¹ Undeelele, Ee Abetcha, undeelele nene, Bululimichuli-chuli yanyi ya mwego yusinina Gogwe. Niisinina ichuli-chuli ya bihwahwa byobe, Ata mengo mihita tuno tususu tose. ² Nimgita ABETCHA ene Ali hegulu, Abetcha abwilindiche bihisho byanyi. ³ Gwihila uhuma u gulu na upogonona, Helituwa guya guli hubenja uumina. Abetcha ilila Yano yage na winene wage. ⁴ Ichuli-chuli yanyi ya mwego ili hawingi ha matambwe, Nishama hawingi habo bene bali balamine ahyaa. Batu meeno mabo ii masumo na migwi, Na ndimi chabo ii tuhilu twa bwigi. ⁵ Ee Abetcha, ugininywe hegulu ha gulu, Na hegulu ha sii gyose ube ugengeda obe. ⁶ Bategile bwila bululi bambwate umagulu; Ichuli-chuli yanyi ya mwego yaginama; Badaba ina hambela hanyi; Bagwa mwaili! ⁷ Ee Abetcha, mtima gwanyi ii gugimanyu, Mtima gwanyi ii gugimanyu. Nigimba, nigimba ng'imbo, ⁸ Byuwa, ugengeda wanyi. Byuwa, ligimbi na inubi, Nibyuwa pee. ⁹ Ee Mlume, Niuginuna wawingi ha batu, Niugimbila ng'imbo hawingi ha mioga. ¹⁰ Yulu yano yobe ii yata uhiya ata hegulu, Na uwilila obe ata u matimba. ¹¹ Ee Abetcha, uginunywe hegulu ya gulu, Na hegulu ha sii gyose habe ugengeda obe.