¹ Hayinja muguma mubalala ba malayika mushanvu, ogwerhe zilala ndaha mushanvu aganira haguma nani, aderha, yinja enomunda, nakuyereka obulibuze bolala mumaguza mukulu oyikere oku nyanja. ² Olala abami begulu bajirire obumaguza naye, nabalala balamire omugulu banywere noku laluka obumaguza bwage. ³ Ampeka mu muka kugera omu rungu, nabona omukazi, ayikere enyanya zekinyalubala kidukwire bwenene, ayunjulirene amazino goku gayaguza. Agwerhe marhwe mushanvu namahembi e kumi. ⁴ Oyo mukazi aliyambere emyenda yakachiro, e dukwire, ayambisizwe e oro, n'enigi, n'ebisikiyo. Yewe aligwerhe e gopo lye oro omu maboko gage, lyali liyunjwire obugayise, amabi n'obumaguza. ⁵ Omu malanga gage hali hali ezino liyandikirwe ntya, okuhwe, Babylone mukulu, nyina webemaguza na byoshi bigayiswa biba omu gulu. ⁶ Nabona oyo mukazi alaluka oku shagama yabachesibwa, n'oku shagama yabahamiriza ba Yesu. Nani nabere namubona, nasomerwa bwenene. ⁷ Aliko oyola malayika ambwira, kirhumire wasomerwa? Nakubwira ehwe lyoyula mukazi, haguma nekila kinyalubala kimuhekere, ogwerhe marhwe mushanvu namahembi ekumi. ⁸ Ekyola kinyalubala wobwene kyana baga ho, kirhaka chibaho kili jubajuba kurhenga omu shinda nokuja omu malibuko. Nabalala balamire omugulu, balala amazino gabo garha yandikirwe omu kitabu chobu gumama kurhangirira balama e gulu, njo basomerwa babona ekyola kinyalubala, oku kyaliri ho, kirhachibaho, aliko njo kyashibi baho. ⁹ Ahola hahali obwenge n'obumenyi. Nagola marhwe mushanvu yomisozi mushanvu oyo mukazi ayikere ko. ¹⁰ Nayo bali bami mushanvu. Barhano bamalire kuhera, muguma aliho, nowundi arhaza kuyinja; naye hano ayinja, bimuhunire alame bichanji bigeke. ¹¹ Kila kinyalubala kibaho eyi kirhanaliho, yewe yiwa munane omu bami; aliko eyali muguma mubalala mushanvu, oyola yegenderera kujirisa amabi. ¹² Nagola mahembi ekumi wabwene, bali bami ekumi, barha shwiraga kubona obwami, aliko bahabirwe obushobozi nka bami kasanzi ka sanguma haguma nechola kinyalubala. ¹³ Abala bajira hano liguma, bobaha kilala kinyalubala e misi n'obushobozi. ¹⁴ Abala njo bajira entambala haguma n'omwana wentama, n'omwana wentama njo abahima, bulala yewe ali Nahano mukulu waba nahano, mwami wa bami, nabola bali haguma naye, babola boba hamagerwe, bishogwa, bashinganyanya. ¹⁵ Buzinda ambwira, galala menji wabonaga, galala ola mumaguza ali yikere ko, guli mulala n'omushiganano, n'endimi golubaga . ¹⁶ Gala mahembi ekumi wabonaga, nekyola kinya lubala, abola benjo bagaya oyo mumaguza, njo bamujira busha, arhana yambere, njo balya enyama yage, njobana musireza bwenene oku muliro. ¹⁷ Bulala Nyamuzinda amuhebere omu maboko gabo omu kujira e hano lyage, n'okujira e hano haguma, n'okuha echola chinya lubala obwami bwabo, nekinwa kya Nyamuzinda kiyenera. ¹⁸ Noyola mukazi wabonaga, kili kihugo kinene, chigwerhe obwami enyanya zabami begulu.