¹ Winene Abetcha ina keene wa Isilaeli, Wa babo bali na mitima gihaha. ² Na nene magulu manyi mabele alibu na uhogonona, Matamba manyi mabele alibu na ushebutuwa. ³ Bululi nibamonene buwa baya bene bali hulimona, Handimonine mishaminyi gya talala gya bene bashi na kiine. ⁴ Bululi bashi na lubaba mnda uwa wabo, Na mibili gyabo byina uoma. ⁵ Mnda asusu a batu boo bashimo, Na bashi huhulwa bihulo hamwechi na batu. ⁶ Bibyo ulimona usili nahi mkufu mmaisho mabo, Anene ali abachwiye nahi bichwalaganywa. ⁷ Meeso mabo masuunjuwa nahi ihobo, Balihuhita nahi ulamana na malanga ma mitima gyabo. ⁸ Balihusebulula, ugombola biibi, Ugombola uambila nahi ugana bali hegulu. ⁹ Babiya tunywa twabo hegulu ha gulu, Na ndimi chabo uhabagana-habagana mmibaloo. ¹⁰ Wa bibyo batu bage balihugaluwa uya, Na madi mamagiluchu malihuminywa nabo. ¹¹ Nabo balihugana, Abetcha imana wi? Hali malango wage guya guli hegulu? ¹² Mulange, noo byabali bene bashi na kiine, Na wa ushama masugu meengi bapata bumona bwingi. ¹³ Winene nalihahacha mtima gwanyi bunene, Nalisuwa maboo manyi yulu ya nangu uluba. ¹⁴ Bululi chuba lyose nahulwa, Na ususulwa kila lwelo. ¹⁵ Nambo nabagana, Nigombola nahi bibyo; Mndi! Nabababicha ibushi ya baana bobe. ¹⁶ Na nene niengeleche bya umana bibyo; Noo uba asusu u meso manyi; ¹⁷ Na byandigingile ha haha ha Abetcha, Niengelecha isula yabo. ¹⁸ Winene Gogwe wababiya hene hali bushee, Nubagwisha ndaa na hene hadogile. ¹⁹ Bili wii iyaka basili na bushige! Bagya koo na uhumiwa wa ubababula. ²⁰ Ee Mlume, nahi malo mengi ma ubyuwa, Holigya winenuna miishi gyabo. ²¹ Mtima gwanyi hagumonine bululu, Munda chanyi hachisumine, ²² Nibele nahi mmugi, nishigidi inywa; Nibele nahi nyama kaa u meso mobe. ²³ Wa bibyo nene nilihamwechi nobe masugu mose, Wambata uboo wa ulume. ²⁴ Winombwela wa lango lyobe, Na hanyuma wingaa mnda ugema obe. ²⁵ Mnanyi gwandi nage hegulu ha gulu, Ata hano ha sii hashi yibenju ila tu Gogwe. ²⁶ M'bili gwanyi na mtima gwanyi byahunguwa, Mndi Abetcha noo liwe lyanyi lya lyata lya mtima gwanyi na ibaa yanyi milumbu. ²⁷ Bululi bene balihubagula nobe bichimina; Ubachiminye bose bene buushigile Gogwe. ²⁸ Nene namshenena Abetcha ali wanyi usoga; Naita businino wa Mlume ABETCHA, Nalisambe bigilanywa byage byose.