¹ Uhanya wage guya m'bii na udogoma mnda mtima gwage, Hashi iduba ya abetcha umbele gyage. ² Yulu ulibenja umbele wa meeso mage Yulu uhogonowa wage ushimoneya na uonyiwa. ³ Binywa bya anywa age ii buubi na udoga, Guleile na lwemyi na ugila bosoga. ⁴ Gusulanga biibi mmingo yage, Gusugya mndila giibi; Gushihuonywa buubi. ⁵ Ee Mlume, yano yobe yahiya ata hegulu ha gulu, Uwasha obe wahiya ndaa na umatimba, ⁶ Kiine chobe chili nahikoono cha Abetcha, Uonona obe uli nahi mabenga maata, Ee Mlume uli hubahogonona batu na nyama. ⁷ Ee Abetcha, nahi byaili ya bumona bwingi yano yobe! Batu basusinina ichuli-chuli ya bihwahwa byobe. ⁸ Bigyuta unona uli mndu gyobe, Na Gogwe winywisha madi ma ludi lwa saso lyobe. ⁹ Bululi obe Gogwe uli msuula gwa madi ma mwego, Mnda lwenge lobe twimona lwenge. ¹⁰ Ugililile ubaha mwego bene bali huumana yano yobe, Na bahochu ba mtima uwasha obe. ¹¹ Ugulu wa mmonywa ushipyile, Na ata uboo wa batu bashi na kiine ushinywinge. ¹² Ubu noo wabagwile bangila biibi; Bagwishiwe hasi na basioshe ugimana.