¹ Ee ABETCHA, uuhuliche usaba wanyi, Na ushilibise handiusaba uleelelwa. ² Upuliche na ungae, Nasukita-sukita na ulila na usumwa. ³ Wa yulu ya lidi lya amangu, Wa yulu ya umonena wa guya m'bii. Bululi batelela buubi, Na wa buhuchi balihundegya. ⁴ Mtima gwanyi gwabongowa mnda mwanyi, Na booba bwa lubu bwanjwila. ⁵ Booba na udanda binjwilile, Na booba bwata bwakununa. ⁶ Niganine, Niisuba na bihwahwa nahi akundul, Nabaguluwa koo na olitucha. ⁷ Nabaligila lwanyi koo, Nabasala mgala. ⁸ Nabaita abilo usina Mabimbi na mulula. ⁹ Ee Mlume, ubachimye, uchibulaganye ndimi chabo, Bululi namona umonenywa na uonywa mnda mbuga. ¹⁰ Vuba na busugu balihuchunguluwa bibanbacha byage. ¹¹ Itima ibii ili mnda mwage; Umonena na buyanja bishihuhuma mmikoba gyabo. ¹² Bululi gutuwene ashi amangu; Nambo noo bibyo, nabalitolelecha. Gulitonine yulu nanyi gushi guya gulihukonywa; Nambo noo bibyo nababisama gashinone. ¹³ Mndi mgogwe, mtu miinanyi, naGenda lyanyi,gwadimanene nage abisa. ¹⁴ Tuhanene malanga mabenju; na ugya mmndu gya Abetcha hamwechi na sumbilo. ¹⁵ Luubu na lubachwile wa ubabuwa, Na basale usinda bili na mwego, Bululi buubi buli m'bushamo bwabo na hawingi habo. ¹⁶ Nene nimgita Abetcha, Na Mlume gwipogonona; ¹⁷ Igolo, halwelo, na kunyiya meno nilila na usumwa, Nage gwihulicha lida lyanyi. ¹⁸ Gwahogononya ichuli-chuli yanyi ya mwego ibe holelelo, mtu gashipyile, BUluli bene bahimene nanyi bali beengi. ¹⁹ Abetcha ihulicha na ubagaa; Gee No gubele utula milumbu. Ugaluwa wa bihisho ushihubahyila boo, Wa bibyo bashihulisacha uli Abetcha, ²⁰ Gugololile uboo gabaonone bene bahulichane nage,Gwaabela alago age. ²¹ Anywa age ali ahochu nahi buleba, Mndi mtima gwage ii bita. Binywa byage bili lebelebe uhima mauta, Mndi bibyo ii tuhilu hululu. ²² Umswiye Mlume mchigo gobe nage gwiuwatilicha, Gushimleya gwina uwasha kiine gahunyiwe milumbu. ²³ Na Gogwe, Abetcha, wibasacha, Baihyile iina ya udigiwa; Batu ba mashi na buyanja bashishama ibaa ya masugu mabo, Bino nene niuudagila Gogwe.