¹ Lolaga abajaga hofi na Daudi Zikilagi, amango aliyakire, Saulo mwene Kishi. Baliri omu ngabo z'entwali bakazagi genda naye oku ntambala. ² Ezo ngabo zaliherh'emiherho n'emizareti, eri babaga balasha n'amabale g'omu muzareti banahuma amalyo n'amalembe kubanakazagi fol'emyambi omu muherho: Bali b'omu mulala gwa Benjamina, luganjo lwa bene babo Saulo. ³ Chilongozi Akiyezeri na Yoasi bene Shemaya, w'e Gibeya; Ezo nfola miherho zezi : Yeziyeli, na Peleti, bene Azmaveti; Beraka; Yehu, w'e Anatoti; ⁴ Yishimaya, w'e Gabaoni, ntwali w'omu makumi masharhu; Yeremiya, Yahazieli, Yehanani, Yozabadi; b'e Gedera; ⁵ Eluzayi, Yerimoti, Beyaliya, Shemariya; Shefatiya w'e Harofu; ⁶ Elikana, Yishiya, Azareli, Yowezeri, Yashobeamu, b'omu mulala gwa Kora; ⁷ Yoweli na Zebadiya, bene Yeroamu, w'e Gedori. ⁸ Bene Gadi barhenga mw'entwali z'enfola miherho, zaja emunda Daudi aliyakire Saulo omu lubanda l'omu mpinga, bali balume baliyinji chik'empenzi n'okulwa n'amachumu, baligwerhe emisi nka ntale, n'okulangabuka nka vumbiri z'omu ntondo. ⁹ Ezeri, mukulu; Obadiya, wakabiri; Eliyabu, wagasharhu; ¹⁰ Misimana, wa kane, Yeremiya, wa karhano; ¹¹ Atayi, wa ndarhu; Elieli, wa mushanvu, ¹² Yohana wa munane,Elizabadi wa mwenda; ¹³ Yeremiya, w'ekumi; Makibanayi, w'e kumi na muguma. ¹⁴ Bene Gadi ba baliri bilongozi by'Enfola miherho; muguma, oli mudorho wabo, alikwanene arhere nfola miherho egana, n'omulu wabo analwisa chihumbi. ¹⁵ Lolaga balala bashabukag'olwinji lw'e Yorodani omu mwezi gwa burhanzi, amango loshi lushabuk'ebishabuko byalo, n'oku higa abantu baliri omu mbanda, eshiriza n'erindi. ¹⁶ Haliri bene Benjamina na bene Yuda bajaga emunda Daudi aliyakire. ¹⁷ Daudi abashegerera, ababwira mpu: Akaba muyinjire n'omurhima g'okuntabala mbayegerezeze, aliko akaba mwazi mulingwarhako mpu yimumpereza abashombanyi, ntashwiraga jira kubi, na Nyamuzinda wa barha yenine abibwene n'oku bachirh'olubanja. ¹⁸ Amasayi, muguma wa bakulu b'enfola miherho, aliyunjwire Muka ochere, n'oku derha: Rhuli bawe, Daudi, na haguma nawe, mwene Yese! Murhula, murhula emwawa, na murhula oku bakurhabala, bulala Nyamuzinda wawe akurhabere! Na Daudi abayankirira, n'oku barhabika haguma n'abakulu b'echigusho. ¹⁹ Abantu b'omu mulala gwa Manase baj'omu ngabo za Daudi, amango alwisaga Abafilistini eri baji lwisa mwami Saulo. Aliko eyo ngabo ya Daudi erhalwaga buno abafilistini bali bamaja omu hano; bulala, enyuma bagenda kuyunvikana, abarhambo b'abafilistini barhumira Daudi, baderha mpu : Hano rhukozana ayinji rhuhindamuka arhabale na wabo Saulo, abone bamarhumala. ²⁰ Amango agaluka Zikilagi, lolaga ab'emwa Manase bachishwekera kuye: Adinaki, Yozabadi, Yadiyaeli, Mikaeli, Yozabadi, Elihu na Ziletayi, Abo ba bali bilongozi by'engabo y'enfola miherho chihumbi chihumbi b'emwa Manase. ²¹ Balerhera Daudi oburhabale enyanya z'echigusho ch'Abahameleki bw'okusahur'ebintu, bulala boshi zaliri ntwali, babanaliri bakulu omu nfola miherho. ²² Na ngasi lusiku abantu bayinja embere za Daudi kumurhabala, kuhika ahabonerag'akampi kanene, nka kampi ka Nyamuzinda. ²³ Lolaga oluganjo lw'abantu b'enfola miherho enyanya w'entambala bajire emunda Daudi aliri e'Heburoni, mpu bamuhererz'obwami bwa Saulo, nk'oku Nahano abaga arhegekere. ²⁴ Bene Yuda, baliherhe empenzi n'amachumu, bihumbi ndarhu na magana munane, baliri nfola miherho enyanya w'entambala. ²⁵ Bene Simeoni, baliri bihumbi mushanvu n'egana, n'abo zali ntwali z'okulwa entambala. ²⁶ Bene Lawi, bihumbi bine na magana ndarhu; ²⁷ Na Yehoyada, muluzi wa Haruni, na haguma naye baliri bihumbi bisharhu na magana mushanvu; ²⁸ Sadoki, naye aliri musole w'entwali, ali gwerhe n'abashamuka makumyabiri na babiri b'omu mulala gwabo. ²⁹ Bene Benjamina, bene babo Saulo, bihumbi bisharhu; bulala kuhika na ntyo bantu banene baliyorhe bashinganyanya oku nju ya Saulo. ³⁰ Bene Efurahimu, baliri bihumbi makumyabiri na magana munane, ntwali z'abantu, bantu baligwerh'ezino, omu milala yabo. ³¹ Echichira ch'obukoo bwa Manase, baliri bihumbi ekumi na munane, ba bajirirwe okujiyimika mwami Daudi. ³² Bene Isakari, baligwerhe obwenge b'okumenya eby'aba Israeli bajira amango malebe, bakulu magana mabiri, na bene babo boshi baliri eshishi w'oburhegesi bwabo. ³³ Ab'omu mulala gwa Zabuloni, baliri bihumbi makumi marhano, bantu bakaja oku ntambala, na ntachilwano barhaliyinji kolesa, banali bakulwa na murhima muguma. ³⁴ Ab'omu mulala gwa Nafutali, baliri bakulu chihumbi chiguma, n'okuba n'ezindi nfola miherho bihumbi makumi masharhu na mushanvu, b'okulwa n'empenzi n'amachumu. ³⁵ Ab'omu mulala gwa Dani, baliri nfola miherho bihumbi makumyabiri na munane na magana ndarhu, bankaja oku ntambala. ³⁶ Ab'omu mulala gwa Asheri, baliri nfola miherho bihumbi makumi mane, balichirheganyiz'okuj'oku ntambala. ³⁷ Ab'omu mulala gwaliri eshiriza y'olwinji lw'e Yorodani, bali bene Rubeni, bene Gadi, n'abandi b'oku bukoo bwa Manase, baligwerhe ngasi bukoo bw'omuherho gw'entambala, bihumbi egana na makumyabiri. ³⁸ Aba bantu boshi, bantu ba ntambala, bachirhenganyiz'okulwa, bagera e'Heburoni na murhima muguma omu kuyimika Daudi abe mwami w'e Israeli. Abandi ba Israeli baliyorhere nabo boshi balilonzeze bayimike Daudi. ³⁹ Bajira siku esharhu eyo munda haguma na daudi, balya n'okunywa, bulala bene babo babarheganyag'ebiryo. ⁴⁰ Na chiro na balala balilamire hofi nabo kuhik'e Isakari, n'e Zabuloni, n'eNafutali, bakazi yinja bagwerh'ebiryo oku ba Punda, n'oku Ngamiya, n'oku farasi, n'oku nkavu, banalerh' eshano, n'amalehe g'emirhi eyumire n'emizabibu eyumire, edivayi, amavurha, n'empanzi n'ebibuzi oku bunene, bulala aba Israeli baliri omu lumogo bwenene.