¹ Abetcha, undeelele bululi hali guya gulihubenja uumina, Chuba lyose gulihumbonena na uchwisha bita. ² Tumangu twanyi tulihubenja uumina mchuba, Bululi bene balihuchisha bita wa ahyonono ii bengi. ³ Lusugu lwa iduba yanyi niuudagila Gogwe; ⁴ Wa uwatilicha wa ABETCHA niitona inywa yage. Nammudagila Abetcha nishimona booba; Mine gwina m'bili gwingita ii? ⁵ Lusugu lose bali huhogononya binywa byanyi, Malanga mabo mose mali yulu yanyi balihutagila biibi. ⁶ Balihusambila, bali hulibisa, balihulola maasa manyi, Bululi bali hubisamina ichuli-chuli yanyi ya mwego. ⁷ Wi wii! Bihogononywa wa usona bwabo? Ee Abetcha, ubachimyewa wa sungu chobe. ⁸ Ubalile uhubagana-hubagana wanyi; Ubibiye byosochi byanyi mnda mlangi gobe; (Wi wii! Bishimo mnda itabo yobe?) ⁹ Haho tumangu twanyi twigiwila unyuma lusugu luya lwandigita. Ino inywa nigidi ugana ABETCHA ali luubi lwanyi; ¹⁰ Wa uwatilicha wa Abetcha nitona inywa yage. Wa uwatilicha wa Mlume niitona inywa yage. ¹¹ Nammudagila Abetcha, nishimona booba; Mtu gwingita ii? ¹² Ee abetcha, ulibindila obe uli wandi; Niutangila lutangi lwa uuginuna. ¹³ Bululi waihonya ichuli-chuli yanyi ya mwego na luubu; Wi wii! Ushichibile magulu nanyi mashigwe? Yulu nagye umbele wa Abetcha Mnda lwenge lwa baya bene bali na mwego.