¹ Na gagununywe MLUME, liwe lyanyi lya lyata, Gusungigya maboo manyi bita, Minywe gyanyi ulwa. ² Malagano manyi na mgumbo gwanyi, Mmao gwanyi na uhogononywa wanyi, Nganbo gyanyi gyandisinine, Gususacha batu banyi hasi hanyi. ³ Ee MLUME, mtu iyitu nai ata ummane? na mwana gwa mtu umlole? ⁴ Mtu gwalingilishiwa na bonene, Masugu mage nali nahi ihochu yuhita. ⁵ MLUME, uginamye gulu lyobe lisale, Uude koono nachi chihumya mii. ⁶ Uhile lwege lwa ahenyuhenyu, ubasale, Utele migwi gyobe, ubabulaganye malanga. ⁷ Umagolole maboo mobe uhuma hegulu, uponye, Upunye mnda madi mengi, mnda maboo ma bagenyi. ⁸ Tunywa twabo tulihudogoma bishilingye, Na uboo wabo wa ulume iyuboo wa lulimi. ⁹ Ee Abetcha, niugimbila lwimbo lwa luhya, Wa inubi ya migichi umi niugimbila. ¹⁰ Gusuha maoolo uhogononywa, Gwammogonona Daudi mgichi gwage, na ahilu a usona. ¹¹ Uponye, Mnda uboo wa bagenyi, Tunywa twabo tulihulisamba byine bishilingye, Na uboo wabo wa ulume iyuboo wa lulimi. ¹² Baana betu babe nahi maotela Bene baulile ubuwalubaga. Bawamisiha gyetu nahi bihanda bya umasunga Chibiilwe wa buhungwe bwa ihwilo. ¹³ Tuhombo twetu na tugilule na tuba bitungu bya mioga gyose. Miyoo gyetu na gibute Uki na maumi uki mnda mabala metu ma ugilishicha. ¹⁴ Ng'ombe chetu na chiswale michigo, Hashibe na uchimiwa. Na hasibe na uwaswa kole Ata uba na malilo mnda madila metu. ¹⁵ Luhanga lusoga uli batu ba gigyo namuna, Luhanga lusoga uli batu bagidi ugana MLUME noo Abetcha abo.