¹ Chiro abere abumbula ekimenyeso chakali mushanvu, haba okusira omumpingu chigabi chesa. ² Nani nabona abo bamalayika mushanvu bayumanga embere za Nyamuzinda nabo bahabwa mpanda mushanvu. ³ Nowundi malayika ayinja ayumanga embere za kashasha, ogwerhe e chetezo che oro, ahabwa eshano nene yakachiro, mpu ayihebe haguma namahuno gaba gishwa boshi enyanya ya kashasha ke oro, kali emalanga mbere ge chirhi cho bwami. ⁴ Omusi gwela shano yakachiro, gwazamuka emalanga mbere ya Nyamuzinda, haguma namahuno gaba gishwa, kurhenga omu maboko ga malahika. ⁵ Noyo malayika arhola echo chetezo, achiyunjuza omuliro gomu kashasha, agu kweba omu chihugo, haba enkuba n'emilenge, n'omu baraganyo, n'omusisi omu chihugo. ⁶ Bala bamalayika mushanvu bagwerhe mpanda mushanvu, bachi rheganya omu kuzibanda mo. ⁷ Malayika woburhanzi abanda omu mpanda, haba nvula yolubula, n'omuliro byachiheba haguma neshagama, byakwebwa enyanya we chihugo, chiguma cha kasharhu che chihugo cwa sirera, nachiguma cha kasharhu che mirhi nacho cha sirera, nebyasi bibishi byagulumira byoshi. ⁸ Malayika wakabiri abanda omu mpanda, nekintu lwiganyo lomusozi guzibu zibu guli gwa kolera momuliro chakwebwa omu nyanja, chigabi chakasharhu che nyanja cha hinduka shagama. ⁹ Chafa chiguma cha kasharhu che bilemwa byomu nyanja bilamire, chiguma cha kasharhu chenkuge zabereka. ¹⁰ Malayika wakasharhu abanda omu mpanda, enyenyezi nzibu zibu yarhoga kurhenga omu mpingu, yali chanire nka tara, yarhoga nechigabi chakasharhu che nyinji cha rhoga, nenyanya we shoko za menji. ¹¹ Nezino lyeyo nyenyezi eyirikirwe bululu, chiguma chakasharhu cha menji cha lula, nabene omuntu banene bafa oku bululu bwago menji bulala bwa heberwe mobubi. ¹² Malayika wakane abanda omu mpanda, chiguma cha kasharhu che zuba cha shurhwa, nachiguma chakasharhu cho mwezi, nachiguma cha kasharhu che nyenyezi, mpu yichiguma cha kasharhu chihinduka mwizimya; ezuba lirha kolaga chiguma cha kasharhu chalyo, n'obudufu ntyo ntyo. ¹³ Buzinda nabona, nayunva kihobera kiguma kya balala aha garhi garhi ke mpingu, cha derha oku mulenge gunene, buhanya, buhanya, buhanya bwabo aba yikere omu gulu enyanya we milenge esigere zaba malayika basharhu baki rheganyize oku shurha empanda.