¹ Ee Mlume, niugita Gogwe, liwe lyanyi lwa tyata, Ushibe wandi nahi ihuli, Nashichwe ulingilishiwa na bene balihusala mmina, Nambo ubeshamina pii. ² Ulihulishe lidi na usaba wanyi handibihusaba, Nabeginunina ha haha hobe maboo manyi. ³ Ushimbule hamwechi na bene bashi na kiine, Na ata hamwechi na bagila biibi. Basubasambila babinji nabo binya bya talala, Mndi mnda mitima gyabo muli ahyonono. ⁴ Ubahe ulamana na bigilanywa byabo, Na wa ulamana na ugila wabo, Ubahe ulamana na migili gya maboo mabo, Ubalipe bi balingye. ⁵ Bululi gashigidi migilo gya Mlume, Ata bihisho bya maboo mage. Gwibabela na gushibagubaa; ⁶ Na gaginunywe Mlume Yulu gwahulicha lidi lya usaba wanyi; ⁷ Mlume noo uoma wanyi na ngabo gyanyi, Mtima gwanyi gwamudagila, Nene nawatilichiwa; Haho, mtima gwanyi gwaseelela, Na wa lwimbo lwanyi nimginuna. ⁸ Mlume noo uoma wa batu bage, Nage noo mmao gwa uhogononywa wa mshiniwa mauta* gwage. ⁹ Ubahogononye batu bobe, ubuhale mihaa buhyana bobe, Ubause, ubaguhe milumbu.