¹ MLUME, wabenja sii gyobe, Wagiwicha kole cha Yakobo. ² Wauleelela usona wa batu bobe, Wachiya tubachi twabo tose. ³ Wahunya buhuchi bobe bose, Wagiwila na uleya buhuchi bwa sungu chobe. ⁴ Abetcha a uhogononywa wetu, utugiwiche, Usungye sungu choli nacho yulu yetu. ⁵ Wi wii! Wituwatila sungu ata milumbu? Wibiya buhuchi ibushi ata na ibushi? ⁶ Wi wii! Ushihubenja ugiwila na utuha mwego, Batu bobe buuseelele? ⁷ Ee MLUME, utumonye keene chobe, Utuhe uhogononywa obe.. ⁸ Mndi nahuliche bilihudogoma Abetcha MLUME, Bululi gwibasambila batu bage talala, Ehe, na bacha bage, Yulu bashigiwilile buhoso bwabo iyaka. ⁹ Winene uhogonona wage uli hoka na bali humnyemya, Ugengeda ushame mnda sii gyetu. ¹⁰ Yano na winene byasambana, Kiine na talala byahulichana. ¹¹ Winene gyanaga mnda sii, Kiine gyalingamina uhuma hegulu ha gulu. ¹² Ehe, MLUME gwihumya ya bisoga, Na sii gyetu gyichisha biliwa byage. ¹³ Kiine gyigya umbele wage, Nagyo gyiita matamba mage uba ndila.