¹ Benywe batu banyi, hulichiwe m'bindo gwanyi, Tegwe matu wa binywa bya anywa anyi. ² Na nabulule anywa anyi wa mihingu, Nabidogome bidaa byaala. ³ Bihisho byatuhuliche na ubimana, Biya byine bamasatu batusambile. ⁴ Bibyo tushibabisa baana babo, Haho tulihuisambila ibushi inge, Punda cha MLUME, wa uoma wage na bihisho byage bya bisaga byage byeligilile. ⁵ Bululi guwatiliche ubangisiya mnda Yakobo, Na m'bindo gugubiile mnda Isilaeli. Byelibalagile bamasetu Babasambile baana babo, ⁶ Bululi inge ibushi yamane mwano, Noo babo baana bene bibuswa. Bagimane na ubasambila baana babo. ⁷ Bam'biile Abetcha maudagilo mabo. Bibyo bashigibilichi bigilanywa bya Abetcha, Bino bawate alago age. ⁸ Ehe, bashibe nahi bamasabo, Ibushi ya buhulihuli na ubenga. Ibushi yine ishibalilongya mitima, Ata mtima gushibele guwashe Abetcha. ⁹ Baya Baeflaimu, bina bya bita, basuta mata, Bagiwile unyuma masugu ma bita. ¹⁰ Bashiwatile alago a Abetcha; Bahaninye ugyata mnda m'bindo gwage. ¹¹ Bagibilile bihisho byage na bihisho byage bya bisaga byelibamoninye. ¹² U meso ma bamasabo gugilile bihisho bya bisaga,Mnda sii gya Misili, mlubala lwa Soani. ¹³ Gugabule bahali na ubadabula; Gugimiye madi mlingilisho gwa yulugulu. ¹⁴ Gubagolwele wa timba mchuba, Na m'busugu byabwiya wa lwenge lwa ahyaa. ¹⁵ Gubelile mawe ma mata mlwanaganywa; Gubanyishiche madi mengi nahi madi ma mabenga. ¹⁶ Gumeninye madi mmiundumuo, Guundumwine madi nahi ngudi. ¹⁷ Bibyo bagililile ugila buubi, Habam'bengile Guya guli hegulu ha sii gya yuma. ¹⁸ Bamtondile Abetcha mmitima gyabo Wa ubenja iliwa wa itima yabo. ¹⁹ Ehe, bamsambile Abetcha, baganine, Wi wii! Abetcha anaosha uganda meza mlwanaganywa? ²⁰ Loolwe guhulile liwe lya lyata; Madi masuluwile, ngudi chigilule, Iyaka gunaosha utuha iliwa? Gwibaha batu bage nyama? ²¹ Bibyo MLUME, helihuliche guchigililwe; Ahyaa alaminywe yulu ya Yakobo, Sungu nacho chiselile yulu ya Isilaeli. ²² Bululi bashi m'bwashiche Abetcha, Na bashi uudagile uhogonona wage. ²³ Wa bibyo gugimiye matimba hegulu; Guhambila michango gya gulu; ²⁴ Gubanyishiche mana yulu baye; Gubahele biliwa bya gulu. ²⁵ Mtu gulile iliwa ya buomya mtima; Gubahilile iliwa ya ubagyusha. ²⁶ Guguhilile mnaga gwa mlugulu ha gulu; Gogolwele kusi wa uosha wage. ²⁷ Gubanyeshiche nyama nahi ihwili, Na tunonyi twa bihwahwa, Nahi isee ya bahali. ²⁸ Gubagwishiche mnda bushamo, Ngubi chose cha madu mabo. ²⁹ Walile na ugyuta abisa; Bululi gubahele byababenjiche; ³⁰ Bashileane na itima yabo. Iya iliwa yabo ya usama ili mtunywa twabo ³¹ Sungu cha Abetcha chiselile yulu yabo,Gubahagile bene babele banonyu; Gubagwishiche hasi bawambaga ba Isilaeli. ³² Inangwa bibyo bagilile umgila buubi, Na bashi washiche bihisho byage bya bisaga. ³³ Wa bibyo gumasungiche masugu mabo nahi luhuda, Na myaa gyabo nahi boba bwa ubababula. ³⁴ Helibahagile noo hababele humenga; Bagiwile bammebgile wa chigilwe. ³⁵ Baengeleche Abetcha uba noo liwe lyabo lya lyata, Na Abetcha Ali hegulu noo mmogonochi gwabo. ³⁶ Bino bam'bidiche wa tunywa twabo, Bamsambile lulimi wa ndimi chabo. ³⁷ Bululi mitima gyabo gishibele gigimanyu weli, Bashibele ata bawilile wa alago age. ³⁸ Mndi Gee, wa yulu gyina keene, Gusuleelela usona na gushibachimya. Nyendo chingi gusubuhishicha koo buhuchi bwage, Na gushihulamya sungu chage chose. ³⁹ Guengeleche ugana boo iy'itimbigili, Mnaga guhita gushibagiwila. ⁴⁰ Bam'bengile mlwanaganywa nyendo chinga? Na umchigilicha mgala1 V 41 Bagiwile mnyuma bamtondile Abetcha; Bammele lugumba Mmaha gwa Isilaeli. ⁴² Bashiengeleche uboo wa wage,Ata luya lusugu lyeli bahogonone na msusuchi. ⁴³ Byelibibiile bisaga byage Misili, Na bigagicha byage mnda lubala lwa SSoani. ⁴⁴ Gugalulile ngudi cha Bamisili uba mashi, Na ngudi bashioshe unywa madi. ⁴⁵ Gubahilile bigida bibachigile, Na byula bibadogye mibili. ⁴⁶ Gubahele baana ba njige biliwa byabaunine, Na njige mgilo gwa maboo mabo. ⁴⁷ Gudogiche mizabibu gyabo na mbula gya mawe, Na bishembe byabo wa mawe ma peho ⁴⁸ Guleila ng'ombe chabo chihulwe na mbula gya mawe, Na bisuganywa byabo wa tuhenyu-henyu. ⁴⁹ Gubahilile buhuchi bwa sungu chage, Buhuchi, na bululu, na asusu, Ihichi ya bamalaika bashuhila buubi. ⁵⁰ Guchilongeche ndila sungu chage; Na gushihengiche mitima gyabo na lubu, Na guleile isumi ya mbebe u mibili gyabo; ⁵¹ Guhagile babuswa bose batangi ba Bamisili, Mtomwe gwa uoma mnda hema lya Hamu. ⁵² Na gubalombwele batu bage nahi mihoo, Gubausile nahi bisuganywa mlwanaganywa. ⁵³ Babo gubaguhile talala bashimwene booba, Mndi bahali lihulile tumangu twabo. ⁵⁴ Gubahyiche ulugumba ndaana ulugumba lwage luhaha, Loono lweligulile wa uboo wage wa ulume. ⁵⁵ Gugichingile mioga umbele gyabo, Ubabalile buhyana bwabo wa mgochi, Na ushamya ubushi ya Isilaeli mnda mahema mabo. ⁵⁶ Wa bibyo bamtondile Abetcha Ali hegulu, bambengile, Na bashi washiche ubangisiya wage. ⁵⁷ Haho bagiwile unyuma, bammanyinye nahi bamasabo; Badungile nahi buta bushilingye. ⁵⁸ Bamchigiliche yulu ya ihana yabo ya hegulu, Bamtile uba na buwabululi bwa miishi gyabo. ⁵⁹ Abetcha ahuliche, guchigililwe, Gummaninye Isilaeli abisa. ⁶⁰ Guleile bushamo bwa Shilo,Hema lyelibiile hawingi ha batu; ⁶¹ Guuleile uoma wage uwaswa kole, Na ubenda wage mmaboo ma msusuchi. ⁶² Gubahanene batu bage bahagwe wa ahilu; Guchigililwe yulu ya buhyana bwage. ⁶³ Ahyaa agachigiche bawalubaga babo, Masindi mabo mashigimbilwe ng'imbo cha buya, ⁶⁴ Bibuli byabo bigwile wa ahilu, Na bawile babo bashililile. ⁶⁵ Haho Mlume gubyuwile nahi mtu gwamlachu tulo, Nahi ilume pambw ilihuta bigelegele yulu ya byunywa; ⁶⁶ Gubahulile basusuchi bage gubagiwiche unyuma, Gubabiile abule a milumbu. ⁶⁷ Bibyo guhaninye hema lya Yusufu; Ata bibyo gushisobola ndu gya ibushi ya Eflaimu. ⁶⁸ Mndi gusobole ibushi ya Yuda, Loono Sayuni lwelibendiche. ⁶⁹ Gugubae ha haha hage nahi mpala loono, Nahi gyelibiile sii igimanyu milumbu. ⁷⁰ Gumsobole Daudi, mgichi gwage, Gummuminye mnda liha lya miyoo. ⁷¹ Hanyuma ha miyoo gyukokya gummuminye, Gabause Yakobo batu bage, Na Isilaeli buhyana bwage. ⁷² Gubalishiche wa uwilila wa mtima gwage, Na ubagolwela wa lwenyi lwa maboo mage.