¹ Ee Abetcha anyi, uponya na tumangu twanyi, Unginune hegulu habo bene balihuhimana nanyi. ² Uponye nabo bene balihugila bisone, Upogonone na batu bugesa mashi. ³ Bululi bene balihuhiba ichuli-chuli yanyi ya mwego; Bene bina uoma basumbilila; Ee MLUME, ishi yulu ya bigilanywa byanyi, Na ishi yulu ya usona wanyi. ⁴ Na hashi uluba wanyi balihugya abilo upembela; Ubyuwe umonane nanyi, na ulola. ⁵ Na Gogwe,MLUME,Abetcha a bilume pambwa, Abetcha a Isilaeli, ubyuwe ubaonone ba mioga gyose; Ushibaleelele basone bene balihugila bisone ata gumwechi. ⁶ Mengo ma igolo basugiwila na uduga nahi tuwa, Na uchunguluwa-chunguluwa mmbuga. ⁷ Loola tunywa twato twahyondowa, Mmilomo gyato muli tuhilu, Yulu ii nanyi gusutuhulisha beswe? ⁸ Na Gogwe, Mlume, wibaseya, Wigisebulula mioga gyose. ⁹ Ee uoma wanyi, niuhemba Gogwe,Bululi Abetcha noo liwe lyanyi lya lyata ¹⁰ Abetcha a yano yanyi inombwela, Abetcha ipa utulola tumangu twanyi. ¹¹ Ushibahage, batu banyi bashigibilile; Ubasale wa uosha obe, Na ubachimya, Ee Mlume, ngabo gyanyi. ¹² Wa buubi bwa tunywa twabo, Na wa binywa bya tunywa twabo, Bawaswe wa ulimona wabo, Wa yulu ya uloga wabo na wa udogoma lulimi. ¹³ Ubasungye wa sungu, Ubasungye bashimine, Bamane ugana Abetcha noo ali huhyilila wa Yakobbo, Ndaa na isula ya ibaloo. ¹⁴ Mengo ma igolo basugiwila, uduga nahi tuwaa, Na uchunguluwa-chunguluwa mmbuga. ¹⁵ Tulihuhabagana-habagana uenga biliwa; Tusahugyuta twiyesha busugu too. ¹⁶ Na nene nigimbauoma obe halwelo, Nigimba yano yobe wa sasoo. Bululi Gogwe noo liwe lyanyi lya lyata, Na businino bwanyi lusugu lwa asusu. ¹⁷ Ee uoma wanyi, niugimbila wa sasoo, Bululi Abetcha noo liwe lyanyi lya lyata, Abetcha a yano yanyi.