¹ Mokolo wa ebesa Mose ko mokondi ya Sinaï, wa ena nandé : ² "Ena na bana ba Isalaele, ebesa bo : Aabowa bo ko n’ngeya n’nkati ya motanga na esake bane, owa motanga yo ko omonai sabato mo liletesi ya Mokolo. ³ Mo bemo motoba wo oleki iba yabe, mo bemo motoba wobuki bekanga mo iba yabe ya mizabibu na ko konyowa belikeo babe. ⁴ N’ndi n’nkati ya tchemo tcha motchomoendi tchesi tcho ko ikai na sabato wa ko omona, sabato mo liletesi ya Mokolo : Uto oleka abe iba yabe bena uto obuka – abe bekanga ba iba yabe ya mizabibu, ⁵ Uto o konyowa abe meleli ya ko mena mo touma teya tekeye, bena uto o konyowa abe (m’mbo) touma ta mizabibu teya wito okenga bekanga si. Etcho ko koikai tchemo tcha ko omonesa tchese. ⁶ Oyo sabato omune wa tchese woolesai bane, owa, mokobe wabe, moto wabe wa mekambo, moto wa malipo, moeni wabe, ango kae baa betchumane kowa kabe. ⁷ Bena n’nyama yabe na n’nyama ya motanga yabe, bemeneo boose si beno ba tchese bo ko ikai meleli yabo. ⁸ Wa banda sabato motchomoendi ya bemo, bemo motchomoendi mala motchomoendi, yoi muda wa sabato motchomoendi wa bemo, baike bemo ‘nkama ina na aabowa. ⁹ Meeli ya motchomoendi, n’nsu ikomi, boolombesai looki ya m’mpalu (to lumbete) ; bosu ya Ikoli bo olombesai na m’mpalu n’nkati ya metanga yoose. ¹⁰ Tchemo tcha n’nkama itano bo olombesai tcho tcha ko lipheleka, na ko ebesa koika ka bii (kotoka mo bokobe) ka bato boose ba tchese. Tcheetcho kowa kino tcho ko ikai Yubilee : Kila omo wino wo osumbokai ko maba mande, kila omo wo osumbokai mo tchebanda tchandé. ¹¹ Tchemo si etcho tcha n’nkama itano kowakino tcho ko ikai tcha Yubilie ; bito oleka bino touma, bito okonyowa bino meleli ya komena yemine mo touma ta ko keya mo m’mboka, bena bito okonyowa bino bito okonyowa bino touma ta tote si teya bita langangati. ¹² Yubilee yo ko ika kowa kino tchesima tcheya tchelipheleke, bo ko angai beya bemene ko maba. ¹³ N’nkati ya tchemo si tcheno tcha Yubile, boo sumbokai kila moto ko maba. ¹⁴ M’mba wa oleseya munakabe tchesima ama wa owa tchesima kowa kandé, ba buwa ko kesesana bane mine ko bane mine ! ¹⁵ Bondiya bemo si beya bika baka – baka na Yubilee, beboi wekaowa ka munakabe ; we kaowa ka munakabe wo ko oleseyai owe na kaengeleyo ka ko banda bemo ba ko konyowa m’mba ba iyanake (m’mba ba engamake). ¹⁶ Ekaikai na bemo, isabu ya bemo si beya bepheme, aoowo i wekalinyesa oketi yandé, isabu ya bemo bika bango, aoowo – i we kaselelesa oketi, bondiya isabo fulani ya beya bekonyoke lika lika boi wa oleseyake owe. ¹⁷ Ango omo wino wabuwa ko kesa munakande, n’ndi ika na bowa ya Mokonga wabe, bondiya noo – i Mokolo Mokonga wino. ¹⁸ Litesai ba angile bane na liti wane, litesai bo mo ko onda bo, na boobo bo ko ikai na ko motanga si owo na bosali (na bii). ¹⁹ Tchese tcho obatai touma tandé, bo kowai na ko ikota, bena bo ko ikai ko na bii. ²⁰ M’mba ba ena :"To ko anga tchei n’nkati ya tchemo tcha motchomoendi ambe titeleke ango m’mba titete beya bekonyoleke bito ?" ²¹ Na isake kowa kino m’ngbengbele yane kowa kino tchemo tcha motoba, tchabote beya bo okonyoka bemo bisato. ²² Baleka touma tchemo tcha tchenana beengame ko anga kae meleli si eya ya ikanga boso bena tchemo tcha abowa ; bena aoowo booleleyai beya bo okonyoka mo tchemo si etcho baanga beya ba boso. ²³ Tchese tchite olekangi liti – liti, bondiya tchese tchiki tchane noo, be nino biki bani na baeti lika kowa kane. ²⁴ N’nkati ya n’seke yoose ika kowa kino moesai m’mboka ya ko engama koondesa yo (ko kombola yo, ko sumbola yo). ²⁵ A ika m’mba nanan’tchoko wa ika kauwe wa engama koolesa botuku ya n’seke yandé, nduku wa aiye – iye weengame na ko sumbola botuku si oowo ya olesake we. ²⁶ A ika m’mba moto wa ko engama ko sumbola witeike, m’mba we omune wa ko kola ko sumbola beeya – si, ²⁷ Weengamei ko banda bemo ba iyoli, mo ko sumboleya moto si owa wa owanga kowa kandé na ko lubeleya we bephe beeya kiyo kadiri ka bemo ba iyoli. ²⁸ M’mba witkokole kosumbola, botuku si owo ya n’seke ya olesekanga ya osiyai ko maako ma moowi bena mo tchemo tcha Yubile. N’nkati ya tchemo tcha Yubile aaow – i ootoka we na ko n’ngeya n’nkati ya beeya bandé. ²⁹ Moto wa olesa lumba ya ko lameya, ambe ika n’nkati ya motanga si owa yekombeke na totumba, wo ko akolekai kosumbola beeya n’nkati ya tchemo tchetondo. ³⁰ A ika m’mba wite sumbole mo tchemo si etcho tchetondo, aowo lumba si eyo ika n’nkati ya motanga si owo yekobeke na totumba yo ko iki beeya ba owa weowe yo na ya tchemo tcha Yubilee. ³¹ N’ndi malumba si maa mika ko metanga n’nyango n’nyango si eya yitekombeke na totumba, mo obandekai m’mba meikanga ko maba, mo ko akolekai mo ko sumbokeya ka moowi ya engama nandé kotoka n’nkati ya tchemo tcha Yubilee. ³² Mo metanga ya Balawi, malumba ma metanga si eyo yika beeya babo, bika na namuna wa ko sumbola beeya ba beoleke n’seke n’nyango yoose. ³³ Owa woose wo ko owa lumba ko Balawi, wekatokai mo yo, mo Yubilee wa lumba yeoleke bena ko motanga si owa yande bondiya malumba ma metanga ya Balawi mikai beeya babo n’nkati ya bana ba Isalaele, ³⁴ maba si maa mika n’nkati ya métanga ya Balawi mitekaoleseleki andé ango kambu ; bondiya mikai beeya babo ba ko kamba n’tungeo. ³⁵ A ika m’mba manatchoko wa ika kauwe, ambe pato wa kaako kandé wabuwa bakama nabe, weengami ko sunga we ; wata kae boobo ka moeni na owa wetchumane mo tchese tchino, ambe waike nino. ³⁶ Utoo tomba abe koakande faida buwa ango tchesima ango tchemo, tina Mokonga wabe, ke mana n'ndjoko waika asima amo na be. ³⁷ Uteengame abe na ko sombesa bo beeya babe mo koesa owe na faila, ke utoosombesa abe we mooteleya owe tchesima kiyo. ³⁸ Nini Mokolo, Mokonga wabe, owa we toese bane ko motanga ya Endjipito mo koesa bane motanga ya kanana mbele waike Mokonga wino. ³⁹ A ika m’mba manatchoko waika kauwe ambe asima amo nabe, eke waaba mobe yandé kowa kabe, wabuwa ko sulutesa we ango kambu mokambo ya bokobe. ⁴⁰ Wo ko ikai kowa kabe m’mba moemi wa beeya, m’mba moto wa mokambo, wootai mekambo kowa kabe bena tchemo tcha Yubilee. ⁴¹ Wootokai kowe kabe, we a bana bandé asima amo nandé, weka sumbokai mo tchebanda tchandé, we kasumbokai mo bo ikaneyo ya ba ise. ⁴² Bondiya biki bakobe bane, baa na toesanga bo (momolanga bo) ko motanga ya ba Egypito ; bitekaoleki andé ango kambu m’mba bowa bo ko olesanga bakobe. ⁴³ Uto ko imanea abe we (uto otawala abe we) n’nyanga ya buwa, na wekatinai Mokonga wabe. ⁴⁴ Ikai n’nkati si eya yekombe owei wekatomba mokombe wabe na moteki wa meleli yabe bekaikai babe, mo n’kita si we kaowai mokobe na moteki. ⁴⁵ Weengame kaé koowa kaé kowa kabo bana ba beeni babo baa beka tchumana kowa kabe, na mo bebanda babo ba botanga bo mo tchese tchino ; bekaikai beeya bino. ⁴⁶ Bekaekai bo (bekasiyai bo) mo botiko ko bana maili wino, m’mba beeya ; bekatai bo m’mba bakobe ba n’su yoose. N’nsi ko bana ba banina bino, bana ba Isalaele, ango omo wino wito otawala na n’nyanga ya ilela ka mana nina. ⁴⁷ A ika m’mba moeni omo, aika m’mba owa we tchumane kowa kabe wa ika iphoka, ambe mana ntchoko uka kauwe bakama nandé na ambe wo koolesa mobe yandé ka moeni owa weikaneye owe ama ka omo wa tchebanda tcha moeni, ⁴⁸ o ko ikai kowa kande haki, maili si wo koolesai omune mobe yandé : Omo wa bana banina wo o ko ombolai we. ⁴⁹ Muyomba wandé, ama mana muyomba wandé, ama omo wa aiye – iye abotelekeya, we engame na ko kombola – we, ama waika na asima ya ko omola beeye, we engame na ko kombola mob yandé omune. ⁵⁰ Wo obandai asima amo na owa weowe – we ko linga tchemo si tcheya tcheolese we omune bena mo tchemo tcha Yubilee ; na iyoli ya koowa yo ko ikai mo oketi ya bemo, eya yo onyeleka m’mba eya ya moeni wa beeya. ⁵¹ A ika m’mba bemo bebuwe, wo o lipai ikoli yandé mo m’mboka ya oketi ya bemo na bowa a olekanga – we ; ⁵² A ika m’mba bemo bango bena mo tchemo tcha Yubilee, wo o banda oketi ya ko komboleka kandé, we ka lipai ikoli mo oketi ya bemo. ⁵³ M’mba wa ikanga moto wa ko bunda mekambo mo ko lipeka tchemo mo tchemo we moeni wa beeya, na kowa ka owa wekaika kowa kandé we boobo ango kambu na koilela ko maiso mandé. ⁵⁴ M’mba witelipeye omune m’mbata yandé, wekamokai mo tchemo tcha Yubilee, we na bana bandé asima amo ; ⁵⁵ Bondiya kowa kane bana ba Isalaele bika bakobe ; bikai bakobe bane, baa na toesanga bo ko motanga ya Bamisri. Nikai Mokolo, Mokonga wino".