¹ Gogwe, Mlume, Usili bushamo bwetu, Ibushi ndaa na ibushi. ² Hambele ha koono chishinabuswa, na ushinabumbu sii, Na utula milumbu namilumbu gogwe noo Abetcha. ³ Wamgiwicha mtu mmihwili, hosugana, Giwilwe, benywe batu. ⁴ Bululi myaa uki umeso mobe mnahi chuba lya mnakeshi lwahuhwa uhita, mnahi uyesha wa busugu. ⁵ Wabalugicha, ubanahi tuulo, Halwelo uba nahi byanyi byabisumena. ⁶ Halwelo bisunaga na umena, Igolo bisugedeya na uguma. ⁷ Bululi tusuhumiwa wa sungu chage, Na wa buhuchi bwage gwatuhugicha. ⁸ Wabiya usona wetu umbele obe, Lubisagulu lwetu mnda lwenge lya yenyi yobe. ⁹ Bululi masugu metu mose mahita mnda sungu chobe, Twahunyiwa myaa gyetu nahi uliima busungu. ¹⁰ Masugu ma myaa gyetu ii myaa maumi njwii, Nambo uba twina uoma ii myaa maumi inana; Na buhulihuli bwage ii asusu na uba bunene, Bwahita abilo na ugililila koo. ¹¹ Mnanyi guglidi uhima wa sungu chobe?Na buhushi bobe ilingye iuli yobe? ¹² Bino utumanye umabala masugu metu, Tulihe mtima gwa lwengu. ¹³ Ee MLUME, ugiwile, ata mengo nai? Ubamwene keene bagichi bobe. ¹⁴ Utugyushe halwelo wa yano yobe, Na beswe twiseelela na uba saso masugu metu mose. ¹⁵ Utugigye ulamana na masugu molitususule, Nahi giya myaa gyatumonine usona. ¹⁶ Bigilanywa byobe na bimoneye u bagichi bobe, Na bunyemu bobe u baana bobe. ¹⁷ Na ubenda wa Mlume, Abetcha etu, ube watuli, Na migilo gya maboo metu ugibiye na uoma, Ehe, migilo gya maboo metu ugiomenenye.