¹ Gogwe usuusa Isilaeli, uhuliche, Gogwe usulombwela Yusufu nahi ihichi; Gogwe uli mshame hegulu ha makelubi uhile lwenge. ² Umbele wa Eflaimu na Benyamini na Manase Ubyule uoma obe, Uchwe utuhogonona. ³ Ee Abetcha, utugiwiche, Ugemye yenyi yobe na beswe tuhogononywa. ⁴ Ee MLUME, Abetcha a bilume pambwa, ata mengo nai wichigililwa na usaba wa batu bobe? ⁵ Wabalisha mkati gwa byosochi, Wabanywisha byosochi wa bunywino bwata. ⁶ Wituita ibalo ya byumano u babinji netu, Na tumangu tulihuseya to wa to. ⁷ Ee Abetcha a bilume pambwa, utugiwiche,Ugemye yenyo yobe na beswe twihogononywa. ⁸ Uhyiche mzabibu uhuma Misili, Uchingile mioga uguunine. ⁹ Ulongiche ihana umbele gyago, Nago gubiile michinga gingi giguluche sii. ¹⁰ Koono chiuninywe na ichuli-chuli yago, Matabi mage ii nahi miamba gya Abetcha. ¹¹ Ngo guhyiche matabi mage ndaa na ubahali, Na byaana byage ndaa na Uludi. ¹² Bululi bwai wabibela bibambacha byage, Bahombile bose bene balihuhita mndila? ¹³ Ngulube cha mmisowa chagudogya, Na nyama cha mgala chagutauna. ¹⁴ Ee Abetcha a bilume pambwa, tulihuutongelela, utugiwiche, Ulole uhumina hegulu umone, uguchwilile gono mzabibu. ¹⁵ Biya byoliunine wa uboo obe wa ulume; Na liya tabi lyolibiile Uba ligimanyu ii wa ichuli-chuli yobe ya mwengo. ¹⁶ Gwachigiwa na ahyaa; gwagechwa, Wa uambilwa wa yenyi yobe bachimina. ¹⁷ Uboo obe na ube hegulu hage Mtu gwa uboo obe wa ulume; Hegulu ha mtu golibumbile Uba mgimanyu wa ichuli-chuli yobe ya mwego; ¹⁸ Bino tushiuleya wa ugiwila unyuma; Tuhe mwego na beswe twiligita china lyobe. ¹⁹ Ee MLUME, Abetcha a bilume pambwa, utugiwiche, Ugemye yenyi yobe na beswe twihogononywa.