¹ Abafilistini barhuma echigusho ch'enfola miherho e'Israeli, n'abantu b'e Israeli bahimwa balibira embere z'Abafilistini n'okufamo banene bwenene oku ntondo y'e Gilboa. ² Abafilistini bashimba mwami Saulo n'abagala, bayirha Yonatani, Abinadabu na Malikishwa, bagala ba Saulo. ³ Entambala yakaliha oku Saulo; emyambi yamugwarha n'oku mukoromesa. ⁴ Honaho Saulo abwira owali murhwazize amachumu: Orhole engorho yawe oyinfunde, n'okutula, mpu baleki yinji chivuga mpu banyirhire. Oyo muntu ayoboha bwenene alahira, bulala aligwarhirwe n'obuba. Na Saulo yenine arhola engorho yage, achikabul'omuyo. ⁵ Oyo waliheker'engorho za Saulo, aber'abona amafa, naye achikabul'omu ngorho yage, naye afa. ⁶ Ntyo Saulo afa n'abagala bage basharhu, n'enju yage yoshi yahwa mwako kashanji. ⁷ Aba Israeli boshi baliri omu lubanda, babona oku baliyakire na Saulo n'abagala bafire, babunga ebishagala byabo mpu nabo babunge. Na balifistini bagenda kubilamo. ⁸ Bwabere bwacha esezi, Abafilistini bajishokola Aba Israeli bafaga, Bashimana Saulo n'abagala basharhu bafire oku ntondo y'e Gilboya. ⁹ Babashokola, n'okuhek'erhwe lyage n'emiherho yage. Na ntyo bamenyes'eyo myazi minja omu chihugo choshi ch'Abafilistini n'oku bazimu boshi n'oku bantu. ¹⁰ Bahira emiherho ya Saulo omu nju ya nyamuzinda wabo, n'empanga yage balihanika omu nju ya Dagoni. ¹¹ Abantu b'e Yabesi y'e Galadi boshi babene bamenya oku ntyo kw'Abafilistini bajirire Saulo, ¹² entwali zoshi zaliri omu chishagala zayumuka, zagenda kujirhola omurhumba gwa Saulo n'eyabagala, bayiheka e Yabesi. Babahamba amavuha gabo omu daho ly'omurhi, e' Yabesi, bachishalisa siku mushanvu. ¹³ Saulo afa, bulala arhakengaga omwazi gwa Nahano, n'okukenga amarhegeko gage, na bulala adosag'ehano oku bazimu n'oku laguza. ¹⁴ Aleka okudosa Nahano; na ntyo Nahano amuyirhisa, n'obwami bwage abuha Daudi, mwene Yese.