¹ MLUME gwitawala, sii na iseelele, Bichiba biingi bibe saso. ² Matimba na mdo byamchunguluwa, Kiine na uonona noo mishingi gya iti yage. ³ Ahyaa asugolola hambele hage, Nao alihubachigya basusuchi bage ngubi chose. ⁴ Ahenyuhenyu age ulamyile ibaloo yose, Sii gimonine na gidandile. ⁵ Koono chisumbuluwile nahi bugudi umbele wa MLUME, Mbele gya Mlume gwa ibaloo yose. ⁶ Gulu lilihulisamba kiine gyage, Na batu bose bamone ugengeda wage. ⁷ Na badambe mme bose bene balihutambikila miishi, Balihulimona yulu ya bitu bishihuita atu; Gwenywe miishi gyose mumginamine Gee. ⁸ Sayuni gihuliche na uba na saso, Bawamisiha ba Yuda na baseelele, Wa yulu ya uonona obe, Ee MLUME. ⁹ Bululi Gogwe, MLUME, noo Uli hegulu, Hegulu abisa uhima sii gyose; Waginunywa uhima miishi gyose. ¹⁰ Benywe bene balihuunda MLUME, muonywe usona; Gusuusa bichuli-chuli byabo bya mwego m'bagulwa gwage, Na ubahogonona na uboo wa bene bashi na kiine. ¹¹ Lwenge lwamchunguluwa mine gwina kiine, Na saso u baya bali bagolobu mitima. ¹² Benywe bina kiine, mube na saso lya MLUME, Na ulitona china lyage lihaha.