazagi buha amaholere buzira kuhusa embere z'e Sanduku y'echiragane ya Nyamuzinda. ⁷ Olo lusiku Daudi ahereza Asafu na Bene babo emikolo y'okukuza Nahano obo bwalii burhanzi. ⁸ Mukuze Nahano, muharamy'ezino lyage! Mumenyes'ezindi mbaga ebijiro byage bikulu! ⁹ Muyimpe, muyimpe oku renge lyage! muderhe ebisomerene byage byoshi! ¹⁰ Muchishinge omu zino lyage lichesibwa! N'emirhima ya balala balonza Nahano eshagaluke! ¹¹ Muhabw'oburhabale na Nahano n'emisi yage, mulonze ngasi mango amalanga gage! ¹² Murhayibukir'ebijiro ajirire, n'ebisomerene n'emanja achire n'obunu bwage, ¹³ Mwabo lubaga lw'Abisraeli, mukozi age, Bene Yakobo, bishogwa bage! ¹⁴ Nahano ye Nyamuzinda werhu; Egulu lyoshi analichir'olubanja. ¹⁵ Muyibuk'echilagane chage ch'esiku n'amango, emyazi yage abaga alaganyize oku bibusi chihumbi, ¹⁶ Echilagane ajiraga haguma n'Abrahamu, n'oku chigasha emwa Isaka; ¹⁷ Ajirira Yakobo erhegeko nka mukangi, alaganana n'Aba Israeli echilagane ch'esiku n'amango, ¹⁸ Aderha: Njina kuherez'echihugo ch'e Kanana nk'akashambala kenyu n'abahereze. ¹⁹ Ago mango balichiri bageke bwenene, bageke bwenene, n'abahisi mw'echo chihugo, ²⁰ n'okugenda bukoo oku bundi n'obwami ewa chindi chihugo; ²¹ Aliko arhazigaga mp'omuntu yeshi yeshi abarhindibuze, n'enyanya zabo ahana abami: ²² Murhahumag'oku bambali bashigirwe, n'abalebi bani murhabajiraga kubi! ²³ Muyimpire Nahano, mweshi mulama omugulu! Muyalangaze ngasi lusiku obuchunguke bwage; ²⁴ Mubwire n'abantu boshi erenge lyage, omu mbaga zoshi ebisomerene byage! ²⁵ Bulala Nahano aba mukulu n'okwa shinganene okukuzwa, ye yubahwa kulusha banyamuzinda boshi; ²⁶ Bulala banyamuzinda boshi b'abantu ziba shushano, Na Nahano ajiraga empingu. ²⁷ Obukulu n'obulangashane biba embere zage, emisi n'obushagaluke biba haguma naye. ²⁸ Milala y'embaga, muhereze Nahano, muhereze Nahano erenge n'obukenge! ²⁹ Muhereze Nahano erenge oku zino lyage! Mumuherez'entulo n'okuyinja embere zage, mufukame embere za Nahano haguma n'abachesibwa bashigirwe! ³⁰ Mudirhimane embere zage, mweshi mulama oku gulu! Egulu liyimangire, lirhali lya dirhimana chiro. ³¹ Abali omuchanya basime, nenyu mw'omuli omugulu mushagaluke! Na boshi baderhe omu bukoo: Nahano yerhambwire! ³² Enyanja nene ekungule haguma n'ebibamo byoshi! N'oluchiga n'ebibamo byoshi bichidakire! ³³ N'emirhi y'enchiga eband'empundu z'obushagaluke embere za Nahano! Bulala ayinjire kuchir'egulu olubanja. ³⁴ Mukuze Nahano, bulala ali mwinja! Bulala obonjo bwage buba bw'esiku n'amango! ³⁵ Muderhe: Orhuchize, Nyamuzinda muchiza werhu, orhushubuze, n'oku rhukula omu charagati k'amashanja, mpu nji rhukuz'ezino lyawe lichesibwa nji rhuheb'erenge lyerhu omu kukuza! ³⁶ Ogashane Nahano, Nyamuzinda w'aba Israeli, esiku n'amango! n'olubaga loshi luderhe: Bibentyo! Rhukuze Nahano! ³⁷ Daudi alekaho, embere z'esanduku y'echilagane cha Nahano, Asafu na bene babo, mpu bakazijira ngasi mango omulimo embere z''esanduku, n'okujir'emilimo yabo ngasi lusiku. ³⁸ Baleka Obedi-Edomu na Hosa haguma na bene babo, baliri luganjo lwa makumi gali ndarhu na munane, Obedi-Edomu, mwene Yedutuni, na Hosa, nka balanzi b'enyunvi. ³⁹ Ahereza omudahwa Sadoki n'abandi badahwa, na bene babo, embere z'ehema lya Nahano, oku hantu hachere omu chihugo ch'e Gabaoni, ⁴⁰ Mpu bakazi hereza Nahano entulo z'esiku zoshi z'okusirezwa, esezi n'egolo, oku lurhamba lw'oku rheregekera, banahikiriza ebiyandikirwe omu marhegeko ga Nahano,Nahano yenine wabirhegekaga oku Israeli. ⁴¹ Omubo mwaliri Hemani na Yedutuni, n'abandi balondolwaga kukulikira n'amazino gabo mpu bakazi kuza Nahano. Bulala ebisomerene byage biba by'esiku zoshi. ⁴² Omubo mwaliri Hemani na Yedutuni, haguma n'amaholere n'emijegerezo kubalala bakazaga kubiziha, na haguma n'ebikoleso by'enyimpo z'okukuza Nyamuzinda. Bene Yedutuni babaliherhe omulimo gw'okulanga enyunvi. ⁴³ Abantu boshi bagendaga ngasi muntu aja emwage, na Daudi ashubir'emwage kugisha enju yage.