¹ Mokolo wa ena na Mose ena na Aarona mbe : ² "Ena na bana ba Isalaele eke enai na bo :"Amoome woose owa wika na sofisi, wikai mo ko beya. ³ Bondiya sofisi wande, wa ikake mo ko beya, mobe yande yo ko omola toina, ango ephe tito ko omokanga bande, wika mo ko beya. ⁴ Itanda yoose eeya yo ko lameya we ikai ko beya, ena boikaneyo yoose owa o ko ikaneya we, ikai ya beya. ⁵ Owa o ko bunda itanda yande we engamei na ko soola ntulu yande, wa owa motondo yande ko maale ena wo ko seyai mo ko beya eena n’nyanga ya iyo. ⁶ Owa wo ko ikaneya kakalanga si kaa ka ikaneanga moto si we engamei na ko soola ntulu yande, ena we kae wa owa motondo n’nkati ya maale,eke wo ko siyai mo ko beya ena n’nyanga ya iyo. ⁷ Owa o ko kukana nande, we engamei na ko soola ntulu yande, eke wa owa kae mo maale, wo ko siyai wa beya ina n’nyanga ya yo. ⁸ A ika m’mba wa tufeya mata ama wakesuwa tchegbele – gbele kiyo na moto, moto si we engamei na ko soola ntulu yande, eke we engame kai na ko owa motondo ko maale eke wo ko siyai wabeya ena n’nyanga ya iyo. ⁹ Kiyo na n’nyama yoose eeya wo ko ikai na ko beya. ¹⁰ Owa o ko banda tchesima tchoose tcheya tchabundanga moto wa suli ; tcho ko ika tchabeya ena n’nyanga ya iyo ; ena owa o ko bata tchoose tcheya tchabalanga we we engamei na ko soola ntulu yande, eke we engamei na ko owa motondo yande ko maale, wo ko seyai wabeya ena n’nyanga ya iyo. ¹¹ Owa woose o ko kukana na moto wa oso ya suli, eke a ika m’mba ute soole maako mande ko maale, wo ko soolai ntulu yande, eke wo mune wa owa kae n’nkati ya maale, eke wo ko siyai wa beya ena n’nyanga ya iyo. ¹² Tcheseya tchose tcha ibomba tcheya tchebundeke na moto na ko muneka muneka, na tcheongo tchoose tcha lobao, tcheengame na ko sooleka. ¹³ A ika m’mba toina si teya ta ikanga ko omoka ko mobe yande ta kamena, ama tatunga, we engamei na ko siya nsu motchomoendi ombe otangano na ko moesana na mobe yande, wo ko soolai ntulu yande, wo ko owai ko maale, eke we na ko engama bosaali. ¹⁴ Maili ya nsu tchenana, wo ko esa bayaosa babe na bana ba pijo (mongule) babe eke kose na kiyo, ko molango ya lumba ya masomboli eke wa esa yo ka moomoli wa mafaefi. ¹⁵ Moomoli wa mafaefi wo ko esai mafaefi si mo ko eye eya bondiya ko beya kowa katanga bo, eke eeya ephe lifaefi mokolekanesa n’nyama mo kaya ena kae moomoli wa mafaefi wo kota kai bondiya ya toina teya ta ikanga nande. ¹⁶ Amoome owa maale ma baome mo ko omoka memine, (Belome) we engamei na ko owa motondo ko maale, eke wo ko siya mo ko beya ena n’nyanga ya iyo. ¹⁷ Ntulu yoose, m’mba okoba (ya n’nyama) eya ebateke na moto wa oso ya yeengamei na ko sooleka ko maale, eke yo ko siyai mo ko beya ena n’nyanga ya iyo. ¹⁸ A ika m’mba amokali wa enda wa ika asima amo, na amoome owa wika na oso ya suli, bo babe beengamei na ko owa mobe otondo ko maale, eke wo ko siyai mo kobeya ena n’nyanga ya iyo. ¹⁹ Amokali woose owa wo ko mona tcheili (oso ya bamokali, n’ndi tcheili) we engamei na ko siya nsu motchomoendi, mbe webeye. Moto woose owa wo ko ika nande asima amo wika mo ko beya. ²⁰ Itanda yoose eeya yo ko lama we yo ko ika ya beya, ena kio na bo ikaneyo yoose yo ko ika ya beya. ²¹ Moto wooose owa wo ko bunda itanda ya moto si oyo wa suli we engamei na ko soola ntulu yande na ko owa mobe etondo eke wa siya mo ko beya eena n’nyanga ya iyo. ²² Moto woose owa wo ko banda tchesima tcha moto wa oso ya suli, we engame na ko soola ntulu yande, na koowa mobe otondo. ²³ A ika m’mba tchesima tcha ika kiyo na itanda, ango tcheya wa ikaneya tcho, wo ko soolai ntulu yande ena wa owa mobe otondo wo ko siyai mo ko beya ena n’nyanga ya iyo. ²⁴ A ika m’mba moto si wa enda na amokali, eke bololo yande ya kameya we, wo ko siyai mo ko beya, mo nsu motchomoendi ena mo itanda yoose eya yo ko lameya we yo ko siyai ya beya. ²⁵ Amokali si owa oka mona oso yabo ya bamokali, boso ya n’nyanga yande ya engama, eke oso si yailela nsu ya buwa, wo ko siya ko beya mo n’nyanga yoose eeya yo ko ika we na oso ya bamokali. ²⁶ Itanda yoose eya yo ko lameya we mo n’nyanga ya oso ya bamokali, yo ko ikai m’mba itanda yo ko lameanga we mo n’nyanga ya oso yande we mo n’nyanga ya oso yande ya meeli. ²⁷ Owa woose o ko kukana nayo o ko ikai na kobeya eke wa soole ntulu, wao wekae mobe otondo ko maale, wo ko ikai mo ko beya ena n’nyanga ya iyo. ²⁸ A ika m’mba amokali si wa fenena mo ko maneka ka tcheli tchande, wo ko bandai nsu motchomoendi eke wa fenena, wa ika bosaali. ²⁹ Maili ya nsu tchenana, wo ko omolai bayaosa babe na baana babe ba ndjiwa eke waya ko sileya moomoli wa mafaefi boso ya lumba ya masomboli. ³⁰ Moomoli wa mafaefi wo ko omolai emo m’mba sadaka ya ko eya – eya bondia mbe ko beya wa ko lekanesa n’nyama mo kaya, boso ya Mokolo, bondiya tcheli tcheya tcha iseyanga we ko beya. ³¹ Wa ekanesa bana ba Isalaele na bololo yabo, mbe bite gbangi bondiya bololo si a ika m’mba baseya bo ikaneyo yane owa ika n’nkati n’nkati ya bo. ³² Eyoi ika angile ya moto owa wika sofisi m’mba owa wa ikanga maale ma baome ma omoka nande mo n’nyanga ya ndjoli ango mo n’nyange eya mo ko omoka memine. ³³ Bondiya owa wo mone tcheili tchande tcha meeli, bondia amoome m’mba amokali owa wika na oso ya bamokali ena ka amoome owa wo ko eta asima amo na amokali owa wika mo ko beya.