¹ Abetcha, Abetcha MLUME, guganine, gugitile sii, Utula usuhuma chuba na walisugwila. ² Uhuma Sayuni, uwilila wa ubenda, Abetcha agema. ³ Abetcha etu ichwa na ashishama pii, Ahyaa ichigya hambele hage, Na imbi ludiyagilula abisa yachunguluwa ngubi chose. ⁴ Gwigita gulu lili hegulu, Na ibaloo nayo yihogonona batu bage. ⁵ Mukongwele bene balihusina Abetcha anyi bene baitile alago nanyi a lutangi. ⁶ Na gulu lilisamba kiine gyage, Yulu Abetcha noo mgechi gwa milandu. ⁷ Hulichiwe, benywe baana babyi, nene nilisamba, Nene niubangisiya, Isilaeli; Nene noo nili ABETCHA, Abetcha obe. ⁸ Nishiuhugumbila yulu ya lutangi lobe lwa nyama, Na lutangi lwa buubi luli umbele wanyi abisa. ⁹ Nishiguha ng'ombe gya mndu gyobe, Na ata lunga lya mbuchi mnda liha lyobe. ¹⁰ Nyama chose ii chanyi, Na migoma hegulu ha koono uki. ¹¹ Nitugidi tunonyi tose twu koono, Na nyama chose cha mmabala ii chanyi. ¹² Nambo nisuba na ndalaa nisaba usambila, Yulu ibaloo ii yanyi, na byose bili biigiluche. ¹³ Wi wii! Naye nyama na byulimona! Ao nanywe mashi ma mbuchi! ¹⁴ Umtangile Abetcha a lutangi lwa umginuna; Nam'bwilidiche Guya guli hegulu ulidindila obe. ¹⁵ Wangite lusugu lwa asusu; Niuhogonona, na gogwe witona. ¹⁶ Mtu gushi na kiine, Abetcha aganina, Uli nai gogwe ulisamba m'bindo gwanyi, Na uabiya alago anyi mmanywa mobe? ¹⁷ Bululi gogwe waonywa umonyiwa, Na utela binywa byanyi unyuma mgongo. ¹⁸ Holimonine miibi useelele nage, Uhulichane na bamasei. ¹⁹ Uleile anywa obe udogoma bibywa biibi, Na lulimi lobe lulihutonga bya bwelemenya. ²⁰ Washsma na umgamba mshiwenyu, Na mwana gwa mnobe wamchinga. ²¹ Bibyo noo byoligilile, nene nishamine pii; Ulangile ugana Nene nili nahi gogwe. Mndi niuhugumbila; Nibiya bibyo hambele ha meeso mobe. ²² Maanywe bibyo, Benywe bene bali humgibilila Abetcha, Nashichwe umgeda bihindi bihindi, Hashimoneye gwa uumonya. ²³ Gwihana lutangi lwa buswachi, Gugo noo gwinginuna. Nage gwilongya lwendo lwage, Nimmonya uhogonona wa Abetcha.