¹ Daudi achiyumbakira enju omu chishagala cha Daudi; arheganya ah'e Sanduku ya Nyamuzinda ya kazibera, yi yumbakira ehema ² Lero Daudi aderha mpu: E' Sanduku ya Nyamuzinda erha kwanene okuhekwa n'abarhali Balawi, bulala Nahano achishogere bo babakazagi heka e'Sanduku ya Nyamuzinda n'oku kazimujirir'emirmo esiku zoshi. ³ Na Daudi ashimanya Aba Israeli boshi e Yerusalemu mpu balerh'eyo Sanduku ya Nahano aha yi yumbakiraga. ⁴ Daudi ashimanyanya bene Haruni n'Abalawi: ⁵ bene Kehati, bene Urieli omukulu na bene babo, egana na makumyabiri; ⁶ Bene Merari, Asaya omukulu na bene babo, magana mabiri na makumyabiri; ⁷ Bene Gerishomu, Yoeli omukulu na bene babo, egana na makumi masharhu; ⁸ Bene Elizafani, Shemaya omukulu na bene babo, magana mabiri; ⁹ Bene Heburoni, Eliyeli omukulu na bene babo, makumi gali munane; ¹⁰ bene Uzieli, Aminadabu omukulu na bene babo, egana n'ekumi na babiri. ¹¹ Daudi ahamagala abadahwa Sadoki n'Abiatari, n'Abalawi Urieli, Asaya, Yoweli, Shemaya, Eliyeli, na Aminadabu. ¹² Ababwira mpu: Mwe bakulu b'omulala gw'Abalawi; muchishukulule, Mushukule na bene benyu, mulerhe e'Sanduku y'echiragane ya Nahano, Nyamuzinda w'Aba Israeli muyirhabike ahantu nayiyumbakiraga. ¹³ Bulala burhanzi rhurhali riho, Nahano, Nyamuzinda werhu, arhushurhaga; Bulala rhurhamulonzaga nk'oku erhegeko liderhere. ¹⁴ Abadahwa n'Abalawi bachishukula mpu yi baheka eyo Sanduku y'echiragane ya Nahano, Nyamuzinda w'Aba Israeli. ¹⁵ Bene Abalawi balirhwir'e Sanduku ya Nyamuzinda oku milambaliko oku birhugo byaho, nk'oku Musa arhegekaga kukulikira omwazi gwa Nahano. ¹⁶ Na Daudi abwira abakulu b'Abalawi mpu barheganye bene babo balala bakwanene okuyimpa n'ebintu by'enyimpo, enanga, n'emijegero, n'ebinanda, mpu babizihe n'omulenge g'okuyunvikana bwenene gumenyese oku bashalukire. ¹⁷ Aba Lawi baliherhe Hemani, mwene Yoweli; omu bene babo, Asafu, mwene Berekia; n'omu bene Merari, bene babo, Etani, mwene Kushaya; ¹⁸ na ntyo haguma nabo na bene babo babakulikira oku rhegeko lya kabiri Zakariya, Beni, Yaazieli, Shemiramoti, Yehiyeli, Uni, Eliabu, Beneya, Maseya, Matitiya, Elifele na Mikenaya, na Obedi-Edomu na Yehiyeli, n'abalanzi b'enyunvi. ¹⁹ Abimpizi Hemani, Asafu na Etani Ba bakazagi jegereza emijegero y'ebyuma, mpu y'eyunvikana. ²⁰ Zakariya, Aziyeli, Shemiramoti, Yehiyeli, Uni, Eliyabu, Maseya na Benaya ba bakazagi ziha enanga n'omulenge gw'enyanya; ²¹ Na Matitiya, Elifele, Mikenaya, Obedi-Edomu, Yeiyeli na Azaziya, Ba baligwerhe enanga z'ankoba munane, omu kuyimpiza enyimpo. ²² Kenaniya, omukulu w'enyimpo omu Balawi, chirongozi w'enyimpo, bulala Aligalireko. ²³ Berekiya na Elkana baliri bakuhek'e Sanduku. ²⁴ Shebaniya, Yosafati, Netanaeli, Amasayi, Zakariya, Benaya na Eliezeri, abadahwa, bakazaga banda omu mishekera embere z'e Sanduku ya Nyamuzinda. Obedi-Edomu na Yeshiya baliri balanzi b'e Sanduku. ²⁵ Daudi, n'abashamuka b'e Israeli, n'ebilongozi by'engabo bagenda kukula e Sanduku y'echiragane ya Nahano omu mwa Obedi-Edomu, ago mango balishagalukire. ²⁶ Bahana enterekero ya mpanzi mushanvu na ngandabuzi mushanvu bulala Nyamuzinda Alirhabere Abalawi baliherhe e Sanduku ya Nahano. ²⁷ Daudi aliyambere echishuli chilukirwe n'echitani chinja; n'Abalawi bakazagi heka eyo Sanduku nabo ntyo kubakazagi yambala n'abimpiza, na Kenaniya, omukulu w'enyimpo omu bimpiza; na Daudi akazagi yambala omwambalo gw'efodi y'oboya. ²⁸ Aba Israeli boshi bayinja bagwerhe e'Sanduku y'echiragane ya Nahano haguma n'emilenge y'obushagaluke, omulenge gw'orhurumbeti, n'amaholere N'ebinanda n'okujegerera, n'enanga. ²⁹ Nk'okw'e Sanduku y'echiragane ya Nahano yabere ehika omu chishagala cha Daudi, Mikali mwali wa Saulo, alolera omu Kabonero, alangira mwami Daudi Yashabira n'oku noga n'amazina, amugayiriza Emurhima.