¹ Gogwe, Mlume, uoma wanyi nilihuunda abisa ² Mlume noo liwe gwanyi, na hichi lyanyi, na uhugononywa wanyi, Abetcha anyi, na mmao gwanyi gwandihusinina, Ngabo gyanyi, na liino lya uhogononywa wanyi, na mmao gwanyi. ³ Niigita Mlume gulingye utonywa, Bibyo nihogononywa na tumangu twanyi. ⁴ Migochi gya lubu ginyungulwile, Imbi ludi ya buubi imbiile idiba. ⁵ Mogochi gya usinda ginyungulwile, Magichi ma lubu mashenene. ⁶ Mengo ma asusu anyi nigitile Mlume, Na ugabila Abetcha anyi. Guhuliche lidi lyanyi mmihwilo yage, Lilo lyanyi ligingile mmatu mage. ⁷ Haho sii gyine gidigile na udanda, Mishingi gya koono gidigichiwe-digichiwe; Gidigile yulu gubele na buhuchi. ⁸ Haselile mii uhuma mmihyembe gyage, Ahyaa uhuma mmanywa mwage oo no uchigya, Maala malamimwe nao. ⁹ Guginaminye gulu gee nuusala, Habele ne mdoo gwingi hasi ha magulu mage.v 10 Guchinine hegulu ha kelubi gee no uguluwa, Ehe, guguluwile abilo hegulu ha bihwahwa bya mnaga. ¹¹ Guitile mdo uba ihana yage ya ulibisa, uba hema lyage lya umchunguluwa. Mdo gwa madi na matimba mataa ma gulu. ¹² Hachwile lwenge uhuma umbele wage Hahitile matimba mage mataa. Mbula gya mawe na maala ma ahyaa. ¹³ Mlume gutele kuba hegulu ha gulu, Gee Guli hegulu guhuminye lidi lyage, Mbula gya mawe na maala ma ahyaa. ¹⁴ Gutele migwii gyage gubasalile, Ehe,tuhenyu-henyu twingi abisa, Gubamwagile pili pili mwa. ¹⁵ Haho noo hamoneile mivule-mivule gya madi, Mishingi gya sii gibisulwe, Ee Mlume, wa uhugumbila obe, Wa uhula wa luhuda lwa mmihyembe gyobe. ¹⁶ Guhilile uhuma hegulu gee numbwata, na upunya mnda madi meengi. ¹⁷ Gupogonone na amangu anyi ene ali na uoma, Na baya balihukonywa, Yulu babele na uoma upima nene. ¹⁸ Banjwilile chuba lya asusu anyi, Mndi Mlume gubele bugegamino bwanyi. ¹⁹ Gupogonone gupilile gumbiile habamba, Guponinye bululi gubenjichwe na nene. ²⁰ Mlume gungilile ulamana na kiine gyanyi, Ulamana na buhahabwa maboo manyi gundipile. ²¹ Yulu niwashiche ndila gya Mlume, Na nishimmaninye Abetcha anyi. ²² Uonona wage ose ubele hambele hanyi, Na ata alago age nishimlibagule nao, ²³ Nene nibele m'bwilile umbele gyage, Niliushile na buubi bwanyi. ²⁴ Wa bibyo Mlume gwandipi ulamana na kiine gyanyi, Ulamana na buhaha bwa maboo manyi umbele wage. ²⁵ Wa mtu gwa yano ubi na yano; Wa mtu gwa m'bwilile ubi m'bwilile; ²⁶ Wa guya gwamlihahache ubi mmaha; Na wa mtu gwa buhuli-huli wilimonya ushuhulicha. ²⁷ Bululi Gogwe wibwhogonona batu balihumonenywa, Na meso ma ulimona wimasacha. ²⁸ Bululi Gogwe walamya aswenge anyi; Mlume Abetcha anyi gandamyile mnda mdo gwanyi. ²⁹ Wa umbwatilicha obe nilihulama bilume pambwa, Wa umbwaticha wa Abetcha naguluwa ibambacha. ³⁰ Abetcha ndila gyage ii giwilile, Malagano ma Mlume mawilila, Gee noo ngabo gyabo, Bose bene balihumsinina. ³¹ Mnanyi guli nahi Abetcha ila ii Mlume? Mnanyi guli nahi liwe lya lyata ila Abetcha etu? ³² Abetcha noo alihupamba mshingo gwa uoma, Nage gulihugiita ndila gyanyi giwilile. ³³ Magulu manyi gamaita nahi ma kulungu, Na uhagimiya ihana yanyi ya hegulu. ³⁴ Gwamagigya maboo manyi ulwa bita, Maboo manyi malihuhinga buta bwa shaba. ³⁵ Gogwe wapa ngabo gya uhugononywa obe,Uboo obe wa ulume wambwatilicha, Na uhola obe wanginuna . ³⁶ Wangitila ihana matamba manyi, Na magulu manyi masashelemuwa. ³⁷ Nilaminina tumangu twanyi na ubawata, Na nishigiwila unyuma na ata baononywe. ³⁸ Nibahula-hula na bashiosha ugimana, Biigwa hasi ha magulu manyi. ³⁹ Na Gogwe usupamba mchingo gwa uoma wa uhulana vita, Usubabiya hasi hanyi bene bali humbisamina. ⁴⁰ Ehe, tumangu twanyi watuita tupa kungu chabo, Na bene balihukonywa nabaulungila koo. ⁴¹ Balihulila lilo hashi gwa ubahogonona, Bamgitile Mlume nage gushibagitabuwile. ⁴² Nibaswagile nahi ihwili mbele gya mnaga, Nibatelile hambuga nahi biswaswa bya mndila. ⁴³ Wapogonona na mahindi ma batu, Wangita uba mswe gwa mioga. Batu bandishigidi bangilile migilo. ⁴⁴ Wa uhulicha tu mwano gwanyi, Boo no unginamina. Bagenyi banjwilile na balisachiche. ⁴⁵ Bagenyi nabo basumbuluwele, Bahumine mmiao gyabo balihudanda. ⁴⁶ Mlume noo guli na mwego; Na litonywe liwe lyanyi lya lyata; Na gaginunywe Abetcha a uhogononywa wanyi; ⁴⁷ Gogwe noo Abetcha ugiwicha buubi wa buubi; Na ubasacha batu hasi hanyi. ⁴⁸ Gusuponya na tumangu twanyi; Ehe, wanginuna hagulu ha bene baliginune wandi, Na uponya na mtu gwa uliginuna. ⁴⁹ Bibyo,Mlume, Niutona hawingi ha mioga, Na nene niligimbila china lyobe. ⁵⁰ Abetcha alihuuma oolo lyage ohogononywa wawata, Gwamgilila yano mshinyiwa mauta*gwage, Daudi na lubuto lwage ata milumbu .