¹ Mokolo na ko ebesa Mose, wa ena nandé : ² "Kobola bana ba Isalaele ba luleye owe na makuta matondana ma mizeituni meenjekeleke mo isina ya ko teleka mo n’tala ambe yasane iboka na isengi isaali n’su yoose. ³ Aoowo boso wa balele ba asima ya boeneo ya maondi ma liti, n’nkati ya asima ya bosanganeo, aowo – i aaroni wekata ambe n’tala – si wate yo moo ambe yeakane na kosana na iyo m’mba looba boso na Mokota, nsu yoose. ⁴ Aaroni wekatangai n’tala si eeyo kiyo na mesa wafowa, boso na Mokolo, nsu yoose ; ⁵ Wa biya n’keke eya epholee bosaali weteke nayo mekati ikomi na ibe, kila mokati yaike matuku mabé ma eya ikomi ya matunda ma efa ; ⁶ Maili si ke wata melolo ibe ya mekati motoba ko mololo kiyo wa mesa waphowa wika boso wa Mokolo. ⁷ Kiyo wa kila mololo wata obali ya isengi. Oowo yo ko ikai moleli yo ko beleka mo metumanyo, moleli ya Mokolo. ⁸ Kila bosu ya sabato i yekatelekanga eyo mekati boso wa Mokolo. Bana ba Isalaele bekaisangai yo mo iyakano ya n’su yoose ; ⁹ Yo ko ikai ya Aaroni na bana bandé, beka angangai yo asima yelipheleke ( lumba ya Mokonga), mo isina mbe kowa kabo yo ko ikai tchesima tchelipheleke, lifungu ya lifaefi ya moleli ya kolekana ya koabe ya Mokolo. Eeno – i angile wa nsu yoose. ¹⁰ A ika m’mba mana amokali omo wa ba Isalaele n’ndi ise wa ikangi Momisri, wa omoka mo lumba yand, wala koika n’nkati ya bana ba Isalaele, wa seya na amoome omo na ba Isalaele mo motanga yabo. ¹¹ Aabono omo mana amokali si wa ba Isalaele wa senda na ko ayea lina Mokonga. Ba isa we ka Mose. Lina nina – i Shelomiti, moséka ya Dibri wa okita ya Dani. ¹² Wa kandeka moyololo ambe baebe wootelekai booni mo angile na Mokolo. ¹³ Mokolo wa ebesa Mose, na ko ena : ¹⁴ "Toesa – we ko motanga ono mosendi na moayei. Baa boose ba m’mgbanga we bootai maako mabo liyo na motchwe yande, maili si ibamba yoose ya bato boo lubeyai we mawe. ¹⁵ Maili owe wo ko ebesi bana ba Isalaele :"Moto woose si owa we koayea Mokonga wand woobiyai kobeya kandé makosa mandé. ¹⁶ Owa woosenda liina ya Mokolo wandé weengami ko kpa, ibamba yoose ya bato yoolubeyai – we mawe. Wa ikai moeni ango maana wa motanga (moboteki motanga), wookpai m’mba wasendesa liina si. ¹⁷ Moto wa iya moto ophe, wa ika nani, wookpai. ¹⁸ Owa woolubeya n’nyama mo ko iya yo : wo ko unanesai yo koika mo koika (uzima mo uzima). ¹⁹ Bena moto wa esa munakandé, wootelekai bowa atake – we ; ²⁰ Imune mo imune, liiso mo liiso, liinyo mo liinyo. Ko esa kandé obaba ka munakandé koi ko oteleka – kae we. ²¹ Owa wo ko iya n’nyama wo ko esi ephe, owa woolubeya moto weengami ko kpa. ²² Liataki yo ko ika emolika kowa kino, aika ka maana wa motanga ama ka moeni, bondiya nooi Mokolo Mokonga wino. ²³ Mose aabowa wemane ko ebesa bana ba Isalaele boobo, bo na ko toesa – we ko motanga yabo we si ooyo mosendi na moayei, ba lubeya – we mawe. Ba iyenesangai bowa Mokolo wa ebesanga Mose.