¹ Mutele Mlume bigelegele benywe batu ba kiine, Utona ulingye babagolobu mitima. ² Muginune Mlume wa binubi, Wa inanda ya migochi umi mumgimbile buswachi. ³ Mimgimbile lwimbo lwa luhya, Gombwe wa wino wa madi ma saso. ⁴ Bululi inywa ya Mlume yina kiine, Na migilo gyage gyose gusugigila wa uwasha. ⁵ Ubenja kiine na uonona, Sii gyagilulayano ya Mlume. ⁶ Wa inywa ya Mlume sii giitiye, Na ihichi yage yose wa luhuda lwa anywa age. ⁷ Usumbicha madii ma bahali bichiba bichiba, Na mabenga itungu. ⁸ Sii gyose na gimnyemye Mlume, Bose bene balihusha mmibaloo bamdagili. ⁹ Bululi Gee guganine, gyo nuba; Na Gee gudogomine gyoo nugimana. ¹⁰ Mlume gusumagalila mihungo gya mioga, gusugihanya mihungo gya batu. ¹¹ Mmungo gya Mlume gusushama milumbu, Mmungo gwa mtima Gwage bibushi na bibushi. ¹² Luhanga lusoga wa mmoga Mlume noo Abetcha abo, Batu belilisobwele uba buhyana bwage. ¹³ Uhuma hegulu ha gulu Mlume gulihulingamina, Gulihobalola batu bose. ¹⁴ Uhuma hihana yage yelihushama gulihubalola batu bose bene balihushana m mino ibaloo. ¹⁵ Gee mine gubumbile mitima gyabo bose Guswungecha migolo gwabo byose. ¹⁶ Hashi oolo lyihogononywa bululi bwa uosha wage wingi, Na ilume pambwa ishi hulihogonona wa yulu ya bwingi bwa uoma. ¹⁷ Falasi gushihufaa wa yulu ya uhogononywa wa mtu, Na gishi huhogononya mtu yulu ya uoma wage. ¹⁸ Loola, liso lya Mlume lili ubaya bali humnyemya, Bebe Balihuhemba yano yage. Gee gilihubahonya bichili-chuli byabo bya mwego na lubu, Na ubahonya mengo ma ndala. ²⁰ Bichuli-chuli byetu bya mwego bili hummemba Mlume; Gee noo bwatilicho gyetu na ngabo gyetu. ²¹ Bululi mitima gyetu gyimseelela, Yulu tuliudagile china lyage lihaha. ²² Ee Mlume, yano yobe ishame netu, Wa nahi biya byatuuhembile Gogwe.