1
Ee Abetcha, umme oolo uonona obe, Na mwaana gwa oolo kiine chobe.
2
Gwibahaga batu bobe wa kiine, Na batu bobe bamonenywe wa uonona.
3
Koono chibabutila batu talala, Na tuono nato wa kiine.
4
Gwibaonona bene bali bamonenywe na batu, Gwibahogonona bene bali husaba, gwimchinja mine gulihumonenana.
5
Byumyemya mengo mose ma chuba, Na mengo mose ma mwechi ugema ibushi ndaa na ibushi.
6
Gwisala nahi mbula hegulu ha byanyi bya bigede, Nahi mbula gya lunyange byagisunya hagulu ha sii.
7
Masugu mage gee, mtu gwa kiine misinga, Na talala chingi ata mwechi hagwichimina.
8
Na gabe na boolo utula bahali ndaana bahali, Utula Luudi ndaa na isula ya ibaloo.
9
Bashami na mlwanaganywa baginame umbele wage; Tumangu twage na tulambe ihwili.
10
Maoolo ma Tarshishi na bichiba balete mlambu; Maoolo ma Sheba na Seba na bahile bipawa.
11
Ehe, maoolo mose na bamginamine; Na mioga gyose gimgilile.
12
Yulu gwimmogonona msabi helilila, Na mtu gumonenywa helibi gushi na m'bwatilicha.
13
Gwimmonena keene alema na mbuchu, Na bichuli-chuli bya basabi gwibihogonona.
14
Gwibihogonona bichuli-chuli bya mwego na umonenywa na uambilwa, Na mashi mabo mali anyemu u meso mage.
15
Bino na gabe poo; Na bamme nolo cha Sheba; Na bamsabile masugu mose; Na umalila mihaa chuba lyose.
16
Na bibe biliwa biingi mnda sii na hegulu ha koono; Biguma byage na bi waye -waye nahi Lebanoni, Na batu ba mabuga bashame nahi byanyi bya mmibaloo.
17
China lyage ligililile milumbu, China lyage ligeme nahi chuba libe na bibuchi; Mioga gyose na gilihalile mihaa weli Gee, Na umgita luhanga lusoga.
18
Na gatonywe Mlume, Abetcha, Abetcha a Isilaeli, Gusigila bisaga Gee buchima bwage;
19
China lyage lyugangeda na liginunywe milumbu; Sii gyose na gigilule ugengeda wage. Noo bibyo na Noo bibyo.
20
Usaba wa Daudi mwana gwa Yese wahuhwa.