¹ Ee Abetcha, umme oolo uonona obe, Na mwaana gwa oolo kiine chobe. ² Gwibahaga batu bobe wa kiine, Na batu bobe bamonenywe wa uonona. ³ Koono chibabutila batu talala, Na tuono nato wa kiine. ⁴ Gwibaonona bene bali bamonenywe na batu, Gwibahogonona bene bali husaba, gwimchinja mine gulihumonenana. ⁵ Byumyemya mengo mose ma chuba, Na mengo mose ma mwechi ugema ibushi ndaa na ibushi. ⁶ Gwisala nahi mbula hegulu ha byanyi bya bigede, Nahi mbula gya lunyange byagisunya hagulu ha sii. ⁷ Masugu mage gee, mtu gwa kiine misinga, Na talala chingi ata mwechi hagwichimina. ⁸ Na gabe na boolo utula bahali ndaana bahali, Utula Luudi ndaa na isula ya ibaloo. ⁹ Bashami na mlwanaganywa baginame umbele wage; Tumangu twage na tulambe ihwili. ¹⁰ Maoolo ma Tarshishi na bichiba balete mlambu; Maoolo ma Sheba na Seba na bahile bipawa. ¹¹ Ehe, maoolo mose na bamginamine; Na mioga gyose gimgilile. ¹² Yulu gwimmogonona msabi helilila, Na mtu gumonenywa helibi gushi na m'bwatilicha. ¹³ Gwimmonena keene alema na mbuchu, Na bichuli-chuli bya basabi gwibihogonona. ¹⁴ Gwibihogonona bichuli-chuli bya mwego na umonenywa na uambilwa, Na mashi mabo mali anyemu u meso mage. ¹⁵ Bino na gabe poo; Na bamme nolo cha Sheba; Na bamsabile masugu mose; Na umalila mihaa chuba lyose. ¹⁶ Na bibe biliwa biingi mnda sii na hegulu ha koono; Biguma byage na bi waye -waye nahi Lebanoni, Na batu ba mabuga bashame nahi byanyi bya mmibaloo. ¹⁷ China lyage ligililile milumbu, China lyage ligeme nahi chuba libe na bibuchi; Mioga gyose na gilihalile mihaa weli Gee, Na umgita luhanga lusoga. ¹⁸ Na gatonywe Mlume, Abetcha, Abetcha a Isilaeli, Gusigila bisaga Gee buchima bwage; ¹⁹ China lyage lyugangeda na liginunywe milumbu; Sii gyose na gigilule ugengeda wage. Noo bibyo na Noo bibyo. ²⁰ Usaba wa Daudi mwana gwa Yese wahuhwa.