¹ Babuwa mono ko enjeka belendela ba ko kuweya – bo, babuwa ko imetcha belendela ba kotula bo ango ba buwa kota n’nkati ya tchese tchino mawe maa metulekeleke mo ko tulameya mo, bondiya noo-i Mokolo Mokonga wino. ² Litesai sabato wane na kota lilitesi mo boikaneo yane ya phenena ; nooi Mokolo. ³ A ika m’mba ba litesa ba angile bane, batchunga kota liti wane na koiyanesa mo. ⁴ No ko okesea – i bane m’mbuwa mo n’nyanga yande, n’seke yo ko omoleyai bane meleli, na tote ta maba to ko esai touma ta to. ⁵ Mo kakolo kolo ka n’nyanga boomunea – i ngano bena n’nyanga ya ko konyowa melekeyo, na ko konyowa melekeyo bena n’nyangaya koleka touma. Bo kowai mokati ino na ko ikata, bootchumani bosaali n’nkati ya okese tchino. ⁶ No ko isai bii n’nkati ya tchese, ke boolami buwa ko ika na betulungi ba moto. Nootoesai n’nyama ya lola lola (ya beya – beya). Mopanga itokoela andé mo tchese tchino. ⁷ . Boobengai baa beseke bane, bo si abo bookeyai boso wa mopanga ino. ⁸ Batango bino boobengai miya, miya woobengai tchefu ikomi yabo, bo si abo bookeyai boso wa mopanga ino. ⁹ Noo noobakami mino, no ko esai bane iboti na ko bulesa bane, nookpatolesai bane mo iyakano yane. ¹⁰ Ambe biki naanga beya ba konyowanga bane boso, yo koengami nino kota ngano owa wesiye kaowa mo kosiya asima ya kota ngano mophiya. ¹¹ Noo nootai boikaneyo yane akati wino, na motema yane yiyoota ande bowa kowa kino. ¹² Noo tchumani akati wino, nokoikai Mokonga wino, ke bane bo ko ikai okita yane. ¹³ Nooi Mokolo Mokonga wino netoese bane n’nkati ya motanga Bamisri ambe biteikangi kae bakobe babo ; nemune munei katé kamoesanga bane obaba, mendesa bane ambe metchwe ino yeimane kiyo. ¹⁴ N’ndi m’mba bite m’ngbe noo ango kambu na ko litesa ba angile si bano boose, 5 ba lingowa salia (liti) wane, ba m’mbola n’kesa yane kpaaya na ko muna iyakano yane mo koeka ko ondeya ba angile bane boose, ¹⁶ . boobo kae noo nooteleya kai bane boobo. Noomoesi bane maobi na bowa, kololesa m’mbele na beeta bekaseya maiso mino na kolelesa metema. Boolekai touma tino uke ; baa beseke bane – i bekaanga to. ¹⁷ No ko m’mboleyai bane moongo mo ko beya, bekalubekai na baa beseke bane ; bekaikai kiyo nino, no bekayai obeyo buwa ko ondeseleka na moto. ¹⁸ N’ndi, ango maamo, bite kam’gbi bino noo, ekaesai bane azabu mara motchomoendi ko longeya kobeya kino. ¹⁹ Neka-tungesai omuli ya tchekamba tchino, neka-timbolai obowa ino kotalala m’mba tchuma, na n’seke ino m’mba kateo. ²⁰ Tchekamba tchino tchoosela – selai mo tchitchiti, nseke ino ito koomola andé belekeo bande (meleli yandé), na tote ta nseke ino ito o bota andé touma tato. ²¹ A ika m’mba baphelana nane na ko eteka ko m’mgba noo, no ko esa bane azabu mala motchomoendi iboka ko opessana na ko beya kino. ²² No o tomai mo ko esesa bane n’nyama ya maba, eya yekabakeya bane bana bino, eya yekaseya besenge bino, na eya ye ka angolesa beeteyo bino mo kakolokolo ; na m’mboka ino yeka kambai baetei (ye kalingamai). ²³ A ika m’mba bite timboke ko mano makomeyake bane na a ika m’mba biki naphelama nane, ²⁴ no ophelama kai nio na noolubeyai bane mala motchomoendi ko longeya (ko beya kino, makosa mino). ²⁵ No ko iseai bane bekenge ba ko esesa, beya bekauneya iyakano yane yekambe koakoleka nino ; aabowa ekasongana bane ko metanga ino, neka iseyai bane oso (tcheeta) akati wino, bena bo ko abelekai ko maako ma baa beseke bane. ²⁶ Aabowa nootoesa moleli kowa kino, bamokali ikomi bootekai moleli ino mo tcheseya tchemo, bena boobaanyai yo n’nkati wino moongo mongo, bo kowai, na bito ko ikota bino ango kambu. ²⁷ A ika m’mba ango boobo, bite kam’mgbi bino noo ango kambu, na m’mba bephelane nane, ²⁸ Noo kaé noophelani nino na obaba na no ko azibowai bane male motchomoendi ko longeya makosa mino. ²⁹ Bo ko angai menuku ya bana bino baome, bo ko angai menuku ya bana bamokali bino. ³⁰ Nooseyai beikaneyo bino ba kiyo, bena noomuna muna litale a ubani, no ko m’mbolai belio bino kiyo na belio ba belendela bino, bondiya noobeyai ko metama ino. ³¹ Metanga ino nootimbolai yo makindo, nooseyai beikaneyo bino baphenena, bena n’tokomgba kae isengi ya n’nembu ino ya tondena. ³² Nooi nooseya tchese si etcho, eke baa besekane nino bokulai ko tchumana ko ke bamwaala. ³³ Bane, noobalanganesai bane mo bese. No ko omoleyai bane apanda, mo kata tchese tchino tchaike olele na motanga ino kotola. Okita opheme ino yo ko ika bokindo. ³⁴ Aowo-i tchese tcheya tchoo kombola sabato wandé n’nkati ya n’su si eeyo yoose ya ko tchitchaneka katcho, ambe bane n’kati ya tchese tcha baabeseke bane ; aowo i o ko omona tchese si, na ko sumbokeya yanga wandé. ³⁵ Tchese si tcho ko omonai n’nyanga yoose ya ko ekeleka ka tcho, bondiya tchita omonanga andé mo yengai wino aabowa a ikanga bane mo tchese si. ³⁶ Eke baa boophana kota ko beya akati wino, nootai bo bowa metema yabo, mo ko tchumana kabe ko motanga ya baa besekane nabo, bo o bengelekai na moyowa ya kaani ka kamena, bo kiyai obeyo m’mba ko eleya apanda obeyo, eke bo bookeyai buwa ko bengeleka na moto. ³⁷ Bookelesana bemine mo bemine m’mba baa bika boso wa apanda, na abuwa andé na owa wo ko isa bo obeyo ! Bane bitoo ko kola bino ko imanesana boso wa baa beseke bane. 38 Booseyamai n’nkati ya bato metanga ya baa beseke bane eke boomina minai bane. ³⁹ Baa boopheka akati wino, bo otchotchanekai kpaaya n’nkati ya motanga ya baa beseke bo mo isina ya ko ebeya kabo ; bo ofeleyai bo mo isina ya ko beya ka ba ise babo kae, na kowa kabo kae. ⁴⁰ Bo okalanganyai ko beya kabo na kowa ka ba ise babo, ko beya si kowa beteleye noo mo n’tala yabo, n’nsi mbe mo ko phelana nane. ⁴¹ Noo kae nophelanai nabo, no koisai bo ko motanga ya baa beseke bo. Eke metema yabo ya bonjulé yooseyamai, boobo kae bo okalanganyai ko beya kabo. ⁴² No ko endjeleyai iyakano yane na Yakobo, na iyakano yane na Isaka, na iyakano yane na Abalayama, no ko endjleyai tchese si etcho. ⁴³ Tchese maili ya ko ekeleka nabo, tchoosumbokeyai sabato (yenga) aawo ambe tchaekelekake, maili yo kotoka kabo. N’ndi bo eengami nabo ko kalanganya ko beya kabo, bondiya ba m’mbolangai kpaaya nabo n’kasa baa angile bane. ⁴⁴ Bena buandé boobo lika : aabowa bo ko ika n’nkati ya motanga ya baa beseke bo, noo n’nto ko ommbola ane ba n’toosekeleka ane nabo bena ango ko moesa bo maobi ango kambu bena ango ko muna angile wane, bondiya nooi Mokolo Mokonga nabo. ⁴⁵ Mo isina yabo noo koenyeleyai iyakano yete noo na ba ise babo na toesanga bo motchese tcha Misei, boso wa maiso ma bato ba tchese ambe neike Mokonga wabo, noo Mokolo. ⁴⁶ Aowo – i n’nkasa yane, saliya na angile beteleka na, n’nkati yande na bana ba Isalaele ko mokondi ya Sinaï, mo kaako ka Mose.