¹ Ee Abetcha, mtima gwanyi gwagimana, Nigimba, nigimba ng'imbo, Ehe, wa ugengeda wanyi. ² Byuwa, ligimbi na inubi, Nibyuwa umayaya. ³ Ee MLUME, niutona hawingi ha batu, Niugimbila ng'imbo hawingi ha mioga. ⁴ Bululi yano yobe yiulu ndaa na hagulu, Na uwilila obe ndaa na umatimba. ⁵ Ee, Abetcha, uginunywe hegulu ha gulu, Na hegulu ha sii gyose habe ugengeda obe. ⁶ Bululi baunjwa bobe badabulwe, Uhogonone wa uboo obe wa ulume, ungitabuwe. ⁷ Abetcha alisamba wa buhaha bwage, Nene niseelela. Nigigabula Shekemu, Nibala magulu ma ibetabeta ya Sukothi. ⁸ Gileadi ii gyanyi, na Manase ii gyanyi, Na Efulaimu ii uoma wa mswee gwanyi. Yuda ii lubango lwanyi lwa buoolo, ⁹ Moabu ii ilego yanyi ya ulisuwila. Nimtelela Edomu mkalabanda gwanyi, Na umtela Filisti mdodo gwa bita. ¹⁰ Mnanyi gwipila ndaa na mbuga gyina mgumbo? Mnanyi gwinombwela ndaa na Edomu? ¹¹ Ee Abetcha, gushi Gogwe ututelile? Mndi, Ee Abetcha, Ushigya u bita na bilume pambwa byetu? ¹² Utuhilile mbwatilicho hegulu ha basusuchi betu, Bululi uhogonona wa batu ushi na atu. ¹³ Wa uwatilicha wa abetcha twigila bihishu byata, Bululi Gee gwigahyilila basusuchi betu.