¹ Mmewe Abetcha buswachi bululi mmsoga, Bululi yano yage ii ya milumbu. ² Na badogome bino bene bahogononywe na MLUME, Baya belihogonone na uboo wa msusuchi. ³ Gubasumbiche uhuma bibaloo byose, Lubi lwa lwelo na lubi lwa igolo, ihindagala ya lubi lwa uboo wa ulume na uboo wa uachi. ⁴ Bahubagane-hubagane mlwanaganywa mndila gya mgala; Bashimonine mbuga gyushama. ⁵ Bamonine ndala, bamonine yuma,Bichuli-chuli byabo bya mwego bibele huchiminya malanga mnda mwabo. ⁶ Bamlilile MLUME, mnda asusu abo, Gubahoninye na ulemenywa wabo. ⁷ Gubagolwele mndila gya gigolobu, Baoshe ugya umbuga gya ushama. ⁸ Na bamtone MLUME yulu ya yano yage, Na bigagicha byage u batu. ⁹ Bululi gusugyusha ichuli-chuli ya mwegi yine yina yuma, Na ichuli-chuli ya mwego yine yina ndala na wigyusha busoga. ¹⁰ Bene bashamine mmihochu ya mdo gwa lubu, Bahambilwe mmasusu na igela, ¹¹ Bululi babengile binywa bya Abetcha, Banenunene lango lyage guya Guli hegulu. ¹² Bibyo gubachindiche mitima wa asusu, Balihyatele na bashimonine gubawatilicha. ¹³ Bamlilile MLUME mnda masusu mabo, Gubahoninywe na ulemwa wabo ose. ¹⁴ Gubahuminye mnda mdo na ihochu ya lubu, Gubelile uhambwa wabo, ¹⁵ Na bamginune MLUME yulu ya yano yage, Na bigagi byage ubatu. ¹⁶ Yulu gwagibela michango gya mmubo, Na gubelile tumangila twa bigela. ¹⁷ Bahugi ibalo ya uluba wabo, Na ibalo ya usona wabo, bali hulisusula. ¹⁸ Bichuli-chuli byabo bya mwego bilihuonywa biliwa byose,,Byahyila michango gya lubu. ¹⁹ Bamlilile MLUME mnda masusu mabo, Gubahoninye na ulemwa wabo ose. ²⁰ Uituma inywa yage, isubahonya, Isubahunya mnda uchimiwa wabo. ²¹ Na bamtone MLUNE yuluya yano yage, Na ugagicha wage ubatu. ²² Na bamtangile lutangi lwa umginuna, Na ulisamba bigilanywa byage wa ugimba. ²³ Bene basusala ubahali na uchina m'bwato.Basugila migilogyabo mnda madi mengi, ²⁴ Babo noo basumona mgilo gwa MLUME, Na bigagi byage mmabenga. ²⁵ Bululi basugana, gabehila mnaga gwa isukishi, Gubeginuna hegulu mabimbi mage. ²⁶ Babesela hegulu na usala m'benga, Bichuli-chuli byabo bya mwego bisuguluwa bisone. ²⁷ Bubehugila-hugila, na uhugila nahi mmolwa, Lwenyi lwabo lose lusubachimina. ²⁸ Babemlilila MLUME mnda asusu abo, Gabebahonya na masusu mabo. ²⁹ Gusugimiya mnaga na uba pii m bahali, Mabimbi mage mabehola. ³⁰ Haho noo bahaseelele yulu mahola Naga gusubahyicha wibega yabalihubenja. ³¹ Na bamginune MLUME yulu ya yano yage, Na bigagi byage ubatu. ³² Na bamtone mnda sumbulo lya batu, Na bamme buswachi umagogo ma bahela. ³³ Gugalule ngudi uba mgala gugumu,Na misula gya madi uba sii gya gigumu. ³⁴ Sii gya biguma biingi uba lubugu lwa miinyu, Wa ibalo ya usona wabo bene baihanyinye. ³⁵ Gugalulile mgongo uba ichiba ya madi, Na mgala gwa gugumu uba misula gya madi ³⁶ Bululi bubashaminye uya bene bali na ndala, Nabo balongya mabuga ma ushama. ³⁷ Baunine matete mnda mabala, Na uuna mizabibu gyine gibele huha biguma byage. ³⁸ Nage guhalile mihaa nabo nuba beengi, Nagyo gishibahungula bihichi byabo. ³⁹ Hanyuma gihunguwile na uchinda, Wa umonenywa na bisone na unyogwa. ⁴⁰ Gubagesele bahela unenuna, Na ubachunguluya mlele lishi na ndila. ⁴¹ Gum'biile msabi wihana ya asusu, Gumitile ibushi nahi ihichi ya moyoo. ⁴² Babagolobu mitima bimona na useelela, Na usona wa mioga gyose wilihamba tunywa. ⁴³ Gwina bunyemu na gabilole bibyo; Na baiengeleche yano ya MLUME.