¹ Abetcha upuliche lidi lyanyi mnda ugaba wanyi; Uuse mwego gwanyi na booba bwa tumangu. ² Wimbisa koo na mihungo gya lubisagulu gya bagila biibi, Koo na alugi a batu balihugila bisone; ³ Bene banoninye ndimi chabo nahi tuhilu, Balihululiila migwi gyabo, binywa bya ulogya, ⁴ Baoshe umaga mtu m'bwilile ububisa, Wa ubuswila umaga na bashihumona booba. ⁵ Taliitile bilume pambwa u bihisho biibi; Uhana malanga wa utega magochi; Ugana, M nanyi gwilimona? ⁶ Balihulanga bisone; balihugana twahunga mmungo gwa guwilile; Na malanga ma mnda wa gegese gwabo, Na mtima gwage, muli lubisagulu bee. ⁷ Wa bibyo Abetcha ibata itoto, Wa mgwi bitewa. ⁸ Bibyo noo byabi chigilichiwa, Ndimi chabo bobene chilamata ubibanga byabo. Bose bene bibamona bidigicha miswe. ⁹ Na batu bose bimona booba, Bilisamba mgilo gwa Abetcha, Na umana bigilanywa byage. ¹⁰ Gwa kiine gwemseelela Mlume na umsinina, Na bose bene bali na mitima gya kiine bilitona.