¹ Yano ya MLUME, niigimba milumbu; Wa anywa anyi nibimanya bibushi byoseuwilila obe. ² Bululi nadgana, Yano yigubawa milumbu; Mnda gulu wimonya uwilila obe. ³ Naita alago na msobolwa gwanyi, Namlahila Daudi mgichi gwanyi. ⁴ Babuswa bobe nibagimiya milumbu, Nigimiya iti yobe ya buoolo ata milumbu. ⁵ Ee MLUME, gulu lyitona bisaga byobe, Uwilila obe mnda sumbilo lya bahaha. ⁶ Bululi mnanyimnda gulu guna lingilishiwa na MLUME? Mnanyi gunahwanana na MLUME, mmanga gwa bamalaika? ⁷ Abetcha alihusinywa umagogo ma bahaha, Ii gwausinywa uhima bose bali bamchungulubu. ⁸ MLUME, Abetcha a bilume pambwa, Mnanyi guli na uoma nahi Gogwe, Ee YAHU? Na uwilila obe wauchunguluwa. ⁹ Gogwe noo usuhyilila buhulihuli bwa bahali. Mabimbi mage hamasuginyuwa Gogwe usumahocha. ¹⁰ Noo Gogwe umsachiche Lahabu gee uba nahi guhagilwe, Wa uboo wa uoma ubasambaleche bebe balihuonywa. ¹¹ Gulu ii butunga bobe, sii nagyo ii butunga bobe, Ibaloo na byose bili biigiluche Mgogwe ugimiile mshingi gwage. ¹² Kaskazini na Kusini mgogwe ubibumbile, Taboli na Helmoni balihuseelela china lyobe. ¹³ Uboo obe ii uboo uli na uosha, Uboo obe uli na uoma, Uboo obe wa ulume waginunywa. ¹⁴ Kiine na uonona noo mshingi gwa iti yobe, Tano na winene byagimana umbele wa yenyi yobe. ¹⁵ Luhanga lusoga wa batu baya baligidi lidi lya useelela, Ee MLUME, usugya mnda lwenge lwa yenyi yobe. ¹⁶ Wa china lyobe useelela chula lyose, Na wa kiine gyobe usuginunywa. ¹⁷ Bululi ubenda wa uoma obe ii Gogwe, Na wa ulitolelecha obe meega metu miginunywa. ¹⁸ Bululi ngabo gyeti gyina MLUME, Na oolo lyetu ii wage Mmaha gwa Isilaeli. ¹⁹ Noo holibasambile bahaha bobe umalo, Uganine, Nimmele guli na uoma mbwatilicho; Nimginune mine gusobolwe mmanga gwa batu. ²⁰ Nimmonine Daudi, mgichi gwanyi, Nimshininye mauta manyu mamahaha. ²¹ Gee mine uboo wanyi ubi ugimanyu weli, Na uboo wanyi wim'biya uoma. ²² Amangu ashimmonena, Ata mwana gwa usona gushi msususla. ²³ Bibyo nibaswaga basusuchi bage u meso mage. Nibahula bene balihummonywa. ²⁴ Uwilila wanyi na yano yanyi gubinabyo, Na wa chila lyanyi lwiga lwiginunywa. ²⁵ Nbiya uboo wage hegulu ha bahali, Na oboo wage wa ulume hegulu ha ngudi. ²⁶ Gee gwingita, Gogwe tata gwanyi, Abetcha anyi na liwe lyanyi lya ohogononywa wanyi. ²⁷ Na nene nimtagila uba m'buswa gwanyi gwa mtangi, Uba hegulu uhima maoolo mose ma ino ibaloo. ²⁸ Ata milumbu nim'biila yano yanyi, Na alago anyi igiliya uwasha weli. ²⁹ Babuswa bage nibabiya milumbu, Na iti yage ya buoolo nahi masugu ma hegulu ha gulu. ³⁰ Baana bobe babeleya m'bindi gwanyi, Boo nangu ugya mnda uonona wanyi, ³¹ Babedogya m'bindo gwanyi, Basahulama malagano manyi, ³² Bibyo yulu ya buubi bwabo nibahula wa tuti, Na usona wabo nibahula wa bihulo. ³³ Bibo yano yanyi nishimmuminya yo, Na nishiita uwilila wanyi uba lulimi. ³⁴ Nene nishidogya alago anyi, Nishigalula inywa ihumine mmilomo gyanyi. ³⁵ Inywa imwechi yandilahile wa buhaha bwanyi, Winene nishimganina Daudi lulimi, ³⁶ Babuswa bobe bishama milumbu, Na iti yage ibi nahi chuba u meso manyi. ³⁷ Yishama milumbu nahi mwechi; Mbangisiya guli gegulu ha gulu m'bwilile. ³⁸ Nambo Gogwe wamtela na ummanya, Wachigililwa yulu ya mshinyiwa mauta gobe. ³⁹ Wachigililwa yulu ya alago a mgichi gobe, Walidogya sala lyage na ulitela hasi. ⁴⁰ Wabela manyimbo mage mose, Wagiita mihao gyabo gyose uba bibundugulu. ⁴¹ Bose beene balihuhita mndila balihuwata kole bumona bwage; Gusili huambilwa na babinji nage. ⁴² Wautona uboo wa basususchi bage; Wabaseleecha bose bene bali hummonywa. ⁴³ Iyaka wagiwicha unyuma bwigi bwaahilu age; Na usamgimiya ubita. ⁴⁴ Wabusungya buhungwe bwage; Iti yage ya boolo waitela hasi. ⁴⁵ Wamahungula masugu ma buwalubaga bwage; Wamchyiya abule. ⁴⁶ Ee MLUME, ata mengonai? Wilibisa ata milumbu? Buhuchi bobe bwilama nahi ahyaa? ⁴⁷ Ukengeleche nene ugana nishi gwa milumbu; Yulu ya bunene nai ubumbile mmoga gwa batu! ⁴⁸ Na mlumyana nai gwishama poo nangu umona lubu, Gwilihogonona na uboo wa usinda? ⁴⁹ Mlume iliuhi yano yobe ya itangi, Yoli mlahile Daudi wauwilila obe. ⁵⁰ Ee Mlume, Uengeleche byabalihusebulula bagichi bobe; Nahi byandi hulitolelecha myaali yanyi usebululwa wa batu beengi. ⁵¹ Wine tumangu tobe tulihusebulula, Ee MLUME, Ehe, basebulula matamba ma mshinyiwa mauta gobe. ⁵² Na gahewe buswachi Mlume milumbu. Bibe bibyo na Bibe bibyo.