¹ Buzinda nalola, nabona, oyola mwana wentama eya yumangire oku musozi gwe Sayuni. Haguma naye bantu bihumbi egana namakumi mane nabine, bagwerhe elyola zino lyage ne lyeshe liyandikirwe omu malanga gabo. ² Nani nayunva omulenge kurhengera empingu nka mulenge gwa menji ganene nanka mulenge gwe nkuba enene. Nogola mulenge nayunvirhe gwali guli nka mulenge gwabaziha ekidari, bali baziha ebidari byabo. ³ Nokuyimpa olwimpo luhyahya emalanga mbere yekyola kichumbi kihyahya, n'emalanga mbere yabola balamire bane, nemalanga mbere yabalala bashamuka, ntaye nomuguma wakamenya kukiyigiriza olola lwimpo harhali balala kihumbi egana namakumi mane na bine, balala bagulwaga omu gulu. ⁴ Abala bobarha rholaga bakazi, bulala bali balamba. Abala bobalala bakulikira omwana wentama nkasi hoshi aja, abala bagulirwe ahakagarhi kabene omuntu, luburho lurhanzi lwemwa Nyamuzinda n'oku mwana wentama. ⁵ Nomu bunu bwabo harha bonekanaga ekinwa kyobu beshi, bulala nta bubi bagwerhe. ⁶ Buzinda nabona owundi malayika, abalala omu mpingu eya gwerhe enyigirizo ze myaka n'emyaka ayigirize abola balamire omugulu, na nkasi lubaga, n'omu lala, n'obuko. ⁷ Aderha oku mulenge gunene, mukenge Nyamuzinda, n'oku muharamya, bulala akasanzi kage kokuchirwa olubanja kali hofi. Muharamye olala wahebaga he mpingu negulu, nenyanja, ne shoko za menji. ⁸ Aha buzinda habonekana owundi, malayika wakabiri, akulikira, aderha, wahenere, Babylone wahenere, kihugo kinene, bulala wowa nywesaga olubaga loshi amavu gobuhanya, gobumaguza bwage. ⁹ Nowundi, malayika wakasharhu, amukulikira, aderha oku mulenge gunene, nta muntu yeshi yeshi oharamyage echola kinya lubala, neki shushanyo chacho, n'oku yankirira ekimenyeso chacho oku malanga chango oku kuboko kwage. ¹⁰ Oyola naye njo anywa ebinywebwa byobuhanya Nyamuzinda akolere, birha changirwe mwa menji omu ngumbu yoburhe bwage, naye ana libuzwa oku muliro gwe kibereti nemalanga mbere ga malayika muchesibwa, nemalanga mbere gomwana we ntama. ¹¹ Nomusi gwamalumwa gwabo, gwazamuka emyaka neyindi, chiro barha kaba n'obusime ezuba n'obudufu, balala baharamya ekyola kinya lubala n'ekishushanyo chacho, nankasi yeshi oyankirira ekimenyeso chelyo zino lyacho. ¹² Ahola hohali okulembera kwaba chesibwa, balala bafarha amarhegeko ga Nyamuzinda n'obwemere bwa Yesu. ¹³ Nayunva omulenge kurhengera empingu gwa derha, yandika, ragi lyabafu bafa omu kagarhi kanahano kurhengera zene. Nechi, muka yebi derhere, bagale kuluhuka enyuma yemiluho yabo, bulala ebijiro byabo biba kulikire. ¹⁴ Buzinda nalola, nabona, ekichu chomweru, namwechola kichu hali mu muguma oyikere mo, lwiganyo lomuntu, agwerhe ekishema kye oro oku rhwe lyage, n'oku kuboko kwage akeri kahyazizwe. ¹⁵ Hayinja owundi malayika arhengerera omu kanyamuzinda, eya herhe alaka oku mulenge gunene, yewe yayikere enyanya wechola kichu, heba hakeri kawe, oshalule, bulala akasanzi koku shalula kahikire, bulala ebishalulo byomu mashwa byama yera. ¹⁶ Nolala oyikere enyanya zekichu arhola akeri kage aka kabula oku gulu, ekihugo cha shalulwa. ¹⁷ Buzinda owundi malayika arhengera omu kanyamuzinda kali eyo munda empingu, naye agwerhe akeri kakalihire. ¹⁸ Owundi malayika arhengerera oku kashasha, oyola agwerhe obuhashe enyanya zomuliro, naye alaja oku mulenge gunene goyola ogwerhe engorho ekalihire, aderha, heba engorho yawe ekalihire, oshalule emburho zomuzabibu zomu chihugo, bulala emburho zage zahirukire. ¹⁹ Oyola malayika akabula akeri kage omu gulu, ashalula emburho zomuzabibu gwegulu, ezola mburho aziheba omu nguli nene yobulibuze bwa Nyamuzinda . ²⁰ Eyo nguli yalabarhwa embuga wechihugo, eshagama yasheshakala kurhenga mweyola nguli kugera ahe farasi ziyumanga, lwali nka lugenzi lwa ntambu kihumbi magana ekumi ndarhu.