¹ Ushichigililwe wa yulu ya bangila biibi, Ushibatone bene bali hugila buubi. ² Nahi biya byanyi byigedeya abisa, Nahi buhama bibisi byiguma. ³ Umudagile Mlume, wagile bisoga, Ushame mnda sii, ubenje uwasha, ⁴ Na gigwe wibenja bya Mlume, Nage gwiuha lilo lya mtima gobe. ⁵ Umme Mlume ndila gyobe, Iyaka umudagile, nage gwiita ⁶ Gwiginuna kiine gyage nahi lwenge, Na uonona obe nahi kunyia meno. ⁷ Ushame pii umbule gya Mlume, Na gogwe ummembe wa uwasha; Ushichigililwe wa yulu ya guya gwaginunwa mnda ndila gyage, Ata wa mtu gulihugila buubi. ⁸ Ushichigililwe, uleye bichigililwa, Ushichigililwe, isula yage ii ugila buubi. ⁹ Bululi bangila biibi bichingwa, Wa bibyo bene balihummemba Mlume bihyana ibaloo. ¹⁰ Yulu hayuma ha mengo macho mine gushi na kiine gushibi hoo, Wihalola ha ihana yage ishibi hoo iyaka. ¹¹ Mndi babahochu bihyana sii, Biliseelecha wa bwingi bwa talala. ¹² Mine gushi na kiine gusulanga biibi yuluya bene bali na kiine, Na utauna meeno ma busengi yulu yage. ¹³ Mlume gwimseya, Yulu gumonine ugana chuba lyage lyahuchwa. ¹⁴ Bene bashi na kiine bahulula ahilu mluhaona uhinga buta, Bamgwishe hasi mbuchu na msabi, Na ubahaga bene bali na lwendo lwa unogeya mtima. ¹⁵ Ahilu abo ibatunga mmitima gyabo bo bene, Na ndemo chabu chiutuwa. ¹⁶ Icho yeli nayo mtu gwa kiine ii yisoga Ili ingi uli bomona bwingi buli na bashi na kiine beengi. ¹⁷ Bululi maboo ma bene bashi na kiine minogeya, Bino Mlume guli hubagegeya weli bene kiine. ¹⁸ Mlume gumagidi masugu ma babawilile, Na buhyana bwabo bubi bwa milumbu. ¹⁹ Bashimona abule mengo mabii, Na masugu ma ndala bigyuta. ²⁰ Bene bashi na kiine bichimina, Na bene balihummonywa Mlume bihuma, Nahi ubenda wa mabala, Nahi mii gwihwa. ²¹ Guya gushi na kiine gusukopa gushibagiwicha, Mndi mine gwina kiine gusuba na yano, na gusuhana. ²² Na baya bene bahalilwe mihaa na ge bihyana ibaloo, Na baya bene balogilwe nage bihanyiwa. ²³ Matamba ma mtu masugimiwa na Mlume, Nage gusubenja ndila gyage. ²⁴ Gwinahyatala gushigwa hasi, Mlume gusubwata uboo na umgimiya. ²⁵ Nibele iyana nene hano nahuota, Nene bino nishinamona mtu gwa kiine gwaleiwa na ata m'buswa gwage gulihusaba iliwa. ²⁶ Chuba lyose gusumonya yano na gusukopesha, Na babuswa bage basuhalwa mihaa. ²⁷ Lihengye na buubi, ugile bisoga, Na ushama ata milumbu. ²⁸ Yulu wa bibyo Mlume gusuunda kiine, Na gushihubaleya balihahache bage.Nabo balihuuswa milumbu, Na m'buswa gwa mine gushi na kiine gwihagwa. ²⁹ Gwa kiine gwihyana sii, Nabo bishama mo milumbu. ³⁰ Anywa a mtu gwa kiine asudogoma bya lwengu, Na lulimi lwage lusugana bya uonona. ³¹ M'bindo gwa Abetcha age guli mnda mwage. Matamba mage mashi hushebutuwa. ³² Mtu gushi na kiine gulihummiba mtu gwa kiine, Na uenga ndila gya ummaga. ³³ Mlume gushimlecha mmaboo mage, Na gushim'becha heliononywa. ³⁴ Gogwe ummembe Mlume, Ugye mndila gyage, Nage gwiuginuna ugihyane sii, Haho bene bashi na kiine habihanyiwa wibamona. ³⁵ Nimmonine gushi na kiine gwabuhuchi abisa , Gwilidagalacha nahi mmamba gwa Lebanoni. ³⁶ Nihitile mndi! Gushiho, Nimmengila mndi gushimoneye. ³⁷ Umlole abisa mtu gwa m'bwatilile, Ulingamine mtu gwa mnogebu mtima, Na isula yage gugo mtu ii talala. ³⁸ Balubi bichimiwa bose hamwechi, Bene bashi na kiine isula yabo bihagwa. ³⁹ Na uhugononywa wa mtu gwa kiine wina Mlume; Gee no ngabo gyetu mengo ma asusu. ⁴⁰ Nage Mlume gwibawatilicha na ubadabula; Ubadabula na bene bashi na kiine na ubahogonona; Wa yulu balihummudagila Gee.