¹ Ee MLUME, Abetcha a uhugononywa wanyi Chuba na busugu nililile umbele gyobe. ² Usaba wanyi na uhiye umbele gyobe, Ugutegele mdodo gwanyi litu lyobe . ³ Bululi ichuli-chuli yanyi ya mwego yagyuta asusu, Na mwego gwanyi gwahyila usinda. ⁴ Nabalwa hamwechi na bene balihusala mmina; Nisili nahi mtu gushi na mbwatilicho. ⁵ Mmanga gwa bene bawile nitelilwe, Nahi bene bahagilwe balibalachu mtubuli. Babo bene boshihuengelecha Gogwe iyaka, Babagulwe koo na uboo ube. ⁶ Nene wandache mnda inaa ya hasi, Mnda ihana ya mdoo mmabenga. ⁷ Buhuchi bobe bwandemena, Wasusula wa mabimbi mobe mose. ⁸ Babaamane wababagula nanyi; Wangita uba byuchigilicha wabali; Nahambwa na nishinaosha uhuma. ⁹ Liiso lyanyi lili mdoo bululi bwa asusu MLUME, nilihugita masugumose; Nuugololela Gogwe maboo manyi. ¹⁰ Babu wii! Wibagilila bisaga? Na bebe bawile bigimana na uuginuna? ¹¹ Yano yobe yilisambwa wabuli? Na uwilila obe mnda usona? ¹² Bisaga byobe byimanuya mnda mdoo? Na kiine chobe mnda sii gya ugibilila? ¹³ Nambo nene nuililile Gogwe MLUME, Na halwelo usaba wanyi wiuhyila. ¹⁴ MLUME, yulu yai watela ichuli-chuli yanyi ya mwego,Na umbisa yenyi yobe? ¹⁵ Nasusulwa nene alibu a uwa utula ubuwalubaga bwanyi, Nilitoleleche na ushitula obe na udidibulwa. ¹⁶ Sungu chobe chiuulu chahita hegulu hanyi, Undidibula obe wanjimya. ¹⁷ Wanyunguluwa chuba lyose, Byanjwila bose hamwechi. ¹⁸ Mmunjwa gwanyi na bugenda bwanyi wababagula nanyi, Na bene baangidi bali mnda mdoo.