¹ Haleluya. Mmewe MLUME buswachi, giswe china lyage, Ganinywe batu bihisho byage. ² Mgimbilwe, mgimbilwe wa ng'imbo, Engelechiwe bisaga byage byose. ³ Litonywe yulu ya china lyage lihaha, Na guleelele mitima gyabo bene balihummenga MLUME. ⁴ Mummunde MLUME na uoma wage, Yiengwe yenyi yage masugu mose. ⁵ Engelechiwe bisaga byage byeligilile, Bigagicha na uonona wa anywa age. ⁶ Bebywe babuswa ba Ibulahimu, mgichi gwage; Benywe baana ba Yakobo, basobolwa bage. ⁷ Gee, MLUME, noo Abetcha etu; Mnda sii gyose muli uonona wage. ⁸ Gulihuengelecha alago age milumbu; Inywa yage yelisambile bibushi uki. ⁹ Alago elibiile na Ibulahimu, Na ulaha wage uli Isaka. ¹⁰ Elimgimyile Yakobo aba m'bindo, Na wa Isilaeli libe alago a milumbu. ¹¹ Guganine,Niuha gogwe sii gya Kanani, Gibe buhyana bwenyu bwamuhelwe. ¹² Hababele bili batu banaoshiwa ubalwa, Ehe, batu bacho na baganyi mnda ibaloo, ¹³ Bahubagene-hubagene uhuma mmoga ata mmoga, Uhuma buoolo bumwechi ndaa na ubatu bange. ¹⁴ Gushileile mtu gabamonene, Ata bamaoolo gubaambile wa yulu yabo. ¹⁵ Gudogomine, Mushibaude bashinyiwa mauta banyi, Na mushibasusule bambuwa banyi. ¹⁶ Gugitile ndila gichwilile ibaloo, Gudogiche biliwa byose byababele huudagila. ¹⁷ Gummilile mtu umbele wabo, Yusufu guguchiwe ubucha. ¹⁸ Bam'bongwele umagulu mage na tumangila, Gubiilwe mnda tumbwela twa bigela. ¹⁹ Ata mengo ma uwilila wa inywa yage, Ulaga wa Abetcha umtondile. ²⁰ Oolo gutumine batu gee numsula, Mmela gwa batu gumlediche. ²¹ Gum'biile uba mmata mnda ndu gyage, Na uba na m'bindo gwa bumona bwage bose. ²² Gabahambe baana baga nahi byelihubenja, Na ubagigya muingu gyage lwengu. ²³ Isilaeli nage gugingile Misili, Yakobu gee nuba mgenyi mnda sii gya Hamu. ²⁴ Gubatagile batu bage babuta abisa, Gubaitile uba maomu uhima basusuchi babo. ²⁵ Gubagalulile mitima babaonywe batu bage, Babagilile buyanja bagichi bage. ²⁶ Gumtumine Musa mgichi gwage, Na Haluni mine gwelisobolile. ²⁷ Gubiile binamwene byage hawingi habo. Na bigagi mnda sii gya Hamu. ²⁸ Guhilile mdoo, mdoo noo uhamba, Na bashibengile binywa byage. ²⁹ Gugalulile maadi mabo uba mashi,Guhagile swii chabo. ³⁰ Ibaloo yabo igilule byula, Mmadu ma maoolo mabo. ³¹ Gunanine hachile biinji bya bigida, Na nda m'bisula byabo byose. ³² pahali ha mbula gubahele mbula gya mawe, Na ahyaa a ndili mnda ibaloo yabo. ³³ Guguminye mizabibu na mitini gyabo, Gunogili miti gya ubisula byabo. ³⁴ Gudogomine hachwile njige, Na baana ba njige bashinabalwa; ³⁵ Chilile biunaganywa byose bya ibaloo yabo. Njige chilile biguma bya sii byose. ³⁶ Gubahagile babuswa batangi bose ba sii, Mtomwe gwa uoma wabo. ³⁷ Gubahuminye bina bumona na nolo, Mnda mwa mmoga gwabo hashibe guhyatala. ³⁸ Milisi babele na saso habachuile, Wa yulu ya iduba ibagingile. ³⁹ Gugandile timba libe uunina, Na ahyaa ahile lwenge m'busugu. ⁴⁰ Heli bendiche guhilile kwali, Gubagyutiche ililwa ya hegulu ha gulu. ⁴¹ Guligadulile liwe lya lyata, hasuile madi, Magelile hahagumu nahi luudi. ⁴² Bululi guiengeleche inywa yage ihaha, Na Ibulahimu, mgichi gwage. ⁴³ Gubahuminye batu bage wa useelela, Na basubulwa bage wa ng'imbo cha saso. ⁴⁴ Gubahele ibaloo ya mioga, bahyanine migilo gya batu; ⁴⁵ Bululi bawashe alago age, na ugila m'bindo gwage. Haleluya.