¹ Nimginuna Mlume mengo mose, Utonywa wage uli mmanywa anyi myaa gyose. ² Wa Mlume ichuli-chuli yanyi ya mwego yilibanga, Babahochu bahuliche baseelele. ³ Mumginune Mlume hamwechi nanyi, Na tulitone china lyage hamwechi. ⁴ Nimmengile Mlume gungaile, Guponinye na iduba yanyi yose. ⁵ Habamlolile mesomabo mabiilwe lwenge, Na ata byenyi byabo bishimona abule. ⁶ Mbuchu gino gigitile, Mlume guhuliche, Gummogohonine na asusu age ose. ⁷ Malaika ma Mlume malihuita bushamo, Gubachungulwile bene balihunyemya na ubahogonona. ⁸ Mutonde mumone ugana Mlume ii m'benju; Luhanga lusoga wa guya mtu gulihumudagila. ⁹ Munyemye Mlume bemywe bahaha bage, Bululi bene balihumya bashienge itu. ¹⁰ Mwana-tambwe gabegwa gusumona ndala; Yulu bene balihummenga Mlume bashienga itu yoyose ili ya ibenju. ¹¹ Chuwe benywe baana, mupuliche, Na nene nimgigya unyemya Mlume. ¹² Mnanyi guya gulihubenjiwa na mwego, Gusubenja umona masugu mengi gamone bibenju? ¹³ Uchibile lulimi lobe na buubi, Na milomo gyobe na udogoma biibi. ¹⁴ Uleye buubi ugile bisoga, Uenge talala na ugilame. ¹⁵ Meeso ma Mlume malihulola batu ba kiine, Na matu mage masuhulicha lilo lyabo. ¹⁶ Yenyi ya Mlume ili yulu ya bangila biibi, Gahunye uengelechiwa wabo hano hamgala. ¹⁷ Balalile, nage Mlume guhuliche, Gubahoninye na asusu abo ose. ¹⁸ Mlume gulihoka nabo banogeile mitima, Na baheleye luhuda lwa mwego gwibahogonona. ¹⁹ Asusu a batu ba kiine ii yengi, Mndi Mlume gwibahonya nao ose. ²⁰ Gusumausa mauda mage mose, Lishinogeye ata limwechi. ²¹ Buubi bwimmaga guya gushi na kiine, Na baya balihummonywa mtu gwa kiine biononywa. ²² Mlume gusukombola bichuli-chuli bya mwego bya bagichi bage, Na gushionona bene bali humsinina.