¹ Ee ichuli-chuli yanyi ya mwego umginune MLUME. Gogwe,MLUME, Abetcha anyi, Uliitile uba mmata abisa; Walichwiya bunyemu na ugengeda. ² Walichwiya lwenge nahi ichwalaganywa; Ugandila gulu nahi bibambi; ³ Na ugimiya bihanda byage bya byumba bya hegulu mmadi. Na umaita matimba nahi abilibili age, Na usugyata hegulu ha bihwahwa bya mnaga. ⁴ Gusumaita malaika mage uba mnaga, Na bagichi bage uba ndili cha ahyaa. ⁵ Ubiile sii hegulu ha mshingi gwage, Gishidigile milumbu. ⁶ Uwilile wa mabenga nahi ichwalaganywa, Madi mabele magimanyu hegulu ha koono. ⁷ Wa uambila obe masinine, Wa lidi lya kuba gyobe mahingile abilo, ⁸ Maselile koono na usala m'byuwa, Ndaa na ihana yolimalongeche. ⁹ Ubiile tuuta mashiitowe, Na mashigiwile ugilucha na ugihulila sii. ¹⁰ Gusubiya misula m'bibetabeta; Byine bili mpanga koono; ¹¹ Gisunywisha nyama chose cha mgala; Pende yuma yacho isuhwa. ¹² Mibamba tusushama tunonyi twa hegulu; Hawingi ha matabi tusuduga na uhunya madii mato. ¹³ Masunywisha koono madi mene masuhuma u byumba bya miao gyacho. Na sii gyagyuta biliwa bya migilo gyobe.. ¹⁴ Umenya byanyi wa bihichi bihichi, Na biboga uba biliwa bya batu; Yulu gahunye biliwa mnda sii, ¹⁵ Na divai limseelecha mtu mnda mtima gwage. Gagemye yenyi yage na mauta, Na mkati gutoleleche mtu mtima gwage. ¹⁶ Miti gya MLUME nagyo gyagyuta, Miamba gya Lebanoni gyeliunine. ¹⁷ Noo musuita tunonyi pao chabo, Na kiima, byobu noo madu mabo. ¹⁸ Koono cha chilahu noo uli kulungu Na mihao gya mawe noo businino bwa tugwimgwi. ¹⁹ Guguitile mwechi yulu ya mengo, Chuba limane uya wa busugu. ²⁰ Gogwe iutile mdoo noo uba busugu, Noo hachisugyata nyama chose cha mmisowa. ²¹ Baana ba matamwe basuduga babasugya m'buhibi, Yulu yuenga iliwa yabo wa Abetcha. ²² Chuba halisutobowa, bonugya lwabo, Ugyulala mtuhumbo twabo. ²³ Mtu nage gusuchuwa naugya umgilo, Na uba umgilo gwage mpaga igolo. ²⁴ Ee MLUME, Nahi byabili byata bigilanywa byobe! Wa lwengo ubiitile byose abisa. Sii giligigiluchu bumona biobe. ²⁵ Bahali lili uya, lyata na libungubu, Muli bilihugyata na bishinabalwa, Bibumbwa bili na mwego bichoo na byata. ²⁶ Noo musuhita maato, Noo muli gwena gyolibumbule gishige moo. ²⁷ Bibyo byose bilihuhemba Gogwe, Ubahe biliwa byabo wa memgo mabo. ²⁸ Gogwe usubaha, Boo bisutola; Gogwe usubumbula uboo obe, Boo bisugyuta bisoga; ²⁹ Gogwe waibisa yenyi yobe, Boo chadidibuwa; Wahunya luhuda lwabyo, chaawa, ³⁰ Wahila mtima gobe, Byabumbwa, Na Gogwe wagiwicha buhya yenyi ya sii. ³¹ Ugengeda wa MLUME na ushame milumbu; MLUME gaseelele bigilanywa byage. ³² Gwagilingamina sii, gyadanda; Gwachiuda koono chahuma mii. ³³ Nimgimbila MLUME bino nishama poo; Niseelela Abetcha anyi nahuba poo; ³⁴ Uengelecha wanyi na ube saa weli; Nene nibi na saso uli MLUME. ³⁵ Bene bina buubi bachimiwe mnda ibaloo, Bangila biibi bashibe hoo iyaka. Ee ichuli-chuli yanyi ya mwego, umginune MLUME.