¹ Ee Abetcha anyi, Oolo, niutona, Niliginuna china lyobe milumbu na milumbu. ² Masugu mose niuginuna,Nilitonsa china lyobe milumbu na milumbu. ³ MLUME noo mmata mine gulihuhewa buswachi abisa, Na ata bwata bwage bushihumanyiya. ⁴ Ibushi na ibushi yibitona bihisho byage, Yilisamba bihisho byage bya byata. ⁵ Niengelecha ubenda wa ugengeda obe, Na bigilanywa byobe byoe bya ugagicha. ⁶ Batu bilisamba bigilanywa byobe bya ubabula batu, Na nilisamba bwata bobe. ⁷ Bilisamba kengelecho cha yano yobe yata. Bigimba kiine gyobe. ⁸ MLUME gwina yano , gwina misa giingi, Gushibashigililwa abilo , gwina keene chingi, ⁹ MLUME gwina misa u atabu bose, Na keene chage chili hegulu ha migilo gyabe gyose. ¹⁰ Ee MLUME, migilo gyobe gyiutona, Na bene bali humnyemya Abetcha bage bimma buswachi, ¹¹ Bilisambila ugengeda wa buoolo bobe, na manga gya uosha obe. ¹² Yulu ya ubasambila batu bugilanywa byage btaya, Na ugengeda wa punda cha buoolo bwage. ¹³ Buoolo bobe i buoolo bwa aala abisa, Na utawala obe iwa bibushi byose. ¹⁴ MLUME gusubagimiya bose bene bali baguube, Gusuginuna bose bene bali baginamu hasi. ¹⁵ Meeso ma batu bose malihuulola Gogwe, Na Gogwe usubaha biliwa bwabo u mengo mage. ¹⁶ Waubungula uboo obe, Wabigyusha byose byine bili na mwego byose byabili hubenja. ¹⁷ MLUME gwina kiine mnda madila mage mose, Na gwina yano hegulu ha migoli gyage gyose. ¹⁸ MLUME guli hoka na bose bene balihumgita, Bose balihumgita wa uwilila. ¹⁹ Gwibaha bose bali humnyemya byabalihubenja, Nage gwihulicha lilo lyabo na ubahogonona. ²⁰ MLUME husuusa bose bene balihummunda, Na bose bene bashi nakiine gwibachimya. ²¹ Anywa anyi idogoma punda cha MLUME; Bose bene bali na m'bili na balitona china lyage lihaha milumbu na milumbu.