¹ Ee Mlume niutona yulu wanginuna, Na usatuseelecha tumangu twani yulu yanyi. ² Ee Mlume, Abetcha anyi, Nulilile na uponya. ³ Uginune ichuli-chuli yanyi ya mwego, Ee Mlume, uhuma usinda. Uponinye na upogonona hawingi ha baya bene balihusala mmina. ⁴ Mgimbilwe Mlume ng'imbo, Benywe basubolwa bage. Na ugana buswachi. Wa uengelecha buhaha bwage. ⁵ Bululi buhuchi bwage ii bwa mengo macho, Na mnda ulitolelecha wage muli mwego. Hange ulila usuchwa m'busugu, Mndi lwelo uba saso. ⁶ Na nene handibele na bibya niganine, Nishihunyiwa milumbu. ⁷ Mlume, wautosheka obe Gogwe walugimiya loono lwanyi. Waibisa yenyi yobe, Na nene nisili na adugwa. ⁸ Ee Mlume, niulilile Gogwe, Ehe, wa Mlume nisabila bange. ⁹ Mmashi manyi muli alambwe nai nambo nene nahusala mmina? Minisambe kiini ubo? ¹⁰ Ee Mlume, uhuliche, undeelele, Mlume, ube mbatilicho gyanyi. ¹¹ Wagalula malilo manyi uba maina; Wanjula maduda, wanjwiya saso. ¹² Yulu ugengeda wanyi uutone, Ee Mlume, Abetcha anyi, Niuginuna milumbu.