¹ Buzinda nabona owundi malayika wemisi, ayandagala kurhenga empingu, ayambere ekichu, n'omungere gwe nvula enyanya zerhwe lyage, namasu gage galiri nka zuba, namagulu gage yaliri nka nkingi yomuliro. ² Omu kuboko kwage mwali ekitabu kibu mbwirwe. Aheba okugulu kwage kwe kulyo enyanya we nyanja, nokwe kulembe enyanya ze gulu. ³ Naye alaka oku mulenge gunene, gugwerhe olwamo nka mulenge gwe ntale, abere alaka, eyo milenge mushanvu yabanda endulu. ⁴ Mpanda mishanvu yabere ezamula emilenge yazo, naliri juba oku yandika. Nayunva omulenge kurhenga empingu gwa derha, ohebe ekimenyeso kwe yila myazi yama derhwa yeyi milenge mushanvu, orha yiyandikaga. ⁵ Noyu malayika nabonaga, ayimangire enyanya we nyanja nenyanya wegulu, azamula okuboko kwage kwe kulyo, kwa yerekeza empingu. ⁶ Ajira endahiro enyanya zolamire emyaka n'emyaka, oyu walemaga empingu n'ebintu byoshi bilimo, n'egulu nebintu byoshi bilimo, nenyanja nebintu byoshi bilimo, oku harhakaba akasanzi enyuma wakala. ⁷ Akaba arhali omusiku zemilenge yaba malayika mushanvu njo zabaho omu kubanda empanda, ahola lyehwe lya Nyamuzinda lyolya kolekwa, nka kulala ayigirizaga abakozi bage babalebi. ⁸ Nomulenge nayunvaga gwa rhenga empingu gwashubi derha nani, gwa derha, mpo gende oje rhola kila kitabu cha shwekulwaga omu kuboko kola malayika, oyimangire enyanya wenyanja n'egulu. ⁹ Nashimba oyo malayika namu bwira okwampe kila kitabu kigeke, ambwira, rhola okilye nacho chaba chilulire omunda yawe saliko omu bunu bwawe chaba chinunire nka buki. ¹⁰ Narhola echo chitabu chigeke omu maboko goyo malayika, na kilya, nacho chaba nka buki omu bunu bwani, nabere namala ku chilya, omunda yani chaba bululu. ¹¹ Bambwira, bikushinganene okushuba kuhana obulebi enyanya zabantu, olubaga, olu limi, nabami banene.