¹ Haleluya. Mume MLUME buswachi bululi ii m'benju, Bululi yano yage ii ya milumbu. ² Mnanyi gunaosha ulisamba bigilanywa byata bya MLUME, Ulisamba punda chage chose? ³ Luhanga lusoga uli baya balihuwasha uonona, Na ugila kiine masugu mose. ⁴ Ee MLUME, Ukengeleche nene, wa ugitabuwa oli nao u batu babo. Unjwilile wa uhogonona obe. ⁵ Bululinamone yano ya basobolwa bobe, Naoshe useelela saso lya mmoga gobe, Na ulitona hamwechi na batu bobe. ⁶ Tugilile buubi hamwechi na bamasetu, Tugilile bisone, tugilile bigilanywa biibi. ⁷ Bamasetu mnda sii gya Misili bashiengeleche bihisho byobe bya ugagicha,; Bashengeleche bwingi bwa yano yobe; Babengile ha bahali, bahali lya Shamu. ⁸ Bibyo gubahogonone wa yulu ya china lyage, Gabimonye bihisho byage biulu. ⁹ Guhugumbile bahali lya Shamu lyonuguma, Gubagolwele m'benga nahi mmibanja yigumu. ¹⁰ Gubahogonone na uboo wa mtu gubaonywine, Na ugasapa na uboo wa tumangu twabo. ¹¹ Maadi mabaunine tumangu twabo, Ushiwatiliche ata gumwechi gwabo. ¹² Noo habawashiche binywa byge. Bagimbile punda chage. ¹³ Bagibilile bigilanywa byage wa abilo, Bashihembile mmungo gwage. ¹⁴ Bibyo babenjiche mlwanaganywa, Bamtondile Abetcha mgala. ¹⁵ Gubahele byababendiche, Gubagondiche mitima gyabo. ¹⁶ Bamlugiche Musa m'bulihodecho, Na Haluni mmaha gwa MLUME. ¹⁷ Sii gibuguwe gimminine Dathani, Giunine sumbilo lya Abilamu. ¹⁸ Ahyaa alamine mnda sumbilo lyabo, Nindi chao chichiminye babii. ¹⁹ Balongiche mwana ng'ombe uya Holebu, Baguginamine imishi gwa usumbuluwa. ²⁰ Baugalulile ugengeda wabo Wa mlingilisho gwa ng'ombe gisuya byanyi. ²¹ Bamgibilile Abetcha mmogononyi gwabo, Gugulile biuli mnda Misili. ²² Bihisho bya ugagicha mnda ibalo ya Hamu, Bigilanywa bya udanja ha bahali lya Shamu. ²³ Gudogomine ugana gwibachimya Nambo Musa msobolwa gwage gusabagimana, Umbele wa ihana ibeleile, Bululi gachigalule sungu chage gashichwe ubahaga. ²⁴ Bagibedile giya sii gya gibenju, Na bashibawashe inywa yage. ²⁵ Banunine mmahema mabo, Na bashihuliche lidi lya MLUME. ²⁶ Haho noo helibaginunine ubaoo wage, Ugana gwibachimya mlwanaganywa, ²⁷ Na ubasala babuswa babo hawingi ha mioga, Na ubasambalacha mnda bibaloo ya koo. ²⁸ Balilungile na Baal-Peoli; Bachilile lutangi lwa babu. ²⁹ Bamchigiliche wa bihisho byabo; Bisumi bibasusule. ³⁰ Haho noo Finehasi gugimene na uonona; Bisumi bichibilwe. ³¹ Gubalilwe ubana kiine Ibushi hanyuma ha ibushi ata milumbu. ³² Bamchigiliche ha madi ma Meliba, Uchiminywa uumpatila Musa yulu yabo, ³³ Bululi babengile mtima gwage, Gudogomine bishilingye wa milomo gyage. ³⁴ Bashibahagile batu ba giya sii Nahi biganine MLUME. ³⁵ Bibyo balisumbaganye na mioga, Baligigiche bihisho byabo. ³⁶ Bagigilile miishi gyabo, Nagyo bibele gochi wabali. ³⁷ Ehe, batangile bawalubaga na bawa misiha gyabo Uba lutangi u wihingili. ³⁸ Basile mashi mashi na ibalo, Mashi ma bawalubaga na bawa misiha babo, Babatangile lutangi u miishi gya Kanaani; Sii fgibiilwe abachi a mashi. ³⁹ Bibyo noo byababiilwe usuna yulu ya migilo gyabo, Bagilile masei wa bigilanywa byabo. ⁴⁰ Sungu cha MLUME chilamine hegulu ha batu bage, Guonywina buhyana byabo. ⁴¹ Gubabiile mmaboo ma mioga, Nabo bene babaonywine babatabalile. ⁴² Tumangu twabu tubamonene, Babiilwe hasi ha maboo mabo. ⁴³ Nyendo chingi gubahoninye, Haho bam'bengile wa mihungo gyabo, Bachindichwe yulu ya usona wabo. ⁴⁴ Wa bibyo gulolile asusu abo, Helihuliche lilo lyabo. ⁴⁵ Gubaengelediche alago age; Gubamonene keene wa bwingi bya yano yage; ⁴⁶ Gubaitile uhewa iuli na batu bose bene babawatile kole. ⁴⁷ Ee MLUME, Abetcha etu, utuhonone, Utusumbiche wa utuhunya hawingi ha mioga, Tulitone china lyobe lihaha, Tugiitile sasopunda chobe. ⁴⁸ Na gaginunywe MLUME, Abetcha a Isilaeki, Utula milumbu na milumbu. Batu bose na bagane, Noo bibyo. Haleluya.